Lefu la Saule le bara ba hae
1Bafilesita ba loantša Baiseraele. Banna ba Baiseraele ba ba baleha, ba oa mofela holim'a thaba ea Gileboa. 2Bafilesita ba bea Saule le bara ba hae merebele, ba bolaea Jonathane, le Abinadabe, le Malekishuoa, bara ba Saule. 3Ntoa ea imela Saule. Banna ba liqha ba fula Saule ka metsu, 'me a tsoa kotsi e mpe.
4Eaba Saule o re ho mojari oa lihlomo tsa hae: “Nka sabole ea hao, u ntlhabe, esere maqai ana a fihla a nqetela, 'me ka tlontloloha.”
Empa mojari oa lihlomo tsa hae a hana, hobane o ne a tšohile haholo. Ka baka leo, Saule a nka sabole ea hae, a itihela holim'a eona. 5Ha mojari oa lihlomo tsa hae a bona hore Saule o shoele, le eena a itihela holim'a sabole ea hae, ba shoa bobeli. 6Ka lona letsatsi leo Saule a shoa, le bara ba hae ba bararo, le mojari oa lihlomo tsa hae, le banna bohle ba hae.
7Ha Baiseraele ba neng ba le kamose ho khohlo, le ba ka nq'ane ho Jorodane, ba utloa hore bahlabani ba Baiseraele ba balehile, le hore Saule le bara ba hae ba se ba bolailoe, ba siea metse ea bona, ba baleha, eaba Bafilesita baa tla, ba ikahela ho eona.
8Ka le hlahlamang, ha Bafilesita ba tlil'o hlobolisa ba bolailoeng, ba fumana Saule le bara ba hae ba bararo ba bolaetsoe thabeng ea Gileboa. 9Ba khaola hlooho ea Saule, ba mo hlobolisa seaparo sa ntoa, ba rōmela maqosa hohle naheng ea Bafilesita, ho phatlalatsa taba ena ka litempeleng tsa melimo ea bona ea bohata, le har'a sechaba sohle. 10Ba bea seaparo sa hae sa ntoa ka tempeleng ea Asetarote; ba thakhisa setōpō sa hae lerakong la Bete-Shane.
Saule oa epeloa
11Ha baahi ba Jabeshe-Gileade ba utloa seo Bafilesita ba se entseng Saule, 12banna bohle ba bahale ba phalla, ba tsamaea bosiu bohle, ba fihla ba fanyolla setōpō sa Saule le litōpō tsa bara ba hae lerakong la Bete-Shane, ba khutlela Jabeshe, ba li chesetsa hona teng. 13Ba nka masapo a bona, ba a epela tlas'a sefate sa tamarisika se Jabeshe, ba itima lijo ka matsatsi a supileng.
