1 LIKETSAHALO 5

₁Rubene ke eena letsibolo la Iseraele. Empa ka lebaka la ho silafatsa liphate tsa ntat'ae, tokelo tsa hae tsa boholo li ile tsa neoa bara ba Josefa, mora oa Iseraele; ka hona ha a eo lenaneng, ho latela tsoalo ea hae. ₂Le hoja Juda a ne a le matla ho feta bana babo, 'me 'musi a ile a hlaha lapeng la hae, litōkelo tsa boholo e ile ea e-ba tsa Josefa. ₃Bara ba Rubene, letsibolo la Iseraele, ke bana: Hanoke, le Palō, le Heserone, le Karimi. ₄Bara ba Joele ke Shemaea ea tsoetseng Gogo, Gogo ea tsoetseng Shimei. ₅Shimei eena a tsoala 'Mika, 'Mika a tsoala Reaea, Reaea a tsoala Baala, ₆Baala a tsoala Beera, eo Tigelate-Pilesere, khosi ea Asiria, a ileng amo thōpa. E ne e le eena khosana ea ba morabe oa Rubene.

₇Lenaneng la bana babo, ho ea ka malapa abo bona, ke khosana Jeiele, le Sekariea, ₈le Bela ea tsoetsoeng ke Asase, Asase ea tsoetsoeng ke Shema, Shema ea tsoetsoeng ke Joele. Naha ea bona e ne e tloha Arōoere, ho ea fihla Nebo, le Baale-Meone. ₉Ka bochabela ba aha ho tloha qetheng ea lehoatata le il'o fihla nōkeng ea Euferatese, hobane mehlape ea bona e ne e ile ea ata ha ba le Gileade.

₁₀Nakong ea puso ea Saule ba futuhela Bahagare, 'me ba ba hlōla. Eaba ba se ba kena litenteng tsa Bahagare, naheng eohle e ka bochabela ho Gileade.

₁₁Ba morabe oa Gade ba ne ba ahile naheng ea Bashane, ho ea fihla Saleka. ₁₂Moo Bashane, Joele e ne e le khosana ea bona, Shafame a mo hlahlama, e ntan'o ba Janai, le Shafate. ₁₃Bang ka bona, ho ea ka malapa abo bona, e ne e le Mikaele, le Meshulame, le Sheba, le Jorai, le Jakane, le Sia, le Ebere. Ba ne ba supile. ₁₄Bana ke bona bara ba Abihaele, mora oa Huri, ea tsoetsoeng ke Jarōoa, Jarōoa oa Gileade, Gileade oa Mikaele, Mikaele oa Jeshishai, Jeshishai oa Jahedo, Jahedo oa Buse. ₁₅Ahi, mora oa Abadiele, setlōhōlō sa Guni, e ne e le eena khosana ea malapa ana.

₁₆Ba morabe oa Gade ba ne ba ahile Gileade e Bashane, le metsaneng ea eona, le makhulong 'ohle a naha ea Sharone, ho ea fihla moo e fellang teng.

₁₇Tsena tsohle li ile tsa ngoloa lenaneng la litaba tsa bona mehleng ea ha Jotame e le khosi ea Juda, Jeroboame eena e le khosi ea Iseraele.

₁₈Ba morabe oa Rubene le ba morabe oa Gade, le halofo ea ba morabe oa Manase, ba ne ba e-na le bahale ba tsebang ho loana ka thèbè le sabole, ba tsebang le ho fula ka metsu, ba koetliselitsoeng ntoa. Palo ea bona e ne e le likete tse mashome a mane a metso e mene le makholo a supileng le mashome a tšeletseng. ₁₉Ba futuhela Bahagare, le Bajeture, le Banafishe, le Banodabe. ₂₀Ba ile ba ipiletsa ho Molimo ha ba le ntoeng, a mamela lithapelo tsa bona, hobane ba ne ba mo tšepa, 'me a neelana ka Bahagare le bathusi bohle ba bona matsohong a bona. ₂₁Ba hapa mehlape ea bona, e le likamele tse likete tse mashome a mahlano, le linku tse likete tse makholo a mabeli le mashome a mahlano, le litonki tse likete tse peli. Ba thōpa le bahlabani ba likete tse lekholo. ₂₂Ba bolaea ba bangata, hobane e ne e le Molimo ea ba loanelang. Ba aha naheng eo, ho fihlela ha ba thōpuoa.

₂₃Halofo ea sechaba sa ba morabe oa Manase e ne e atile haholo, kahoo ea aha naheng eo, ho tloha Bashane ho ea fihla Baale-Heremone, le Senire, le thabeng ea Heremone.

₂₄Lihlooho tsa malapa abo bona ke tsena: Efere, le Ishi, le Eleele, le Asariele, le Jeremia, le Hodafiea, le Jahediele. E ne le bahale ba tumileng, e bile e le lihlooho tsa malapa abo bona.

₂₅Empa ba siteloa Molimo oa bo-ntat'a bona, ba khumamela melimo ea lichaba tsa naha eo, tseo Molimo a ileng a li felisa kapele ho bona. ₂₆Ka baka leo, Molimo oa Iseraele a hlohleletsa Pule, khosi ea Asiria, e leng Tigelate-Pilesere, hore a thōpe ba morabe oa Rubene, le ba morabe oa Gade, le halofo ea sechaba sa ba morabe oa Manase, a ba ise Hala, le Habore, le Hara, le nōkeng ea Gosane, moo ba ntseng ba ahile teng le kajeno-ea-bokajeno.