1 BAKORINTHE 8

₁Joale ke kena tabeng ea tse hlabetsoeng melimo ea bohata. Ke 'nete hore rōna re na le tsebo tabeng ena. Tsebo eo e ee e bake boikhōhōmōso, empa lerato lea hōlisa. ₂Haeba motho a lekanya hore o na le tsebo, ha a e-s'o ka a tseba ho ea kamoo a tšoanetseng ho tseba kateng. ₃Empa haeba ho e-na le ea ratang Molimo, eena o tsejoa ke eena.

₄Ha ho le joalo, tabeng ea ho ja tse hlabetsoeng melimo ea bohata, rea tseba hore molimo oa bohata hase ntho e teng ho hang, le hore Molimo o mong feela. ₅Leha bahedene ba bitsa tse ling tse leholimong kapa lefatšeng melimo, joalokaha ba e-na le melimo e mengata le marena a mangata, ₆rōna re na le Molimo a le mong e leng Ntate. Ke eena eo lintho tsohle li tsoang ho eena, eo re mo phelelang. Hape re na le Morena a le mong, e leng Jesu Kreste. Ke eena eo lintho tsohle li entsoeng ka eena, eo re phelang ka eena.

₇Empa hase bohle ba nang le tsebo ena. Ba bang, ka baka la ho tloaela melimo ea bohata, le kajeno-ea-bokajeno ba ntse ba e-ja tse hlabetsoeng melimo ena, ka ho lumela hore ke lijo tsa mahlabelo. Ka ho tšaba ha matsoalo a bona, ba ikutloa ba silafetse; ₈athe lijo hase ntho e ka re atametsang ho Molimo. Ha re sa li je, re ke ke ra lahleheloa ke letho; leha re ka li ja, re ke ke ra fumana letho.

₉Leha ho le joalo, le hlokomele esere bolokolohi ba lōna ba lihela ba tumelo e fokolang sebeng. ₁₀Ha ea tumelo e fokolang a bona uena, ea nang le tsebo, u le lijong ka tempeleng ea molimo oa bohata, na hoo ho ke ke ha mo khothaletsa ho ja tse hlabetsoeng melimo ea bohata na? ₁₁Ka tsela ena ngoan'eno ea fokolang eo Kreste a mo shoetseng, o tla timela ka baka la tsebo eo ea hao. ₁₂Ka ho siteloa bana babo lōna joalo, le bolaea matsoalo a ba fokolang, le siteloa Kreste. ₁₃Ka baka leo, haeba lijo li lihela ngoan'eso sebeng, nke ke ka ja nama le ka mohla, hore ke se ke ka lihela ngoan'eso sebeng.