1 BAKORINTHE 15

₁Joale, bana beso, ke le hopotsa molaetsa o molemo oo ke le boleletseng oona, oo le o amohetseng, oo le tiileng ho oona, ₂oo le tla pholosoa ka oona, ha le o bōlōka kamoo ke le boleletseng oona kateng; ho seng joalo tumelo ea lōna ke ea lefeela.

₃Pele ho tsohle, ke le neile seo 'na ke se amohetseng, e leng hore Kreste o shoele ka baka la libe tsa rōna, ho ea kamoo Mangolo a bolelang kateng, ₄le hore o ile a patoa, a ba a tsoha bafung ka tsatsi la boraro. ₅O ile a iponahatsa ho Kefase, hamorao ho ba leshome le metso e 'meli. ₆Kamorao ho moo a iponahatsa ka nako e le 'ngoe ho balumeli ba fetang makholo a mahlano, bao ba bangata ba bona ba ntseng ba phela le kajeno, leha ba bang ba bona ba se ba shoele. ₇A nt'o iponahatsa ho Jakobo, kamorao ho moo ho baapostola kaofela. ₈Qetellong, kamorao ho bohle, a iponahatsa ho 'na, ea joaloka sefolotsana.

₉Ho baapostola ke 'na e monyenyane, ho bile hoa rōneha hore ke bitsoe moapostola, hobane ke ile ka hlorisa kereke ea Molimo. ₁₀Empa ke ka mohau oa Molimo ke leng seo ke leng sona, 'me mohau oa Molimo ho 'na ha oa ka oa fetoha lefeela. Ke sebelitse ho feta baapostola bohle, le hoja e se ka bonna, e le ka mohau oa Molimo o ho 'na. ₁₁Joale leha e le 'na kapa bona, re ruta joalo, le lōna le lumela joalo.

₁₂Erekaha molaetsa oa rōna o bolela hore Kreste o tsohile bafung, ba bang ba lōna ba ka bolela joang hore tsōho ea bafu ha e eo? ₁₃Haeba tsōho ea bafu ha e eo, le Kreste ha a ea tsoha bafung, ₁₄'me haeba Kreste ha a ea tsoha bafung, thuto ea rōna le tumelo ea lōna ke lefeela. ₁₅Ho feta moo, haeba ke 'nete hore ha ba tsohe, re pakela Molimo ka leshano, hobane re re o tsositse Kreste bafung, empa a sa mo tsosa. ₁₆Haeba bafu ba sa tsohe, le eena Kreste ha a ea tsoha. ₁₇Joale haeba Kreste ha a ea tsoha bafung, tumelo ea lōna ke lefeela, le sa ntsane le le libeng tsa lōna. ₁₈Le ba shoetseng ho Kreste e tla ba ba timetse. ₁₉Haeba Kreste re mo tšepetse bophelo bona feela, re malimabe ho feta batho bohle.

₂₀Empa Kreste o fela a tsohile bafung, 'me ke eena letsibolo la ba shoeleng. ₂₁Erekaha lefu le hlahile ka motho, le tsōho ea bafu e hlaha ka motho. ₂₂Joalokaha bohle ba e-shoa ka baka la Adama, bohle ba tla boela ba phela ka baka la Kreste. ₂₃E mong le e mong o tla tsoha ka nako ea hae: Kreste ke letsibolo, e nt'o ba bao e tla be e le ba Kreste, mohla a khutlang. ₂₄Kamorao ho moo e tla ba bofelo, mohla Kreste a busetsang borena ho Molimo Ntat'ae, hoba a felise mebuso eohle, le borena bohle, le matla 'ohle, ₂₅hobane eka khona Kreste a buse ho fihlela Molimo a bea lira tsohle tsa hae katlas'a maoto a hae. ₂₆Lefu ke sera sa ho qetela se tla felisoa. ₂₇Mangolo a re: “Tsohle Molimo o li beile katlas'a maoto a hae.” Feela ha ho thoe “tsohle” ho pepenene hore ha ho balelloe le Molimo, e leng eena ea beileng tsohle katlas'a Kreste. ₂₈Empa etlare ha tsohle li se li beiloe katlas'a Kreste, Mora le eena o tla ba katlas'a Molimo, ea beileng tsohle katlas'a hae, hore Molimo a tle a buse tsohle, hohle.

₂₉Haeba ho sa be joalo, ba kolobetsoang bakeng sa bafu ba tla fumana eng? Haeba ho hang bafu ha ba na ho tsoha, ke ka baka la'ng ha ba kolobetsoa bakeng sa bafu? ₃₀Rōna ke ka baka la'ng re leng kotsing ka nako tsohle? ₃₁Bana beso, ke tjametsoe ke lefu ka matsatsi 'ohle! Ke bolela hona ke ithorisa ka lōna ho Jesu Kreste Morena oa rōna. ₃₂Haeba ke loanne e mahlo-mafubelu mona Efese ka mabaka a botho feela, ke ruile'ng ka hoo? Haeba bafu ba sa tsohe,

₃₄Hlaphoheloang, 'me le se ke la 'na la etsa sebe. Ba bang ha ba tsebe Molimo; ke rialo hore le hlajoe ke lihlong.

₃₅Empa e mong o tla re: “Bafu ba tla tsoha joang? Ka 'mele o joang?” ₃₆Sethoto tooe! Seo u se jalang se ke ke sa mela, ha se sa shoe pele. ₃₇Ha u jala, ha u jale semela, empa u jala tlhaku feela, ea koro kapa ea mofuta o mong. ₃₈Ka eona Molimo o melisa semela, kamoo a ratang kateng, ho ea ka mefuta e fapaneng ea litlhaku. ₃₉Mefuta ea nama ha e tšoane; ho na le nama ea batho, le ea liphoofolo, le ea linonyana, le ea litlhapi. ₄₀Ho na le libōpuoa tsa leholimo le tsa lefatše, empa khanya ea tsa leholimo ha e tšoane le khanya ea tsa lefatše. ₄₁Ho na le khanya ea letsatsi, le ea khoeli, le ea linaleli, empa le khanya ea linaleli ha e tšoane.

₄₂Le tsōho ea bafu e joalo. 'Mele o jaloa e le o bolang, o tla tsoha e le o sa boleng. ₄₃O jaloa e le o eisehang, o tla tsoha e le o tlōtlehang. O jaloa e le o fokolang, o tla tsoha e le o matla. ₄₄O jaloa e le oa nama, o tla tsoha e le oa moea.

Ha e le mona 'mele o le teng oo e leng oa nama feela, le oona oa moea o teng, ₄₅hobane Mangolo a re: “Motho oa pele, Adama, ea e-ba sebōpuoa se phelang;” Adama oa mehla ea bofelo ke eena moea o phelisang. ₄₆Se bileng teng pele hase sa moea, ke sa nama; ha nt'o hlaha sa moea. ₄₇Motho oa pele o tsoa mobung, ke oa lefatše; motho oa bobeli eena o tsoa leholimong. ₄₈Bao e leng ba lefatše ba tšoana le oa lefatše, athe bao e leng ba leholimo ba tšoana le oa leholimo. ₄₉Joalokaha re futsitse oa lefatše, eka khona re futse le oa leholimo.

₅₀Bana beso, joale ke re ho lōna: Nama le mali li ke ke tsa e-ja lefa la 'Muso oa Molimo, le se bolang se ke ke sa e-ja lefa la se sa boleng. ₅₁Mamelang, ke le bolelle sephiri: Ha re na ho shoa kaofela, empa kaofela re tla fetoha, ₅₂hang-hang, ka ho panya ha ntši, ha ho lla terompeta ea mehla ea bofelo, hobane terompeta e tla lla, bafu ba tla tsoha ba se ke ba bola, 'me rōna re tla fetoha. ₅₃Eka khona se bolang sena se apare ho se bole, le se shoang sena se apare ho se shoe. ₅₄Ha se bolang sena se se se apere ho se bole, 'me se shoang sena se se se apere ho se shoe, ke moo ho tla phethahala polelo ea Mangolo, e reng:

₅₈Ka baka leo, bana beso ba ratehang, le tiee, le se ke la thekesela, le 'ne le sebeletse Morena ka mesebetsi e mengata-ngata kamehla, le ntse le tseba hore mofufutso oa lōna hase oa lefeela pel'a Morena.