1Joale Davida a re: “Ena ke eona ntlo ea Morena Molimo, 'me ena ke aletare ea nyehelo ea secheso, moo Baiseraele ba tla sebeletsa Morena teng.”
Boitokisetso ba ho haha Tempele
2Davida a laela hore ho phuthoe balichaba ba neng ba le kahar'a naha ea Iseraele, 'me a khetha libetli tsa majoe a tla haha Tempele ea Molimo. 3A bōkella le tšepe e ngata, e tla etsa lipekere tsa mamati a menyako, le tsa manonyeletso a 'ona, le lethose le lengata hoo le neng le ke ke la lekanngoa. 4A fana le ka lifate tsa kedare tse se nang palo, hobane Basidone le Batire ba ne ba ile ba mo tlisetsa lifate tse ngata tsa kedare.
5Davida a re: “Solomone, mora oa ka, o sa le monyenyane, oa tètèma, 'me Tempele e lokelang ho haheloa Morena e tšoanela ho ba ntle haholo, e tume, e tlōtloe ke linaha tsohle. Ha ho le joalo, ke tla qalella ho etsa litokiso tsa hore e tle e hahoe.” Kahoo, eare Davida a e-s'o ka a e-shoa, a etsa litokiso tse kholo.
6Joale Davida a bitsa Solomone, mora oa hae, 'me a mo laela ho hahela Morena Molimo oa Iseraele, Tempele. 7Davida a re ho Solomone: “Mor'a ka, ke ne ke rerile ho hahela Morena Molimo oa ka, Tempele. 8Empa polelo ea Morena e ile ea fihla ho 'na, ea re: ‘U tšolotse mali a mangata, u loanne lintoa tse kholo. Ka baka lena, u ke ke ua nkhahela Tempele, hobane u tšolotse mali a mangata pontšeng ea ka. 9Bona, u tla tsoala mora, eo e tla ba motho oa khotso. O tla phela ka khotso le lira tsa hae tsohle, tse mo pota-potileng. Lebitso la hae e tla ba Solomone, 'me mehleng ea puso ea hae Baiseraele ba tla phela ka khotso le ka khutso. 10Ke eena ea tla nkhahela Tempele. E tla ba mora oa ka, 'na ke be ntat'ae, 'me ke tla tsitsisa terone ea hae naheng ena ea Iseraele kamehla.’
11“Joale he, mor'a ka, Morena a ke a be le uena, a u atlehise, u tle u tsebe ho hahela Morena Molimo oa hao, Tempele, joalokaha a itse u tla etsa. 12Morena a ke a u fe bohlale le kutloisiso, a etse hore u buse Baiseraele, u tle u tsebe ho bōlōka molao oa Morena Molimo oa hao. 13Ha u ka ela hloko ho phethahatsa litaelo le melao eo Morena a e laetseng Moshe malebana le Baiseraele, u tla atleha. E-ba monna, u be sebete; u se ke ua tšaba leha e le ho tsieleha.
14“Ke se ke ikhathalitse haholo, ke bōkeletse khauta e boima ba lithane tse ka bang likete tse tharo le mashome a mane bakeng sa Tempele ea Morena, le silefera e boima ba lithane tse ka bang likete tse mashome a mararo a metso e mene, le lethose, le tšepe, e leng lintho tse ke keng tsa lekanngoa ka baka la bongata ba tsona. Ke se ke bōkeletse le lifate le majoe. Lintho tsena u ka 'na ua li eketsa. 15Etsoe u na le basebetsi ba bangata: ba thuang majoe, le ba a betlang, le ba betlang mapolanka, le mefuta eohle ea litsebi tsa mesebetsi eohle. 16Bongata ba khauta, le silefera, le lethose, le tšepe, ke bo ke keng ba baloa. U eme ka maoto, u sebetse, 'me Morena a ke a be le uena.”
17Davida o ne a ile a laela mahosana 'ohle a Baiseraele hore a thuse mora oa hae, Solomone, 'me a re ho 'ona: 18“Ha ke re Morena Molimo oa lōna, o na le lōna? Ha ke re o le neile khotso kahohle? O neelane ka baahi ba naha ena matsohong a ka, 'me naha ena e busoa ke Morena le sechaba sa hae. 19Ka baka leo, ineeleng ho Morena Molimo oa lōna, ka lipelo tsa lōna, le ka meea ea lona. Emang ke hona, le hahe Sehalalelo sa Morena Molimo, e le hore areka ea selekane sa Morena, le lintho tse halalelang tsa Molimo, li tle li tlisoe ka Tempeleng e tla haheloa Morena.”
