Mokgwa oo Tite e ka kgonang a kgothatse ba hodileng, le basadi, le banna ba batjha, le bahlanka; a ba etsetse mehlala.
1Haele wena, o bolele tse lokelang thuto ya pholoho.
2Bolella banna ba hodileng hore ba tshabe botahwa, ba tshabe le ho saoha, ba be le kelello, ba loke tumelong, le leratong le mamellong.
3Le bona basadi ba hodileng ba be le motsamao o lokelang kgalalelo, e se ke ya eba basebi, ba se ke ba ineela veine e ngata, ba rute tse ntle, 4ba tle ba hlalefise ba batjha, ba ba rute ho rata banna ba bona, le ho rata bana, 5ho phela ka kelello, le ho hlweka, le ho itulela mahae a bona; e be basadi ba molemo, ba utlwang banna ba bona, hore lentswe la Modimo le se ke la nyefolwa.
6Banna ba batjha le bona o ba kgothatse, hore ba phele ka kelello. 7Wena ka sebele, o ba etsetse mehlala ya mesebetsi e metle nthong tsohle, ka thuto e hlwekileng le ka ho tshaba ho saoha. 8Puo ya hao e be e pholosang, e se nang ho nyatseha, hore ya re hanyetsang a tle a swabe ke ho hloka ntho e mpe eo a ka re beang yona.
9Bolella bahlanka hore ba no utlwa beng ba bona, ba ba kgahlise nthong tsohle, ba se ke ba ba fetola, 10ba se ke ba utswa letho, empa ba etse hohle ka botshepehi bo botle, ba tle ba hlophise thuto ya Modimo, Mmoloki wa rona, nthong tsohle.
Mohau wa Modimo o bonahetse; — tse rutwang ke wona; — tseo e ka kgonang Tite a rute ka tsona.
11Hobane mohau wa Modimo, o ka bolokang batho bohle, o bonahetse; 12o ntse o re ruta ho tela ho se tshabe Modimo le ditakatso tsa lefatshe, re tle re phele nakong ya jwale ka kelello, ka ho loka, le ka borapedi; 13re ntse re lebeletse tshepo e lehlohonolo, le ho hlaha ha kganya ya Modimo o moholo, Jesu Kreste, Mmoloki wa rona; 14ya iteletseng rona, a tle a re lopolle bokgopong bohle, mme a re hlatswe, a tle a iketsetse ka rona setjhaba seo e leng sa hae ka sebele, se tjhesehelang mesebetsi e metle.
15Bolela taba tseo, mme o kgothatse, o kgalemele ka matla wohle; ho se ke ha eba motho ya o nyedisang.
