Tšimo ea Nabote ea morara
1Hoba tsena li fete, ha etsahala tsena: Nabote oa Mojesereele o ne a e-na le tšimo ea morara Jesereele, e le haufi le ntlo ea bokhosi ea Akabe, khosi ea Samaria. 2Akabe a re ho Nabote: “Kaha tšimo ea hao ea morara e le kaufi le ntlo ea ka, mphe eona, ke tle ke leme meroho ho eona. Ke tla u nea e mobu o motle ho feta eo; kapa haeba u rata, ke tla e reka ka chelete e e lokelang.”
3Empa Nabote a re ho Akabe: “Morena a mpe a nthuse, ke se ke ka u nea lefa la bo-ntate.”
4Akabe a khutlela lapeng ha hae, pelo ea hae e tetebetse, a hloname, ka lebaka la puo eo Nabote oa Mojesereele a e buileng ho eena, hobane o ne a ile a re: “Nke ke ka u nea lefa la bo-ntate.” A ea paqama betheng ea hae, a shebile leboteng, a ikhurumetsa, a hana le ho ja.
5Empa mosali oa hae, Jesabele, a kena kamoo a leng kateng, a re ho eena: “Ke ka baka la'ng u hlonameng hakaale, u hanang le ho ja?”
6Akabe a re ho eena: “Ke hobane ke ile ka bua le Nabote oa Mojesereele, ka re ho eena: ‘Nthekisetse tšimo ea hao ka chelete; kapa haeba u rata, ke tla u nea tšimo e 'ngoe ea morara bakeng sa eona.’ Eena a nkaraba, a re: ‘Nke ke ka u nea tšimo ea ka ea morara.’ ”
7Jesabele, mosali oa hae, a re ho eena: “Na hase uena ea busang naha ea Iseraele? Tsoha, u je, u nyakalle. Ke tla u nea tšimo eo ea morara ea Nabote oa Mojesereele.”
8Eaba Jesabele o ngola mangolo lebitsong la Akabe, a ba a a hatisa ka letšoao la hae. Mangolo ana a a rōmela ho baholo le mahosana a ahileng le Nabote motseng oo oa habo.
9Mangolong ao o ne a ngotse, a itse: “Phatlalatsang tsatsi la ho itima lijo, 'me har'a sechaba sohle Nabote a beoe setulong se ka sehloohong. 10Malebane le eena le bee banna ba babeli, ba khopo, ba tle ba mo qose, ba re: ‘Uena, Nabote, u ile ua nyefola Molimo le khosi!’ Joale lōna le mo hulanyetse kantle ho motse, le mo tlepetse ka majoe a be a shoe.”
11Banna ba motse oo oa habo Nabote, e leng baholo le mahosana, bao e neng e le baahi ba motse oo, ba phetha taelo eo Jesabele a neng a ba rōmetse eona, joalokaha e ne e ngotsoe mangolong ao a neng a ba rōmetse 'ona. 12Ba fela ba phatlalatsa letsatsi la ho itima lijo, 'me Nabote a beoa setulong se ka sehloohong har'a sechaba. 13Joale banna ba babeli, ba khopo, ba fihla ba lula kapele ho eena, ba mo qōsa kapele ho sechaba, ba re: “Nabote o ile a nyefola Molimo le khosi!” Eaba ba hulanyetsa Nabote kantle ho motse, ba mo tlepetsa ka majoe, a ba a shoa. 14Ba rōmela molaetsa ho Jesabele, ba re: “Nabote o tlepelitsoe ka majoe, o shoele!”
15Ha Jesabele a utloa hore Nabote o tlepelitsoe ka majoe, 'me o shoele, a re ho Akabe: “Tsoha, u inkele tšimo ea morara ea Nabote oa Mojesereele, eo a ileng a hana ho u rekisetsa eona ka chelete, hobane Nabote e se e le mofu.” 16Ha Akabe a utloa hore Nabote o shoele, a ema, a theohela tšimong ea morara ea Nabote oa Mojesereele, a inkela eona.
Elia o bolella Akabe kahlōlo ea hae
17Joale lentsoe la Morena la fihla ho Elia oa Tishebe, la re: 18“Ema, u theohele Samaria ho Akabe, khosi ea Iseraele. O tšimong ea morara ea Nabote, moo a theohetseng teng ho ea inkela eona. 19U tle u fihle u re ho eena: ‘Morena o bua tjena: Na u fela u bolaile Nabote, u bile u inketse tšimo ea hae?’ U boele u re ho eena: ‘Morena o bua tjena: Hona moo, moo lintja li ileng tsa qaphela mali a Nabote hona teng, le uena mali a hao li tla a qaphela hona teng.’ ”
20Akabe a re ho Elia: “Ua mphumana, uena sera sa ka!”
Elia a re: “E, ke u fumane, hobane u ineeletse ho etsa bobe moo Morena a ntseng a u bona. 21Ke tla u lihela koluoa, ke felise litlōhōlō tsa hao. Ke tla bolaea ba batona bohle ba lelapa la Akabe, naheng ea Iseraele; e ka ba makhoba kapa ba lōkōlōhileng. 22Lelapa la hao ke tla le etsa joalokaha ke ne ke etse lelapa la Jeroboame, mora oa Nebate, le joalokaha ke ne ke etse lelapa la Basha, mora oa Ahiea, hobane u mphephelitse hoo ke bileng ke u halefetseng; u entse hore Baiseraele ba siteloe Morena.”
23Morena a bua le ka Jesabele, a re: “Lintja li tla jella setōpō sa Jesabele kahar'a motse oa Jesereele. 24Mang kapa mang oa lelapa la Akabe ea shoelang motseng, o tla jeoa ke lintja, 'me ea shoelang naheng o tla jeoa ke linonyana tse fofang.”
25Ha ho le ea mong ea kileng a ineella ho etsa bobe joaloka Akabe. O ne a khothaletsoa ke Jesabele, mosali oa hae. 26A etsa manyala ka ho latela melingoana ea bohata, le ka ho etsa tsohle tse neng li etsoa ke Baamore, bao Morena a neng a ba leleke kapele ho bana ba Iseraele.
Kahlōlo ea Akabe ea thisisoa
27Eare ha Akabe a utloa mantsoe ana, a hahōla liaparo tsa hae, a apara tse mahoashe, a itima lijo, a robala a ntse a apere tse mahoashe, a tsamaea a siame.
28Lentsoe la Morena la fihla ho Elia oa Tishebe, la re: 29“Na u bona kamoo Akabe a ikokobelelitseng 'na kateng? Kahobane a ikokobelelitse 'na, koluoa ena e ke ke ea e-ba teng mehleng ea hae; ke tla e lihela holim'a lelapa la Akabe mehleng ea mora oa hae.”
