1Jehoshafate a shoa, 'me a epeloa ho bo-ntat'ae, Motseng oa Davida. Jehorame mora oa hae, a mo hlahlama.
Puso ea Jehorame, khosi ea Juda
2Bana babo Jehorame, e leng bara ba Jehoshafate, e ne e le Asariea, le Jeiele, le Sekariea, le Asarieahu, le Mikaele, le Shefatiea. Bana kaofela e ne e le bara ba Jehoshafate, khosi ea Iseraele. 3Ntat'a bona a ba fa limpho tse ngata tsa silefera, le tsa khauta, le tse ling tsa bohlokoa; a ba fa le metse e hahelelitsoeng e naheng ea Juda, empa 'muso oona a o nea Jehorame, hobane e ne e le eena letsibolo la hae.
4Ha Jehorame a se a entsoe khosi, ho hlahlama ntat'ae, a imatlafatsa, a bolaea bana babo kaofela ka sabole, le mahosana a mang a Iseraele.
5Jehorame o ne a e-na le lilemo tse mashome a mararo a metso e 'meli ha a qala ho busa, 'me a busa ka lilemo tse robeli a le Jerusalema. 6A tsamaea mehlaleng ea likhosi tsa Iseraele, joalokaha ba lelapa la Akabe ba ne ba ile ba etsa, hobane o ne a nyetse morali oa Akabe. A etsa bobe mahlong a Morena. 7Leha ho le joalo, Morena a se ke a timetsa ba lelapa la Davida, hobane o ne a ile a etsa selekane le eena, a mo tšepisa hore eena le litlōhōlō tsa hae ba tla busa kamehla.
8Ka nako eo Jehorame a neng a busa ka eona, Baedomo ba mo fetohela, ba itōkōlla pusong ea Juda, ba ikhethela khosi. 9Eaba bo-Jehorame le mahosana ba ba futuhela ka likariki tsa hae tsa ntoa. A tsoha har'a bosiu, a e-na le balaoli ba likariki tsa ntoa, a phunyeletsa thekō ea Baedomo. 10Haesale Baedomo ba itōkōlla pusong ea ba sechaba sa Juda, ho fihlela kajeno-ea-bokajeno.
Ka eona nako eo, motse oa Lebena le oona oa fetohela Juda, hobane Jehorame a ne e ile a furalla Morena Molimo oa bo-ntat'ae. 11Jehorame a haha libaka tseo ho rapelloang melimo ea bohata ho tsona lithabeng tsa Juda, a ba a etsa hore baahi ba Jerusalema ba sebeletse melimo ea bohata, a khelosa sechaba sa Juda.
12Joale Jehorame a amohela lengolo le tsoang ho moporofeta Elia, le reng: “Morena Molimo oa Davida, ntat'ao-moholo, o bua tjena: ‘Ha ua ka ua tsamaea mehlaleng ea Jehoshafate, ntat'ao, le mehlaleng ea Asa, khosi ea Juda. 13U tsamaile mehlaleng ea likhosi tsa Iseraele, 'me u entse hore sechaba sa Juda le baahi ba Jerusalema ba sebeletse melimo ea bohata, joaloka ba lelapa la Akabe. U bile u bolaile bana beno, ba lelapa la ntat'ao, ba neng ba lokile ho u feta. 14Ka baka leo, Morena o tla otla sechaba sa hao, le bana ba hao, le basali ba hao, le lintho tsohle tsa hao ka lefu la seoa se seholo. 15Uena u tla tšoaroa ke lefu le bohlōkō la letšōllo, ho fihlela mala a hao a hōrōmetseha, ka baka la ho tšōlla ka letsatsi le leng le le leng.’ ”
16Hape Morena a etsa hore Bafilesita, le Maarabia a neng a ahelane le Bakushe, ba hloee Jehorame. 17Ba futuhela naha ea Juda, ba e hlōla. Ba hapa thepa eohle e neng e le ka tlung ea khosi, ba thōpa le bara ba khosi, le basali ba eona, hoo Jehorame a sa kang a salloa ke mora leha a le mong, haese Jehōoakase, mora oa hae oa lethōpō.
18Kamora' tsena, Morena a etsa hore Jehorame a jeoe ke mala a sa phekoleheng. 19Ha nako e ntse e e-ea, kamora' lemo tse peli, mala a hae a hōrōmetseha, 'me a shoa habohlōkō. Sechaba sa hae sa se ke sa 'mesetsa mollo oa bofifi, joalokaha se ne se etsetse bo-ntat'ae.
20Jehorame o ne a e-na le lilemo tse mashome a mararo a metso e 'meli ha a qala ho busa. A busa ka lilemo tse robeli a le Jerusalema. A shoa sechaba se se se sa mo rate. Leha ho le joalo, sa mo epela Motseng oa Davida, empa e seng mabitleng a likhosi.
