Areka naheng ea Bafilesita
1Ha Bafilesita ba se ba hapile areka ea Molimo, ba e tlosa Ebenesere, ba e isa Ashedode. 2Joale ba nka areka eo ea Molimo, ba e kenya ka tempeleng ea Dagone, ba e bea pel'a Dagone. 3Ka le hlahlamang, ha baahi ba Ashedode ba tsoha ka malungoalungoana, ba bona Dagone a oetse fatše ka sefahleho, kapele ho areka ea Morena. Ba nka Dagone, ba boela ba 'mea litulong tsa hae. 4Hoseng ka le hlahlamang, ha ba tsoha e sa le ka malungoalungoana, ba boela ba bona Dagone a oetse fatše ka sefahleho, kapele ho areka ea Morena. Hlooho ea Dagone, le liatla tse peli tsa matsoho a hae, li ne li khaotsoe, li beiloe holim'a kosene e fatše ea monyako, ho setse setōpō se sekōlōkōtō. 5Ka baka leo, naheng ea Ashedode baprista ba Dagone, kapa mang le mang ea kenang ka tempeleng ea Dagone, ha ba hate holim'a kosene e fatše ea monyako oa tempele ea Dagone, ho fihlela le kajeno-ea-bokajeno.
Areka ea balehisoa
6Morena a otla baahi ba Ashedode habohlōkō; a ba timetsa, a ba bolaea ka mathōpa a mokoteng, a bolaea baahi ba Ashedode le ba metsana e mathōkong a eona. 7Ha banna ba Ashedode ba bona se etsahalang, ba re: “Areka ea Molimo oa Baiseraele e ke ke ea lula har'a rōna, hobane Molimo o re otla habohlōkō, rōna le molimo oa rōna Dagone.” 8Eaba ba rōma maqosa ho ba memela likhosi tsohle tsa Bafilesita, ba re ho tsona: “Re etse'ng ka areka ee ea Molimo oa Baiseraele?”
Likhosi tsa araba, tsa re: “Nkang areka ena ea Molimo oa Baiseraele, le e ise Gate.” Eaba ba nka areka eo ea Molimo oa Baiseraele, ba e isa teng.
9Eare hoba ba ise areka moo, Morena a hlahitsetsa motse oo tsietsi e kholo. A otla banna ba motse oo, ba baholo le ba banyenyane; ba tsoa mathōpa a mokoteng. 10Eaba ba isa areka ea Molimo motseng oa Ekerone.
Ha areka ea Molimo e fihla Ekerone, baahi ba Ekerone ba hōoa, ba re: “Ba re tliselitse areka ea Molimo oa Baiseraele ho tla re bolaea le ho tla bolaea sechaba sa habo rōna!” 11Ka baka leo, ba rōma maqosa ho ba memela likhosi tsohle tsa Bafilesita, 'me ba re ho tsona: “Tlosang areka ena ea Molimo oa Baiseraele, le e khutlisetse moo e tsoang teng, e tle e se ke ea re bolaea, rōna le sechaba sa habo rōna!” Ho ne ho nkha lefu feela har'a motse oohle, hobane Morena o ne a ba otla habohlōkō. 12Banna ba sa kang ba e-shoa bona ba otloa ka mathōpa a mokoteng, 'me seboko se tsoang motseng sa nyolohela leholimong.
