Lefu la mora oa Jeroboame
1Ka eona nako eo Abia, mora oa Jeroboame, a kula. 2Eaba Jeroboame o re ho mosali oa hae: “Kea u rapela: Ak'u tsamaee u ikhakantse, ho se ke ha tsejoa hore u mosali oa ka, u ee Shilo. Moporofeta Ahiea o teng hona moo, e leng eena ea neng a mpolelle hore ke tla ba khosi ea sechaba sena. 3U nke linkhoa tse leshome, le mangangajane a morara, le lekuka le tšetseng mahe a linotši, u ee ho eena. O tla u bolella se tla hlahela ngoana.”
4Mosali oa Jeroboame a fela a etsa joalo, a tsamaea, a ea Shilo, a fihla tlung ea Ahiea. Ahiea o ne a se a foufetse ka baka la boqheku. 5Morena a re ho Ahiea: “Hela, mosali oa Jeroboame oa tla. Mora oa hae oa kula, 'me o tlil'o lisetsa. U tle u bue tjena le tjena ho eena, hobane o tla fihla ho uena a ikhakantse, eka ke mosali e mong.”
6Ha fela ha e-ba joalo. Ha Ahiea a utloa liqi tsa mosali ha a atamela monyako, eaba o re: “Kena, uena mohats'a Jeroboame! Ke ka baka la'ng ha u ikhakantse tjee, hore eke u mosali e mong? Ke na le litaba tse bohlōkō, tseo ke tšoanetseng ho u tsebisa tsona. 7Tsamaea, u e'o bolella Jeroboame, u re: ‘Morena Molimo oa Iseraele, o re: Ke u phahamisitse har'a sechaba, 'me ka u etsa khosi ea sechaba sa ka sa Iseraele. 8Ka amoha lelapa la Davida 'muso, ka u nea oona, empa ha ua ka ua tšoana le Davida, mohlanka oa ka, ea ileng a bōlōka melao ea ka, a ntatela ka pelo ea hae eohle, 'me a etsa feela se lokileng mahlong a ka. 9U entse bokhopo ho feta batho bohle ba bileng teng pele ho uena. U iketselitse melimo e meng ea litšoantšo tse bōpiloeng, hore u nkhalefise, 'me joale u mphuraletse.
10“ ‘Ka baka leo, ntlo ea Jeroboame ke tla e lihela koluoa. Ke tla bolaea bohle ba batona ba lelapa la Jeroboame; e ka ba makhoba kapa ba lōkōlōhileng. Ke tla timetsa masalla a lelapa la Jeroboame, joalokaha motho a besa khapane, e ba e re lore! 11E mong le e mong oa ba lelapa la Jeroboame ea shoelang motseng, o tla jeoa ke lintja, 'me e mong le e mong ea shoelang naheng, o tla jeoa ke linonyana tse fofang,’ hobane ho buile Morena.
12“Tsamaea he, u boele ha hao. Etlare ha u kena motseng ngoana eo a shoe. 13Baiseraele bohle ba tla mo llela, ba mo epele. Ke eena feela oa lelapa la Jeroboame ea tla epeloa, hobane ke eena feela oa lelapa la Jeroboame eo Morena a fumanang ho hong ho lokileng ho eena.
14“Ho feta mona, Morena o tla ikhethela khosi e tla busa Baiseraele, e tla timetsa lelapa la Jeroboame hona mohlang oo. E seng kajeno; hona joale! 15Morena o tla tsukutla Baiseraele joaloka lehlaka ha le tsukutloa ke metsi. Morena o tla phahla bana ba Iseraele naheng ena e ntle, eo a e neileng bo-ntat'a bona, a ba qhalanyetse naheng e kamose ho nōka, hobane ba ile ba iketsetsa litšoantšo tsa Ashera, 'me ba halefisa Morena. 16Morena o tla lahla bana ba Iseraele ka baka la libe tseo Jeroboame a li entseng, le tseo a entseng hore bana ba Iseraele ba li etse.”
17Eaba mosali oa Jeroboame oa ema, oa tsamaea, o fihla Tiresa. Ha a qala a fihla mathuleng a ntlo, ke ha ngoana a e-shoa. 18Baiseraele bohle ba mo epela, ba mo llela joalokaha Morena a ne a boletse ka molomo oa mohlanka oa hae, moporofeta Ahiea.
Lefu la Jeroboame
19Litaba tse ling tsa Jeroboame, tsa kamoo a ileng a hlabana kateng, le kamoo a ileng a busa kateng, li ngotsoe Bukeng ea Liketsahalo tsa Likhosi tsa Iseraele. 20Jeroboame o ile a busa ka lilemo tse mashome a mabeli a metso e 'meli, a nt'o shoa. Nadabe, mora oa hae, a mo hlahlama.
Rehoboame, khosi ea Juda
(2 Lik. 11:5 – 12:15)
21Rehoboame, mora oa Solomone, a busa Juda. O ne a e-na le lilemo tse mashome a mane a motso o mong ha a qala ho busa. O ile a busa ka lilemo tse leshome le metso e supileng a le Jerusalema, e leng motse oo Morena a neng a ikhethele oona har'a merabe eohle ea Iseraele, hore o tla ba teng ho oona. Lebitso la 'm'ae e ne e le Naama oa Moamone.
22Ba morabe oa Juda ba siteloa Morena. Ba halefisa Morena ka libe tseo ba ileng ba li etsa, e leng tse fetang tsohle tseo bo-ntat'a bona ba ileng ba li etsa. 23Holim'a maralla 'ohle a phahameng, le katlas'a lifate tsohle tse talana, ba ikhahela libaka tsa borapeli, ba iketsetsa lifika tseo ba li khumamelang, le litšoantšo tsa Ashera. 24Naheng eo eohle ho ne ho e-na le banna ba neng ba khethetsoe ho etsetsa bohlola ka libakeng tseo ho rapelloang melimo ea bohata ho tsona. Ba etsa manyala 'ohle a neng a etsoa ke lichaba tseo Morena a ileng a li leleka kapele ho bana ba Iseraele.
25Ka selemo sa bohlano sa puso ea khosi Rehoboame, Shishake, khosi ea Egepeta, a futuhela Jerusalema. 26A hapa matlotlo a Tempele ea Morena, le matlotlo a ntlo ea khosi. A hapa tsohle, a hapa le lithèbè tsa khauta tse neng li entsoe ke Solomone. 27Sebakeng sa tsona khosi Rehoboame a etsa lithèbè tsa lethose, 'me a li bea taolong ea balaoli ba balebeli ba neng ba lebela monyako oa ntlo ea khosi. 28Kamehla ha khosi e ne e kena ka Tempeleng ea Morena, balebeli ba ne ba ee ba li nke, ba be ba li khutlisetse tlung ea balebeli.
29Liketso tse ling tsa Rehoboame, le tsohle tseo a ileng a li etsa, li ngotsoe Bukeng ea Liketsahalo tsa Likhosi tsa Juda. 30Ntoa ea 'na ea loana pakeng tsa Rehoboame le Jeroboame ka matsatsi 'ohle a ho phela ha bona. 31Rehoboame a shoa, 'me a epeloa le bo-ntat'ae Motseng oa Davida. Lebitso la 'm'ae e ne e le Naama oa Moamone. Abiea, mora oa hae, a mo hlahlama.
