Batsoali ba Davida ba ea Moabe
1Davida a tloha Gate, a balehela lehaheng la Adulame. Ha bana babo, le ba lelapa lohle la ntat'ae ba utloela, ba theohela moo ho eena. 2Batho bohle ba litsietsing, le ba melatong, le ba utloileng bohlōkō, ba khōbōkanela ho eena, ea e-ba mookameli oa bona. Batho bao e ne e ka ba makholo a mane.
3Davida a tloha moo, a ea Misepa e Moabe, 'me a re ho khosi ea Moabe: “Kea u rapela: Ak'u lumelle ntate le 'mè hore ba tle mona, ba tl'o lula le lōna, ho fihlela ke tseba seo Molimo a tla nketsetsa sona.” 4Davida a tlisa ntat'ae le 'm'ae kapele ho khosi ea Moabe, ba lula le khosi eo ka nako eo Davida a neng a ntse a le qhobosheaneng ka eona.
5Moporofeta Gade a re ho Davida: “U se ke ua lula mona qhobosheaneng; tloha, u ee naheng ea Juda.” Eaba Davida oa tloha, o ea morung oa Herete.
Doege o èka Ahimeleke
6Saule a utloela hore Davida le banna ba tsamaeng le eena ba fumanoe. Saule o ne a le Gibea, a lutse leralleng, tlas'a sefate sa tamarisika. Letsohong o ne a tšoere lerumo. Bahlanka ba hae bohle ba ne ba eme, ba mo pota-potile. 7Eaba Saule o re ho bahlanka ba hae ba mo pota-potileng: “Mamelang, lōna Babenjamine! Na ebe mora eo oa Jese o tla nea e mong le e mong oa lōna masimo le lirapa tsa morara? Na lōna bohle o tla le etsa balaoli ba ba likete, le balaoli ba ba makholo, 8ha e le moo lōna bohle le ile la nthera, 'me ha se ke ha e-ba le ea mong ea ntōmang tsebe ha mora oa ka le mora oa Jese ba etsa selekane? Ha ho le ea mong oa lōna ea nkutloelang bohlōkō, kapa ea ntsebisang hore mora oa ka o fuluha mohlanka oa ka hore a ntalle, joalokaha ho le joalo kajeno.”
9Joale Doege oa Moedomo, eo e neng e le mookameli oa balisana ba Saule, a araba, a re: “Ke ne ke bone mora oa Jese ha a fihla Nobe, ho Ahimeleke, mora oa Ahitube. 10Ahimeleke a botsa Morena hore na Davida a etse joang. A mo fa lijo, a ba a mo nea le sabole ea Goliate oa Mofilesita.”
Baprista baa bolaoa
11Khosi ea rōma maqōsa ho ea lata moprista Ahimeleke, mora oa Ahitube, eena le bohle ba lelapa la ntat'ae, le baprista ba Nobe. Bohle ba tla ho khosi. 12Saule a re ho Ahimeleke: “Mamela joale, uena mora oa Ahitube.”
Ahimeleke a re: “Ke 'na enoa, mong'a ka.”
13Saule a re ho eena: “Ke ka baka la'ng ha uena le mora oa Jese, le ile la nthera? U ile ua mo fa lijo, ua mo nea le sabole; ua ba ua 'motsetsa ho Molimo, hore na a etse joang, a tle a ntsohele matla, a ntalle joalokaha kajeno a entse!”
14Ahimeleke a araba khosi, a re: “Har'a bahlanka ba hao ke mang ea tšepahalang joaloka Davida, mokhoenyana oa khosi, ea mamelang litaelo tsa hao, eo e leng eena molaoli oa balebeli ba hao, ea bileng a hlomphuoang lapeng la hao? 15Na kajeno ke lekhetlo la pele ke kajeno 'motsetsang ho Molimo? Che! U se ke ua bona mohlanka oa hao le bohle ba lelapa la ntatae ba le molato. Mohlanka oa hao ha a tsebe le letho ka taba ena!”
16Khosi ea re: “Ruri uena, Ahimeleke, le ba lelapa la ntat'ao, le tla bolaoa!”
17Khosi ea re ho balebeli ba neng ba e pota-potile: “Tloong, le bolaee baprista ba Morena, hobane ba thusana le Davida. Ba bile ba tseba hore o balehile, empa ha baa ka ba ntsebisa.”
Empa bahlanka ka khosi ba se ke ba bolaea baprista ba Morena.
18Eaba khosi ea bona e re ho Doege: “Tloo, u bolaee baprista bana.” Doege oa Moedomo a tla, a bolaea baprista bao. Ka letsatsi leo a bolaea banna ba mashome a robeli a metso e mehlano ba neng ba apere litipe tse entsoeng ka masela a lene. 19A bolaea le baahi ba motse oa Nobe ka sabole, le likhomo, le litonki, le linku.
20Empa Abiatare, e mong oa bara ba Ahimeleke, mora oa Ahitube, a phōnyōha, 'me a balehela ho Davida. 21Abiatare a bolella Davida hore Saule o bolaile baprista ba Morena. 22Davida a re ho Abiatare: “Ka letsatsi leo Doege oa Moedomo a neng a le mona ka lona, ke ne ke tsebe hore o tla phetela Saule litaba. Batho bohle ba lelapa la ntat'ao ba bolailoe ka baka la ka. 23Lula le 'na, u se ke ua tšaba, hobane ea batlang ho mpolaea, le uena o batla ho u bolaea. U tla sireletseha ha u le ho 'na mona.”
