Baporofeta ba khothaletsa Akabe ho futuha
1Ka lilemo tse tharo khotso ea e-ba teng pakeng tsa Arame le Iseraele. 2Ka selemo sa boraro Jehoshafate, khosi ea Juda, a theohela ho khosi ea Iseraele. 3Khosi ea Iseraele ea re ho bahlanka ba eona: “Na lea tseba hore Rama e Gileade ke ea rōna, empa re khutsitse, ha re e amohe khosi ea Arame?”
4Eaba o re ho Jehoshafate: “Na u tla ea le 'na, re futuhele Rama e Gileade?”
Jehoshafate a re ho khosi ea Iseraele: “Rōna le uena re ntho e le 'ngoe. Sechaba sa ka ke sechaba sa hao; lipere tsa ka ke lipere tsa hao.”
5Jehoshafate a boela a re ho khosi ea Iseraele: “Kea u kōpa: Ak'u botse Morena pele.”
6Khosi ea Iseraele ea khōbōkanya baporofeta ba ka bang makholo a mane, ea re ho bona: “Na nka futuhela Rama e Gileade kapa che?”
Ba re: “Futuha, hobane Morena o tla neelana ka eona matsohong a khosi.”
7Empa Jehoshafate a re: “Na ekaba moo ha ho sa na moporofeta e mong oa Morena, eo re ka 'motsang?”
8Khosi ea Iseraele ea araba Jehoshafate, ea re: “Ho sa na le monna e mong hape, eo re ka reng a re botsetse ho Morena. Ke 'Mikiea, mora oa Jimela, empa ke mo hloile, hobane ha a ke a mporofetela tse molemo, o mporofetela tse mpe.”
Jehoshafate a re: “Khosi e se ke ea bua joalo.”
9Joale khosi ea Iseraele ea bitsa e mong oa matona, ea re ho eena: “Potlaka u mpitsetse 'Mikiea, mora oa Jimela!”
10Khosi ea Iseraele le Jehoshafate, khosi ea Juda, ba ne ba apere liaparo tsa bona tsa bokhosi, ba lutse literoneng tsa bona, seotlong se kantle ho khoro ea motse oa Samaria, 'me baporofeta bohle ba porofeta ba le kapele ho bona. 11Sedekiea, mora oa Kenaneea, o ne a iketselitse linaka tsa tšepe, 'me a re: “Morena o bua tjena: ‘Ka linaka tsena u tla sututsa Baarame, ho fihlela u ba timetsa.’ ”
12Baporofeta bohle ba porofeta joalo, ba re: “Futuhela Rama e Gileade 'me o tla atleha, hobane Morena o tla neelana ka eona matsohong a khosi.”
'Mikiea o porofeta ho hlōloa ha Akabe
13Morōmuoa ea neng a il'o bitsa 'Mikiea a bua ho eena, a re: “Ak'u bone, baporofeta bana ba ntsoeleng, ha ba bolella khosi taba tse molemo. Le uena ak'u bue joaloka bona, u bolele tse molemo.”
14Empa 'Mikiea a re: “Ka Morena ea phelang, ke tla bua feela tseo Morena a mpolellang tsona!”
15Ha 'Mikiea a fihla ho khosi, khosi ea re ho eena: “'Mikiea, na re ka futuhela Rama e Gileade, kapa che?”
'Mikiea a mo araba, a re: “E futuheleng, 'me le tla atleha, hobane Morena o tla neelana ka eona matsohang a khosi.”
16Empa khosi ea re ho eena: “Eka khona ke u laele hakae hore u se mpolelle letho, hae se 'nete feela, ka lebitso la Morena?”
17'Mikiea a re:
“Ke bona Baiseraele bohle
ba qhalakane holim'a lithaba,
joaloka linku tse se nang molisa,
'me Morena o re:
‘Bana ha ba na mong'a bona:
Motho ka mong
a ipoelle ha hae ka khotso.’ ”
18Eaba khosi ea Iseraele e re ho Jehoshafate: “Na ha kea ka ka u bolella hore a ke ke a mporofetela tse molemo, haese tse mpe feela?”
19'Mikiea a tsoela pele, a re: “Ka baka leo he, utloa lentsoe la Morena: Ke bone Morena a lutse teroneng ea hae, 'me mabōtho 'ohle a leholimo a eme pel'a hae, ka letsohong la hae le letona le ka ho le letšehali. 20Morena a botsa, a re: ‘Ke mang ea tla qhekanyetsa Akabe hore a futuhe, a tle a e'o bolaeloa Rama e Gileade?’ E mong a bua tjena, e mong a bua tjena.
21“Joale moea o mong o thetsang oa tsoa har'a lebōtho la Morena, oa bua, oa re: ‘Ke 'na ea tla mo qhekanyetsa!’
22“Morena a re ho oona: ‘Joang?’
“Oa araba, oa re: ‘Ke tla ea, ke rute baporofeta bohle ba hae ho bua leshano.’
“Morena a re: ‘U tla mo qhekanyetsa, u be u atlehe. Tsamaea, u e'o etsa joalo!’
23“Ka baka leo he, ak'u bone kamoo Morena a entseng hore baporofeta bana ba hao bohle ba bue leshano! Empa Morena eena o se a boletse koluoa e tla u oela holimo.”
24Joale Sedekiea, mora oa Kenaneea a atamela ho 'Mikiea, a mo oahlela lerameng mona, a re: “Moea oa Morena o ile oa tsoa joang ka ho 'na, ho ea bua le uena?”
25'Mikiea a re: “Mohla u kenang ka kamoreng e kahare ho ea ipata, ke mohla u tla tseba.”
26Khosi ea Iseraele ea re: “Tšoarang 'Mikiea, le mo khutlisetse ho Amona, 'musi oa motse ona, le ho khosana Jōoashe, mora oa khosi, 27le re: ‘Khosi e bua tjena: Hlahlelang monna enoa chankaneng, le mo sotle ka ho mo phelisa ka bohobe le ka metsi feela ho fihlela ke khutla ka khotso.’ ”
28'Mikiea a re: “Haeba u ka khutla ka khotso, etlaba hase Morena ea buileng ka molomo oa ka.” Eaba o re: “Ebe le utloile, lōna bohle!”
Lefu la Akabe
29Khosi ea Iseraele le Jehoshafate khosi ea Juda ba nyoloha, ba futuhela Rama e Gileade. 30Khosi ea Iseraele ea re ho Jehoshafate: “Ke tla ikhakanya, ke itahlele ntoeng, empa uena u apare liaparo tsa hao tsa bokhosi.” Khosi ea Iseraele ea ea ntoeng e ikhakantse.
31Khosi ea Arame ea laela balaoli ba eona ba likariki tsa ntoa ba mashome a mararo a metso e 'meli, ea re: “Le se ke la loantša motho ofe kapa ofe, haese khosi ea Iseraele feela.”
32Ha balaoli ba likariki tsa ntoa ba bona Jehoshafate ba re: “Ruri enoa ke eena khosi ea Iseraele!” Ba mo seohela. Jehoshafate a hlaba mokhosi, 33'me eare ha balaoli ba likariki tsa ntoa ba hlokomela hore hase eena khosi ea Iseraele, ba khaotsa ho mo phalalisa.
34Mohlabani e mong a betsa motsu oa hae feela, a sa o lebisa ho motho, 'me ka lehlohonolo a hlaba khosi ea Iseraele moo seaparo sa ntoa se kopanang teng. Eaba khosi e re ho moqhobi oa kariki ea ntoa: “Sokōlla kariki ea hao, u 'ntše har'a lebōtho, hobane ke tsoile kotsi.” 35Mohlang oo ntoa ea 'na ea eketsa ho befa. Khosi ea Iseraele, e ntse e talimile ka ho Baarame, ea ema e tšehelitsoe ka kariking ea eona ea ntoa, 'me ka phirimana ea e-shoa. Mali a tsoang leqebeng la khosi a phalla, a ba a etsa letša ka kariking ea eona ea ntoa. 36Ha letsatsi le likela, ha phatlalatsoa har'a mabōtho, ha thoe: “Monna ka mong a khutlele motseng oa habo, monna ka mong a khutlele naheng ea habo.”
37Khosi ea e-shoa joalo. Setōpō sa eona sa isoa Samaria, 'me sa epeloa teng. 38Ba ea hlatsoa kariki ea khosi letšaneng la Samaria, lintja tsa qapha mali a eona, le liotsoa tsa tolla letšaneng leo, ho ea ka polelo eo Morena a neng a e bolele.
39Liketso tse ling tsa Akabe, le tsohle tseo a ileng a li etsa, le tsa ntlo eo a ileng a e haha ka manaka a tlou, le tsa metse eohle eo a ileng a e haha, li ngotsoe Bukeng ea Liketsahalo tsa Likhosi tsa Iseraele. 40Akabe a shoa, a ikela ho bo-ntat'ae. Akasiea, mora oa hae, a mo hlahlama.
Puso ea Jehoshafate, khosi ea Juda
41Ka selemo sa bone sa puso ea Akabe, khosi ea Iseraele, Jehoshafate, mora oa Asa, a qala ho busa naha ea Juda. 42Jehoshafate o ne a e-na le lilemo tse mashome a mararo a metso e mehlano ha a qala ho busa. A busa ka lilemo tse mashome a mabeli a metso e mehlano a le Jerusalema. Lebitso la 'm'ae e ne a le Asuba, morali oa Shilehi. 43A tsamaea mehlaleng ea ntat'ae Asa, a se ke a e kheloha. A khahlisa Morena. Leha ho le joalo, libaka tseo ho rapelloang melimo ea bohata ho tsona, ha lia ka tsa felisoa. Sechaba sa 'na sa etsetsa linyehelo, le ho chesetsa mokubetso ho tsona. 44Jehoshafate a phelisana ka khotso le khosi ea Iseraele.
45Liketso tse ling tsa Jehoshafate, le tsa bonatla ba hae, le tsa lintoa tseo a ileng a li loana, tsena tsohle li ngotsoe Bukeng ea Liketsahalo tsa Likhosi tsa Juda. 46Banna ba neng ba khethetsoe ho etsetsa bohlola ka libakeng tseo ho rapelloang melimo ea bohata ho tsona, ba neng ba sale mehleng ea ntat'ae, a ba hleka kahar'a naha. 47Ho ne ho se khosi Edomo, ho busa motšoareli.
48Khosi Jehoshafate a haha likepe tsa khoebo hore li tle li e'o lata khauta Ofire, empa tsa se ke tsa finyella, hobane li ile tsa pshatloa ke lifefo Esione-Gebere. 49Eaba Akasiea, mora oa Akabe, o re ho Jehoshafate: “E-re bahlanka ba ka ba tsamaee le bahlanka ba hao ka likepe.” Empa Jehoshafate a hana.
50Jehoshafate a shoa, a epeloa le bo-ntat'ae Motseng oa Davida, ntat'ae-moholo. Mora oa hae, Jehorame, a mo hlahlama.
Puso ea Akasiea, khosi ea Iseraele
51Ka selemo sa leshome le metso e supileng sa puso ea Jehoshafate, khosi ea Juda, Akasiea, mora oa Akabe, a qala ho busa naha ea Iseraele, a le Samaria. O ile a busa naha ea Iseraele ka lilemo tse peli. 52A etsa bobe mahlong a Morena. A tsamaea mehlaleng ea ntat'ae le ea 'm'ae, le ea Jeroboame, mora oa Nebate, ea ileng a etsa hore Baiseraele ba siteloe Morena. 53A sebeletsa Baale, 'me a mo khumamela, a halefisa Morena Molimo oa Iseraele, joalokaha ntat'ae a ile a etsa.
