PESALEME YA 84

₁Meaho ya hao e rateha hakakang, wena, Jehova wa makgotla! ₂Moya wa ka o a idibana, o sisetsa mabala a ntlo ya Jehova; pelo le nama ya ka di howeletsa ho Modimo o phelang! ₃Esita le serobele se na le sehlaha, le lefokotsane le na le ntlo, moo le beang madinyane a lona teng ... Oho! dialetare tsa hao, Jehova wa makgotla, Morena wa ka, le Modimo wa ka! ₄Ho lehlohonolo ba ahileng tlung ya hao! Ba ya nne ba o rorise kamehla. (Sela.)

₅Ho lehlohonolo batho bao o leng matla a bona, bao pelo tsa bona di ratang ditsela tsa hao! ₆Ha ba ntse ba haola ka kgohlo ya Baka, ba e fetola kgohlo ya didiba, mme pula ya hwetla e e apesa ka nala. ₇Ha ba ntse ba tsamaya, ba ekeletswa matla, ho fihlela ba itlhahisa pela Modimo Sione. ₈Jehova, Modimo wa makgotla, mamela thapelo ya ka! Sekeha tsebe, Modimo wa Jakobo! (Sela.)

₉Oho Modimo, thebe ya rona, tadima, o bone sefahleho sa motlotsuwa wa hao. ₁₀Hobane tsatsi le le leng le dulwang mabaleng a ntlo ya hao, le fetisa matsatsi a mang a sekete a dulwang hosele. Ho dula mathuleng a ntlo ya Modimo wa ka ke a ho rata ho fetisa ho dula ditenteng tsa bakgopo. ₁₁Hobane Jehova Modimo ke letsatsi le thebe. Jehova o nea mohau le kganya, ba tsamayang ka ho loka a ke ke a ba hanela le molemo leha o le mong. ₁₂Jehova wa makgotla, ho lehlohonolo motho ya o tshepang!