Bophelo bo khahlisang Molimo
1Joale he, bana beso, le utloile ka rōna mokhoa oo le tšoanetseng ho phela le ho khahlisa Molimo ka oona. Ka Morena Jesu, rea le kōpa, 'me rea le rapela hore le phele joalo, le 'ne le atlehe le ho feta. 2Le tseba hore na re le file litaelo life lebitsong la Morena Jesu.
3Thato ea Molimo ke hore le halalele, le pheme bohlola, 4e mong le e mong oa lōna a ithute ho inkela mosali eo a tla phela le eena ka mokhoa o halalelang, o hlomphehang. 5A se ke a nkuoa ke litakatso tsa bokhopo, joaloka bahedene ba sa tsebeng Molimo. 6Tabeng ena, ho se be ea senyetsang ngoan'abo, 'me a mo jella litokelo tsa hae, hobane joalokaha re se re boletse pele, ra ba ra tiisa, Morena ke eena ea ahlōlang tsohle tse joalo. 7Molimo ha aa ka a re bitsetsa mekhoeng e litšila, empa o re bitselitse khalalelong. 8Ka baka leo, ea hanang litaelo tsena ha a hane motho, empa o hana Molimo, eena ea le neang Moea oa hae o Halalelang.
9Ha e le ka lerato la boena, ha le hloke hore le ngolloe ka lona, hobane ka bolōna le rutiloe ke Molimo ho ratana; 10etsoe le etsa joalo ho bana babo lōna kaofela ba hohle Masedonia. Feela rea le rapela, bana beso: Atlehang le ho feta.
11Ikitlaeletseng ho phela ka khotso, ho hlokomela litaba tsa lōna le ho sebetsa ka matsoho a lōna, joalokaha re le laetse. 12Ka tsela ena bophelo ba lōna e be bo tšoanelehang mahlong a ba kantle, 'me le se ke la hloka letho ho motho.
Ho tla ha Morena
13Bana beso, re rata ha le tseba tsa ba ithobaletseng, hore le tle le se ke la lla joaloka ba bang, ba se nang tšepo. 14Haeba re lumela hore Jesu o ile a shoa, a ba a tsoha bafung, le ba ithobaletseng ho Jesu, Molimo o tla ba tsosa bafung joaloka Jesu.
15Sena re le bolella sona e le thuto ea Morena: Rōna ba tla beng ba ntse ba phela mohla Morena a tlang, ha re na ho etella pele ba ithobaletseng. 16Mohla ho hlahang taelo, ka lentsoe la lengeloileholo, ka terompeta ea Molimo, Morena ka sebele o tla theoha leholimong, 'me ba shoetseng ho Kreste ba tla tsoha pele. 17Joale rōna ba tla beng ba ntse ba phela re tla nkeloa marung hammoho le bona, ho ea khahlanyetsa Morena sebakeng, 'me ka mokhoa o joalo re tla ba le Morena kamehla. 18Ka hona tšelisanang ka thuto eo.
