PESALEME YA 98

₁Binelang Jehova sefela se setjha, hobane o entse dintho tse mehlolo; seatla sa hae se setona le letsoho la hae le halalelang di hlotse dira tsa hae. ₂Jehova o bonahaditse poloko ya hae, o pepesitse ho loka ha hae mahlong a ditjhaba. ₃O hopotse mohau wa hae le botshepehi ba hae bakeng sa ntlo ya Iseraele; dipheletso tsohle tsa lefatshe di bone poloko ya Modimo wa rona.

₄Lona, mafatshe kaofela, phahamisetsang ho Jehova mehoo ya thabo ya lona! Tshelang ditlatse tsa lona, le mo binele difela tsa nyakallo! ₅Rorisang Jehova ka harepa, ka harepa le ka mantswe a dipina! ₆Ka moletso wa diterompeta le wa diphala, tshelang ditlatse tsa thabo ya lona pela Morena, pela Jehova!

₇Lewatle a le dume le tsohle tse ho lona, lefatshe le ba ahileng ho lona. ₈Dinoka a di ke di ope ka diatla, le dithaba di ntshe mehoo ya thabo pela Jehova, hobane o ya tla ho ahlola lefatshe. ₉O tla ahlola lefatshe ka ho loka, le ditjhaba ka nnete ya hae.