1 BATHESALONIKA 1

₁'Na Paulosi, le Silefanose, le Timothea, re lumelisa kereke ea Bathesalonika, eo e leng ea Molimo Ntate le ea Morena Jesu Kreste, re re: Mohau le khotso li ke li be le lōna.

₂Kamehla re leboha Molimo ka baka la lōna bohle, 'me ha re phetse ho le hopola lithapelong tsa rōna. ₃Pel'a Molimo, Ntat'a rōna, re hopola mesebetsi ea tumelo ea lōna, le boiteko ba lerato la lōna, le tiisetso ea tšepo ea lōna ho Morena oa rōna Jesu Kreste.

₄Re tseba le hore, lōna bana babo rōna, ba ratoang ke Molimo, le khethiloe ke eena, ₅hobane molaetsa o molemo oa rōna ha oa ka oa tla ho lōna ka lipolelo feela, empa o tlile le ka matla le ka Moea o Halalelang, le ka ho kholiseha haholo. Ke seo re bileng sona har'a lōna ho le thusa, joalokaha le tseba. ₆Lōna le ile la fetoha baetsisi ba rōna le ba Morena, 'me har'a matšoenyeho a mangata la amohela lentsoe la hae ka thabo e tsoang ho Moea o Halalelang. ₇Kahoo le fetohile mohlala ho balumeli bohle ba Masedonia le ba Akaea. ₈Ho tloha ha habo lōna, lentsoe la Morena ha lea ka la tuma Masedonia le Akaea feela, empa botumo ba tumelo ea lōna ho Molimo bo ile ba fihla libakeng tsohle, hoo re seng re sa hloke ho bua ka taba eo. ₉Bohle ba bolelisa kamoo lōna le re amohetseng hantle kateng, le kamoo le ileng la sokolohela ho Molimo kateng. Le ile la lahla melimo ea bohata, e le hore le tle le sebeletse Molimo ea phelang, oa 'nete, ₁₀'me le lebelle Mora oa hae ea tla tsoa leholimong, Jesu eo a mo tsositseng bafung, eena ea tla re phemisa khalefo e tlang.