Setsoalle sa Davida le Jonathane
1Ha Davida a se a qetile ho bua le Saule, moea oa Jonathane oa khomarelana le moea oa Davida, 'me Jonathane a rata Davida joalokaha a ithata. 2Ka lona letsatsi leo, Saule a nka Davida, a se ke a mo lumella ho hlola a khutlela tlung ea ntat'ae. 3Bo-Jonathane le Davida ba etsa selekane, hobane Jonathane o ne a rata Davida joalokaha a ithata. 4Jonathane a hlōbōla seaparo seo a neng a se apere, a se nea Davida. A mo nea le baki e entsoeng ka tšepe, le sabole ea hae, le seqha sa hae, le leqhama la hae.
5Hohle moo Saule a neng a rōma Davida teng, o ne a atleha, hoo Saule a bileng a mo etsa mookameli oa bahlabani. Hona ha thabisa sechaba sohle, le balaoli ba Saule ba mabōtho.
Saule o qala ho hōnōhela Davida
6Ha Davida a khutla le mabōtho, a tsoa bolaea Goliate, basali ba tsoa metseng eohle ea Iseraele, ba tla ba bina, ba bile ba etsa motjeko, ho khahlanyetsa khosi Saule. Ba ne ba letsa meropa le liharepa, ka thabo. 7Basali ba neng ba etsa motjeko ba ne ba bina, ba re:
“Saule o bolaile ba hae ba likete,
Davida eena
o bolaile ba kete tsa likete.”
8Saule a halefa haholo, a se ke a thabisoa ke puo ena, 'me a re: “Ba re Davida o bolaile ba likete tsa likete, empa 'na ba re ke bolaile ba likete! Ebe o sa saletsoe ke eng, haese 'muso feela?” 9Saule a honohela Davida ke hona, haesale ho tloha mohlang oo, ho ea ho ile.
10Ka letsatsi le hlahlamang moea o litšila, o tsoang ho Molimo, oa theohela holim'a Saule ka matla. Saule a halefa joaloka lehlanya, a le ka tlung ea hae. Davida a letsa harepa ea hae joalokaha a 'ne a etse ka matsatsi 'ohle, Saule eena a tšoere lerumo. 11Saule a betsa lerumo, hobane o ne a re: “Ke tla hlabella Davida leboteng.” Empa Davida a qoba lerumo leo habeli.
12Saule o ne a tšaba Davida, kahobane Morena o ne a e-na le Davida, a furaletse Saule. 13Ka baka leo, Saule a tlosa Davida ho eena, a mo etsa molaoli oa ba sekete. Davida o ne a futuha, a be a khutle a ntse a eteletse bahlabani pele. 14Davida o ne a atleha ho tsohle tseo a li etsang, hobane Morena o ne a e-na le eena. 15Ha Saule a bona hore Davida oa atleha, a mo tšaba le ho feta. 16Empa Baiseraele bohle le ba morabe oa Juda, ba ne ba rata Davida, hobane o ne a futuha, a be a khutle a ntse a ba eteletse pele.
Davida o nyala morali oa Saule
17Saule a re ho Davida: “Merabe, morali oa ka oa matsibolo, ke enoa, ke u nea eena hore e be mosali oa hao. Feela uena u be mohlabani oa ka ea sebete, u loane lintoa tsa Morena.” Ka pelong ea hae Saule o ne a re: “A se ke a bolaoa ke 'na, a mpe a bolaoe ke Bafilesita.”
18Empa Davida a re ho Saule: “'Na ke mang? Hona lelōko la ka, kapa lelapa leso, ke eng moo naheng ea Iseraele, hoo nka bang mokhoenyana oa khosi?” 19Eare ha Merabe, morali oa Saule, a tšoanela ho neoa Davida, eaba o neoa Adariele oa Mehola, hore e be mosali oa hae.
20Joale Mikale, morali oa Saule, o ne a rata Davida. Batho ba bolella Saule, 'me hoo ha mo thabisa. 21Saule a re: “Ke tla mo nea Mikale, hore e tle e be leraba ho eena, Bafilesita ba tle ba 'molaee.” Saule a re ho Davida: “Kajeno lena, u tla ba mokhoenyana oa ka, ka baka la morali oa ka oa bobeli.”
22Saule a laela bahlanka ba hae, a re: “Buang le Davida ka lekunutu, le re: ‘Bona mona, khosi ea u rata, le bahlanka ba eona bohle baa u rata; ka baka leo, e-ba mokhoenyana oa khosi.’ ”
23Bahlanka ba khosi ba tsebisa Davida litaba tsena. Eaba Davida o re: “Le bona e le ntho e ka etsahalang, ea hore ke be mokhoenyana oa khosi, empa ke le mofutsana ea sa hlompheheng?”
24Bahlanka ba Saule ba 'molella, ba re: “Davida o buile tjena le tjena.”
25Eaba Saule o re: “Le tle le bolelle Davida tjena: ‘Khosi ha e batle bohali, e ipatlela feela maekō a lekholo a Bafilesita, hore khosi e iphetetse ho lira tsa eona.’ ” Saule o ne a hopola hore hoo ho tla etsa hore Davida a bolaoe ke Bafilesita.
26Bahlanka ba khosi ba tsebisa Davida litaba tsena, 'me Davida a thabela hore e tle e be mokhoenyana oa khosi. Pele ho letsatsi la lenyalo, 27Davida a tsoha, a tsamaea le banna ba hae, a bolaea Bafilesita ba makholo a mabeli. Davida a tlisa maekō a Bafilesita, a a nea khosi, palo ea 'ona a feletse, hore e tle e be mokhoenyana oa khosi. Joale Saule a mo nea Mikale, morali oa hae, hore e be mosali oa hae.
28Ha Saule a bona, a bile a tseba, hore Morena o na le Davida, le hore morali oa hae Mikale o rata Davida, 29a 'na a eketsa ho tšaba Davida. Ka matsatsi 'ohle a ho phela ha hae, Saule a hloea Davida.
30Mahosana a Bafilesita a futuha, empa kamehla ha a ne a futuha, Davida o ne a a hlōla ho feta balaoli bohle ba Saule, 'me lebitso la hae la tuma haholo.
