2 BAKORINTHE 1

₁'Na Paulosi, moapostola oa Kreste Jesu ka thato ea Molimo, le Timothea, ngoan'abo rōna, re lumelisa kereke ea Molimo e Korinthe, 'moho le balumeli bohle ba leng naheng ea Akaea, re re:

₂Mohau le khotso ea Molimo Ntat'a rōna le ea Morena Jesu Kreste li ke li be le lōna.

₃Ho bokoe Molimo, Ntat'a Morena oa rōna Jesu Kreste, Ntat'a mehauhelo le Molimo oa matšeliso 'ohle. ₄O re tšelisa matšoenyehong 'ohle a rōna, e le hore le rōna re tle re tsebe ho tšelisa bohle ba matšoenyehong, ka matšeliso ao le rōna re tšelisoang ka 'ona ke Molimo. ₅Joalokaha mahlōkō a Kreste a re aparetse, ka mokhoa o joalo le 'ona matšeliso a re ngatafaletse ka Kreste. ₆Ha re tšoenyeha, hona ho le tlisetsa tšeliso le pholoho; haeba rea tšelisoa, hona ho le tlisetsa tšeliso e le thusang ho mamella mahlōkō ao le rōna re a mamellang. ₇Tšepo ea rōna ho lōna e tiile, hobane re tseba hore, joalokaha le bile balekane ba rōna mahlōkōng, le teng le tla 'ne le be bona matšelisong.

₈Bana beso, efela re rata ha le tseba hore matšoenyeho a re hlahetseng Asia a ne a le boima haholo ho feta matla a rōna, hoo re bileng ra lahleheloa ke tšepo ea hore re tla phela. ₉Ra ikutloa eka re ahlōletsoe lefu, 'me hona ha etsa hore re se ke ra 'na ra itšepa, re mpe re tšepe Molimo ea tsosang bafu; ₁₀e leng eena ea re pholositseng kotsing e kaalo ea ho shoa, 'me o tla boela a re pholose. Re tšepile hore o tla 'ne a re pholose, ₁₁ha lōna le ntse le re tlatsa ka lithapelo tsa lōna. Ka mokhoa ona, kaha re tla be re fumane thuso ka ho rapelloa ke batho ba bangata, le teng re tla leboheloa ho Molimo ke ba bangata.

₁₂Seo re ithorisang ka sona ke sena: Letsoalo la rōna le re pakela hore mona lefatšeng re ile ra phelisana le batho, haholo le lōna, re se na mano, re e-na le 'nete ea Molimo; e seng ka bohlale ba botho, empa ka mohau oa Molimo. ₁₃Ha rea ka ra le ngolla letho, haese seo le se balang, le se utloisisang. Empa ke tšepa hore le sa tla utloisisa ka ho tlala ₁₄seo le seng le se utloisisa kammoho, e le hore, Letsatsing la ho tla ha Morena Jesu, le tle le ithorise ka rōna, joalokaha le rōna re tla ithorisa ka lōna.

₁₅Ka tšepo ena, ke ne ke ikemiselitse ho le etela pele, e le hore ke le thabise ka ho le etela habeli. ₁₆Ke ne ke tla feta le ho lōna ha ke leba Masedonia, ke boele ke khutlele ho lōna ha ke e-tsoa teng, e le hore le tle le nthuse ho kena leetong la ho ea Judea. ₁₇Ka boikemisetso bona, na ke ne ke tlaila? Kapa na merero ea ka ke ea botho feela, hoo ke tla re “e” le “che” ka nako e le 'ngoe?

₁₈Ka 'nete ea Molimo, puo ea ka ho lōna hase “e” le “che” ka nako e le 'ngoe, ₁₉hobane Mor'a Molimo, Jesu Kreste, eo rōna le Silefanose le Timothea re mo phatlalalitseng har'a lōna, e ne e se “e” le “che”, empa haesale e le “e” feela. ₂₀Ke eena eo e leng “e” litšepisong tsohle tsa Molimo. Ke ka baka leo e ntseng e le ka eena re reng “a ho be joalo!” ha re tlotlisa Molimo. ₂₁Ke Molimo ka boeena ea re tiisang 'moho le lōna ho Kreste; ea re tlotsitseng, ₂₂ea re tšoaileng ka letšoao la hae, 'me ea re fileng Moea o Halalelang lipelong tsa rōna, e le ho tiisa hore tse tlang li tla tla.

₂₃Ke ikana ka bophelo ba ka! Molimo a ka mpakela hore e ne e le ka ho le qenehela, ha ke sa ka ka khutlela Korinthe. ₂₄Litabeng tsa tumelo ea lōna, re batla ho sebelisana le lōna ka mokhoa o le thabisang, e seng ho le qōbella; etsoe le se le eme le tiile tumelong.