2 BAKORINTHE 2

₁Eaba ke rera hore nke ke ka boela ka le etela ho tla le soabisa, ₂hobane haeba ke le soabisa, ke mang ea tla nthabisa, ntle ho lōna bao ke ba soabisitseng? ₃Ke ka hona ke le ngoletseng lengolo leo. Ke ne ke sa rate hore ha ke e-tla ho lōna ke tl'o soabisoa ke bona batho ba tšoanetseng ho nthabisa, hobane ke tseba ka ho tlala hore thabo ea ka ke ea lōna bohle. ₄Ke ile ka le ngolla ka maikutlo a tšoenyehileng, le ka pelo e tsielehileng, le ka meokho e keleketlang. E ne e se ho le soabisa, empa e ne e le hore le tle le tsebe boholo ba lerato leo ke le ratang ka lona.

₅Joale haeba motho a soabisitse e mong, ha a ea soabisa 'na, o soabisitse lōna; ho se feteletse puo ke re, leha e se lōna bohle. ₆Ho lekane hore ebe ea joalo o etselitsoe kotlo ke bongata ba lōna. ₇Empa joale le tšoanela ho mo tšoarela le ho mo tšelisa, esere a sithabetsoa ke masoabi a maholo. ₈Ka baka leo, ke le rapela hore le 'montše hore le fela le mo rata. ₉Ke le ngoletse hore ke nonye maikutlo a lōna, ke tle ke be le bopaki ba hore na le mamela linthong tsohle. ₁₀Joale eo le mo tšoarelang, le 'na kea mo tšoarela. Haeba ho na le seo ke se tšoaretseng, ke ka baka la lōna, mahlong a Kreste, ke tšoaretseng ea se entseng; ₁₁esere Satane a re qhekella, etsoe re tseba maqiti a hae.

₁₂Eare ha ke fihla Terōoase, moo ke neng ke il'o bolela molaetsa o molemo oa Kreste teng, ka fumana Morena a se a mpuletse tsela. ₁₃Empa ka se ke ka ba le phomolo moeeng, hobane ha kea ka ka fumana ngoan'eso, Tite. Eaba kea lumelisa, 'me ho tloha moo ka ea Masedonia.

₁₄A re leboheng Molimo, ea re neang tlhōlo kamehla ka Kreste, 'me ea utloahatsang ka rōna, libakeng tsohle, monko o monate oa ho mo tseba, ₁₅hobane rōna re monko o monate oa Kreste o eang ho Molimo, o utloahalang ho ba eang pholohong, le ho ba eang timelong. ₁₆Ho ba eang timelong ke monko oa lefu, o bolaeang; ho ba eang pholohong ke monko oa bophelo, o phelisang. Joale ke mang ea loketseng tsee? ₁₇Etsoe rōna ha re ke ba bangata ba bapatsang ka lentsoe la Molimo, empa kahobane re rōmiloe ke Molimo, re bua 'nete mahlong a Molimo, re le bahlanka ba Kreste.