1 LIKHOSI 15

₁Ka selemo sa leshome le metso e robeli sa puso ea khosi Jeroboame, mora oa Nebate, Abiea a qala ho busa ba morabe oa Juda. ₂O ile a busa ka lilemo tse tharo Jerusalema. Lebitso la 'm'ae e ne e le Maaka, morali oa Abishalome.

₃Abiea a etsa libe tsohle tseo ntat'ae a ileng a li etsa. A se ke a tšepahala ho Morena Molimo oa hae, joalokaha ntat'ae-moholo Davida, eena a ne a tšepahala. ₄Leha ho le joalo, ka baka la Davida, Morena Molimo oa hae, o ile a mo sitsa ka mora ea tla mo hlahlama, hore Jerusalema e 'ne e tiee; ₅kahobane ka matsatsi 'ohle a bophelo ba hae, Davida o ile a etsa ho lokileng mahlong a Morena, a se ke a kheloha letho la litaelo tseo Morena a mo laetseng tsona, haese feela tabeng ea Uriea oa Mohete.

₆Ntoa ea 'na ea loana pakeng tsa Rehoboame le Jeroboame ka matsatsi 'ohle a ho phela ha bona. ₇Liketso tse ling tsa Abiea, le tsohle tseo a ileng a li etsa, li ngotsoe. Bukeng ea Liketsahalo tsa Likhosi tsa Juda. Ntoa ea 'na ea loana pakeng tsa Abiea le Jeroboame. ₈Abiea a shoa, 'me a epeloa Motseng oa Davida. Asa, mora oa hae, a mo hlahlama.

₉Ka selemo sa mashome a mabeli sa puso ea Jeroboame, khosi ea Iseraele, Asa a qala ho busa ba morabe oa Juda. ₁₀A busa a le Jerusalema ka lilemo tse mashome a mane a motso o mong. Lebitso la nkhono'ae e ne e le Maaka, setlōhōlō sa Abishalome.

₁₁Asa a etsa ho lokileng mahlong a Morena, joaloka Davida, ntat'ae-moholo. ₁₂Naheng ea hae eohle a leleka banna bohle ba khethetsoeng ho etsetsa bohlola ka libakeng tseo ho rapelloang melimo ea bohata ho tsona, a felisa melingoana eohle ea bohata, e neng e entsoe ke bo-ntat'ae. ₁₃A tlosa le nkhono'ae Maaka setulong sa bofumahali, hobane o ne a entse setšoantšo se nyonyehang sa Ashera. Asa a pshatla molimo oo oa bohata, a o chesetsa ka molatsoaneng oa Kiderone. ₁₄Empa libaka tsa borapeli tseo ho rapelloang melimo ea bohata ho tsona, a se ke a li felisa. Leha ho le joalo, bophelong bohle ba hae Asa o ne a tšepahala ho Morena. ₁₅Ka Tempeleng ea Morena a tlisa tsohle tseo eena le ntat'ae, ba neng ba li abetse Morena. E ne e le silefera, le khauta, le lintho tse ling.

₁₆Ntoa ea 'na ea loana pakeng tsa Asa le Basha, khosi ea Iseraele, ka matsatsi 'ohle a ho phela ha bona. ₁₇Basha, khosi ea Iseraele, a futuhela naha ea Juda, 'me a haheletsa motse oa Rama, hore a thibele bohle ba eang kapa ba tsoang ho Asa, khosi ea Juda.

₁₈Asa a nka silefera eohle le khauta eohle e neng e bōlōkiloe ka letlōleng la Tempele ea Morena, le ka letlōleng la ntlo ea khosi. Tsena a li rōmela ka bahlanka ba hae ho Bene-Hadade, mora oa Taberimone, setlōhōlō sa Heseone, khosi ea Arame e neng e ahile Damaseka. A re ho Bene-Hadade: ₁₉“Rōna le uena re na le selekane, joalokaha bo-ntat'a rōna ba ne ba e-na le sona. Joale ke u rōmetse mpho ea silefera le khauta; tsamaea he, u e'o senya selekane sa lōna le Basha, khosi ea Iseraele, hore a tle a ntlhokōlōhe.”

₂₀Bene-Hadade a ananela mantsoe ao a khosi Asa, a rōmela balaoli ba mabōtho a hae ho futuhela metse ea Iseraele; a ripitla motse oa Ione, le oa Dane, le oa Abele-Bete-Maaka, le naha eohle ea Kinerete, le Nafthali eohle. ₂₁Eitse ha Basha a utloela taba ena, a khaotsa ho haheletsa motse oa Rama, a ea aha Tiresa. ₂₂Khosi Asa a etsa khōoeletso e akaretsang bohle ba naheng ea Juda, hore ba thōthe majoe le lithupa tseo Basha a neng a hahelelitse Rama ka tsona; eaba ka tsona o haheletsa Geba e Benjamine, le Misepa.

₂₃Litaba tse ling tsa Asa, le bohlabani ba hae, le tsohle tseo a ileng a li etsa, le metse eo a e hahileng, tsena li ngotsoe Bukeng ea Liketsahalo tsa Likhosi tsa Juda. Leha ho le joalo, botsofaling ba hae o ile a holofala maoto. ₂₄Asa a shoa, 'me a epeloa le bo-ntat'ae Motseng oa Davida. Jehoshafate, mora oa hae, a mo hlahlama.

₂₅Ka selemo sa bobeli Asa e le khosi ea Juda, Nadabe, mora oa Jeroboame, a qala ho busa sechaba sa Iseraele, 'me a se busa ka lilemo tse peli. ₂₆A etsa bobe mahlong a Morena, a tsamaea mehlaleng ea ntat'ae, a etsa sebe se kang sa ntat'ae, seo ka sona a neng a etse hore Baiseraele ba siteloe Morena.

₂₇Empa Basha, mora oa Ahiea, oa ntlo ea Isakare, a mo rera, 'me a 'molaela motseng oa Bafilesita o bitsoang Gibetone, ha bo-Nadabe le Baiseraele bohle ba ne ba etselitse motse oo thibella. ₂₈Basha a bolaea Nadabe ka selemo sa boraro sa puso ea Asa, khosi ea Juda, 'me Basha a busa sebakeng sa hae.

₂₉Hoba Basha a nke puso, a bolaea bohle ba lelapa la Jeroboame; a se ke a siea le ea mong oa lelapa leo la Jeroboame a ntse a phela, ho fihlela lelapa leo le timella ruri. Ha phethahala polelo ea Morena, eo a neng a e bolele ka mohlanka oa hae Ahiea oa Shilo. ₃₀Polao ena e ile ea bakoa ke libe tseo Jeroboame a ileng a li etsa, a ba a lihela Baiseraele ho tsona; kahoo a phephetsa Morena Molimo oa Iseraele, 'me Morena a ba a mo halefela.

₃₁Litaba tse ling tsa Nadabe, le tsohle tseo a ileng a li etsa, li ngotsoe Bukeng ea Liketsahalo tsa Likhosi tsa Iseraele. ₃₂Ntoa ea 'na ea loana pakeng tsa Asa le Basha, khosi ea Iseraele, ka matsatsi 'ohle a ho phela ha bona.

₃₃Ka selemo sa boraro Asa e le khosi ea Juda, Basha, mora oa Ahiea, a qala ho busa Baiseraele bohle, a le Tiresa, 'me a busa ka lilemo tse mashome a mabeli a metso e mene. ₃₄A etsa bobe mahlong a Morena, a tsamaea mehlaleng ea Jeroboame, a etsa sebe se kang sa Jeroboame, seo ka sona a neng a etse hore Baiseraele ba siteloe Morena.