1 BAKORINTHE 12

₁Bana beso, tabeng ea lineo tsa Moea ke rata ha le ka ba le tsebo. ₂Lea tseba hore ha le ne le sa le bahedene le ne le latela melimo ea bohata, e semumu, ho ea kamoo e neng e le hohela kateng. ₃Ke ka baka leo, ke le tsebisang hore ha ho motho ea nang le Moea o Halalelang ea ka reng: “Jesu o rōhakehile;” ebile ha ho motho ea ka reng: “Jesu ke Morena,” ha a se na Moea o Halalelang.

₄Ho na le lineo tse fapaneng, empa Moea o fanang ka tsona o mong. ₅Ho na le mekhoa e fapaneng ea ho sebeletsa, empa Morena ea sebeletsoang o mong. ₆Ho na le mesebetsi e fapaneng, empa Molimo ea sebetsang tsohle ho bohle o mong.

₇E mong le e mong o amohetse nèo ea ho bonahatsa Moea hore bohle ba fumane molemo. ₈Moea o nea e mong ho bua ka bohlale, athe oona Moea oo o nea e mong ho bua ka tsebo. ₉Moea o nea e mong tumelo, athe oona Moea oo o nea e mong nèo ea ho folisa. ₁₀Moea o nea e mong matla a ho etsa mehlolo, e mong ho porofeta, e mong ho khetholla meea; Moea o nea e mong nèo ea ho bua ka maleme asele, athe e mong o mo nea ho a hlalosa. ₁₁Tsena tsohle li etsoa ke oona Moea oo o le mong feela, 'me o abela e mong le e mong kamoo o ratang kateng.

₁₂Joalokaha 'mele o le mong o e-na le litho tse ngata, 'me litho tsohle tsa 'mele, leha li le ngata, e le tsa 'mele o le mong, le eena Kreste o joalo. ₁₃Bohle re kolobelelitsoe ho ba 'mele o le mong, ka Moea o le mong; leha re ka ba Bajuda kapa Bagerike, makhoba kapa balokolohi, re amohetse Moea o le mong.

₁₄Efela 'mele hase setho se le seng, empa ke litho tse ngata. ₁₅Haeba leoto le ka re: “Erekaha ke se letsoho, ha ke karolo ea 'mele,” ho rialo ho ke ke ha etsa hore le khaotse ho ba karolo ea 'mele. ₁₆Haeba tsebe e ka re: “Erekaha ke se leihlo, ha ke karolo ea 'mele,” ho rialo ho ke ke ha etsa hore le khaotse ho ba karolo ea 'mele. ₁₇Haeba 'mele oohle e ne e le leihlo, ho ne ho tla utluoa ka'ng? Haeba 'mele oohle e ne e le tsebe, ho ne ho tla fōfoneloa ka'ng? ₁₈Empa Molimo o hlophile litho tsa 'mele, se seng le se seng, kamoo a ratang kateng. ₁₉Haeba litho tsohle e ne e le setho se le seng, 'mele o ka be o le kae? ₂₀Joale litho li ngata, empa 'mele o mong.

₂₁Leihlo le ke ke la re ho letsoho: “Ha ke u hloke;” le hlooho e ke ke ea re ho maoto: “Ha ke le hloke.” ₂₂Esita le litho tsa 'mele tseo e kang li fokola haholo, ke tsa bohlokoa. ₂₃Litho tsa 'mele tseo re hopolang hore ha li hlomphehe haholo, re li hlompha ho feta; litho tsa rōna tseo re leng lihlong ka tsona, re li apesa ka hlompho e fetisisang; ₂₄e leng seo litho tsa rōna tseo re seng lihlong ka tsona li sa se hlokeng. Empa Molimo o bōpile 'mele, a nea litho tse eisehang hlompho e fetisisang, ₂₅e le hore ho se be toantšano 'meleng, litho li hlokomelane. ₂₆Haeba setho se seng se utloa bohlōkō, litho tse ling tsohle li utloa bohlōkō le sona; kapa ha se seng se rorisoa, tse ling tsohle li thaba le sona.

₂₇Lōna le 'mele oa Kreste. E mong le e mong oa lōna ke setho sa oona. ₂₈Bao Molimo a ba beileng kerekeng ke bana: ba pele ke baapostola, ba bobeli ke baporofeta, ba boraro ke baruti; ho nt'o latela ba etsang mehlolo, le ba lineo tsa ho folisa kapa ho thusa ba bang, kapa ho busa, kapa ho bua ka maleme asele. ₂₉Na bohle ke baapostola? Kapa bohle ke baporofeta? Kapa bohle ke baruti? Kapa bohle ke ba etsang mehlolo? ₃₀Na bohle ba na le nèo ea ho folisa? Kapa bohle ke ba buang ka maleme asele? Kapa bohle ke ba hlalosang maleme ao? ₃₁Labalabelang linèo tsa bohlokoa.

Joale ke tla le bontša tsela e ntle ka ho fetisisa.