1 BAKORINTHE 1

₁'Na Paulosi, ea bitselitsoeng ho ba moapostola oa Jesu Kreste ka thato ea Molimo, le Sosethenese, ngoan'abo rōna, ₂re lumelisa kereke ea Molimo e Korinthe, e leng batho ba halalelitsoeng ho Kreste Jesu, ba bitselitsoeng hore e be bahalaleli, 'moho le bohle ba rapelang Morena oa rōna Jesu Kreste kae kapa kae, eena eo e leng Morena oa rōna le oa bona, re re: ₃Mohau le khotso ea Molimo Ntat'a rōna le ea Morena Jesu Kreste li ke li be le lōna.

₄Kamehla ke leboha Molimo oa ka, ka baka la mohau oa hae, oo le o filoeng ka Kreste Jesu, ₅hobane ka eena le ruisitsoe ka mekhoa eohle, lipolelong tsohle le tsebong eohle. ₆Kamoo bopaki bo pakang Kreste bo seng bo tiisitsoe kateng ka ho lōna, ₇ha le sa haelloa ke nèo efe kapa efe, ha le ntse le lebeletse hore Morena oa rōna Jesu Kreste a bonahatsoe. ₈Eena o tla 'ne a le tiise ho isa qetellong, le tle le se ke la nyatsoa Letsatsing la ho tla ha Morena oa rōna Jesu Kreste. ₉Molimo ea le bitselitseng ho ba le kabelo bophelong ba Mora oa hae, Jesu Kreste, Morena oa rōna, oa tšepahala.

₁₀Bana beso, ka lebitso la Morena oa rōna Jesu Kreste ke ipiletsa ho lōna hore bohle le be ntsoeleng, likarohano li be sieo har'a lōna, le mpe le utloane, le be le maikutlo a le mang le khopolo e le 'ngoe. ₁₁Bana beso, ke fela ke ile ka tsebisoa ka lōna ke ba ha Kolōoe hore lea tsekisana. ₁₂Seo ke se bolelang ke hore e mong oa lōna o re: “'Na ke oa Paulosi,” e mong: “'Na ke oa Apolosi,” e mong: “'Na ke oa Kefase,” e mong hape: “'Na ke oa Kreste.”

₁₃Na Kreste o arotsoe likoto na? Na Paulosi o thakhiselitsoe lōna na? Kapa le kolobelitsoe ka lebitso la Paulosi na? ₁₄Ke leboha Molimo ha e le mona ke sa kolobetsa le ea mong oa lōna, haese Kerisepose le Gaiose. ₁₅Ka tsela ena, ha ho ea ka reng o kolobelitsoe ka lebitso la ka. ₁₆Hape ke bile ke kolobelitse ba lelapa la Setefanase. Ntle ho bona, ha ke hopole hore nkile ka kolobetsa e mong. ₁₇Kreste ha a ea nthōmela ho kolobetsa, empa ho bolela molaetsa o molemo, e seng ka bokheleke, esere sefapano sa Kreste sa fetoloa lefeela.

₁₈Ho bua ka sefapano ke bothoto ho ba eang timelong; athe ho rōna ba eang pholohong ke matla a Molimo, ₁₉hobane ho ngotsoe, ho thoe:

₂₀Joale mohlalefi o tla fella kae? Morutehi eena? Sengangele sa tsa lefatše sona? Ana Molimo ha a ka a bontša hore bohlale ba lefatše ke bothoto? ₂₁Erekaha lefatše, ka bohlale ba lona, le sitiloe ho tseba Molimo ka mesebetsi ea bohlale ba hae, ka hona ba lumelang, Molimo o khahliloe ke ho ba pholosa ka bothoto ba molaetsa ona oo re o phatlalatsang. ₂₂Bajuda ba ikōpela sesupo, Bagerike bona ba batla bohlale; ₂₃ha e le rōna, re phatlalatsa tsa Kreste ea thakhisitsoeng sefapanong, e leng khōpiso ho Bajuda le bothoto ho balichaba. ₂₄Empa ho ba bitsitsoeng ke Molimo, e ka ba Bajuda kapa Bagerike, Kreste eo ke matla a Molimo le bohlale ba Molimo. ₂₅Seo e kang ke bothoto ba Molimo, ke bohlale bo fetang ba motho, 'me seo e kang ke bofokoli ba Molimo, ke matla a fetang a motho.

₂₆Joale, bana beso, hopolang hore na le ne le le joang mohla Molimo a le bitsang. Ho ea ka botho feela, ho ne ho se ba bangata ba lōna ba bohlale, ba matla kapa ba mali a borena. ₂₇Empa bao e leng lithoto ho lefatše, Molimo o ba khethile ho soabisa ba bohlale. Ba fokolang ho lefatše, Molimo o ba khethile ho soabisa ba matla; ₂₈ba eisehang le ba nyelisehang ho lefatše, Molimo o ba khethile: o khethile tseo e seng letho ho felisa tse leng teng, ₂₉e le hore ho se be mang kapa mang ea ka ithorisang pel'a Molimo. ₃₀Ke ka Molimo le leng ho Kreste Jesu, eo Molimo a mo entseng bohlale ba lōna, le ho loka ha lōna, le khalalelo ea lōna, le topollo ea lōna. ₃₁Ka tsela ena, ho ea kamoo ho ngotsoeng kateng: “Ea ithorisang a ithorise ka Morena.”