PESALEME YA 78

₁Oho setjhaba sa ka, mamela thuto ya ka. Sekehela mantswe a molomo wa ka ditsebe. ₂Ke ahlamisa molomo wa ka ho hlahisa dipolelo tsa dikelello le ho bolela dithuto tsa kgale. ₃Seo re se utlwileng, seo re se tsebileng, seo bontata rona ba re boleletseng sona, re ke ke ra se patela bana ba bona; ₄re tla phetela ditloholo tsa rona dithoko tsa Jehova, le matla a hae, le mehlolo e entsweng ke yena.

₅O beetse Jakobo bopaki, o beile molao Iseraeleng, oo a laetseng bontata rona hore ba o tsebise bana ba bona, ₆e le hore o tsejwe ke moloko o hlahlamang, e leng bana ba tlang ho tswalwa, ₇hore le bona ba o bolelle bana ba bona, ba ke ba itshepele Modimo, ba se ke ba lebala diketso tsa Modimo, mme ba boloke ditaelo tsa wona; ₈ba se ke ba etsisa bontata bona, bao e bileng moloko o ikgantshang, o hanyetsang, moloko o sa kang wa tsamaya ka pelo e tiileng, oo moya wa wona o sa kang wa tshepeha ho Modimo.

₉Bana ba Efraime ba hlometseng, ba tshwereng diqha, ba ile ba baleha tsatsing la ntwa; ₁₀ha ba ka ba boloka selekane sa Modimo, ba hana ho tsamaya ka molao wa wona; ₁₁ba lebala ketso tsa wona tse phahameng le meeka ya wona, eo o ba bontshitseng yona.

₁₂O entse meeka mahlong a bontata bona naheng ya Egepeta, dithoteng tsa Tsowane. ₁₃Wa phatlola lewatle, wa ba tshedisa lona, wa emisa metsi jwaloka qubu; ₁₄motshehare wa ba tsamaisa ka leru, le bosiu bohle ka kgabo ya mollo. ₁₅Wa patsola mafika lefeelleng, wa ba nosa teng jwaloka hola ba enwa madibeng a maholo, ₁₆wa ntsha dinokana lefikeng, wa phallisa metsi ka diphororo.

₁₇Leha ho le jwalo, ba nna ba o sitelwa, ba nna ba kwenehela Mookamedi ya phahameng, lefeelleng. ₁₈Ba leka Modimo dipelong tsa bona, ka ho kopa ho fepuwa kamoo ba lakatsang kateng; ba seba Modimo, ba re: ₁₉Na Modimo o ka tseba ho re tekela tafole lefeelleng na? ₂₀O fedile wa otla lefika, mme metsi a phorosetsa, dinoka tsa phalla; hleka o ka re fa le bohobe, le ho otla setjhaba sa wona ka dinama na?

₂₁Yanayare Jehova ha a utlwa dipolelo tseo, a halefa, mollo wa tukela Jakobo, bohale ba phahamela Iseraele, ₂₂hobane ba sa ka ba dumela ho Modimo, ba sa ka ba tshepa thuso ya wona. ₂₃Leha ho le jwalo, wa laela maru hodimo, wa bula menyako ya mahodimo; ₂₄wa ba nesetsa manna ho ba fepa, wa ba fa mabele a lehodimo; ₂₅ba eja e mong le e mong bohobe ba dinatla; wa ba romela dijo, ba kgora.

₂₆Wa fokisa moya wa botjhabela sebakeng, ka matla a wona wa tlisa moya wa borwa, ₂₇wa ba nesetsa nama e ka ka lerole, le dinonyana tse mapheo tse kale ke lahlabathe la mawatle, ₂₈wa di wesetsa dipakeng tsa ditente tsa bona, ka nqa tsohle ho meaho ya bona. ₂₉Yaba ba ja, ba kgora hampe; wa ba romela seo ba neng ba se lakaditse. ₃₀Yare ba eso ho kgodisise takatso ya bona, nama ha e sa le molomong wa bona, bohale ba Modimo ba ba tukela, ₃₁wa hlahisetsa banna ba matla polao, wa rapalatsa bahlankana ba Iseraele fatshe.

₃₂Leha ho le jwalo, ba boela ba sitwa, ba se ke ba dumela meeka ya wona. ₃₃Wa fedisa matsatsi a bona hang, le dilemo tsa bona ka tshenyeho e phakisisang. ₃₄Enereha o ba bolaya, yaba hona ba o batlang, ba kgutlang, ba batla Modimo, ₃₅ba elellwa hoba Modimo ke lefika la bona, le hoba Modimo, Mookamedi ya phahameng, ke Molopolli wa bona.

₃₆Empa melomo ya bona ya nna ya o thetsa, maleme a bona a bua leshano ho wona, ₃₇pelo tsa bona ha di a ka tsa o kgomarela ho tiya, mme ha ba ka ba tiisetsa selekaneng sa wona. ₃₈Lerekong la wona wa tshwarela bokgopo ba bona, ha o a ka wa ba timetsa; wa itshwara kgalefong hangata; ha o a ka wa nea bohale bohle ba wona sebaka, ₃₉wa hopola hobane ke batho feela, ka phefumoloho e ikelang, e sa hloleng e boya.

₄₀Ba o kwenehela hangata hakakang lefeelleng! ba nna ba o kgathatsa hakakang nahathothe! ₄₁Ba boela ba leka Modimo, ba halefisa Mohalaledi wa Iseraele. ₄₂Ha ba ka ba hlola ba hopola letsoho la wona leha e le letsatsi leo o ba lopolotseng direng ka lona, ₄₃mohla o etsang mehlolo fatsheng la Egepeta, le dimakatso naheng ya Tsowane.

₄₄Wa fetola dinoka tsa bona madi, ba ba ba sitwa ho nwa metsi a melatswana ya tsona. ₄₅Wa ba romela menwang e neng e ba qeta, le dihohwana tse neng di ba tshwenya. ₄₆Ka diboko wa fedisa masimo a bona, le ka tsie ditholwana tsa tshebetso ya bona. ₄₇Wa bolaya merara ya bona ka sefako, le difate tsa bona tsa sikomora ka lebabo. ₄₈Wa otla makgomo a bona ka sefako, le mehlape ya bona ka letolo le tjhesang. ₄₉Wa ba betsa ka mollo wa bohale ba wona, ka kgalefo, tsheno, matswalo, ka lekgotla la mangeloi a bohale. ₅₀Wa nna wa nea kgalefo ya wona sebaka, ha o a ka wa qenehela meya ya bona; empa ka lefu la sewa wa timetsa bophelo ba bona. ₅₁Wa otla matsibolo kaofela naheng ya Egepeta, sehlooho sa bonna ba bona ditenteng tsa Kama.

₅₂Wa ntsha setjhaba sa wona jwaloka dinku, wa ba tsamaisa lefeelleng jwaloka mohlape. ₅₃Wa ba qhoba hamonate, ba sa tshohe letho, mme lewatle la kwahela dira tsa bona. ₅₄Wa ba fihlisa naheng ya wona e kgethehileng, thabeng e neng e hapuwe ke letsoho la wona le letona; ₅₅wa lelekisa matjhaba pela bona, wa ba arolela lefa la bona ka thapo, mme wa kenya meloko ya Iseraele ditenteng tsa yona.

₅₆Empa ba leka Modimo, ba ikgantshetsa Mookamedi ya phahameng, ha ba ka ba boloka ditaelo tsa wona; ₅₇ba fetoha bakwenehi le ba mano jwaloka bontata bona, ba eba jwaloka seqha se thetsang; ₅₈ba baka bohale ba wona ka dinqalo tsa bona tse diphahameng, le poulelo ya wona ka ditshwantsho tsa medimo ya bona.

₅₉Modimo ha o bona hoo, wa halefa haholo, wa tenwa hampe ke Iseraele. ₆₀Yaba o tlohela tabernakele ya Silo, tente eo o neng o dutse ho yona hara batho, ₆₁wa lesa kganya ya wona ya iswa kgolehong, le bokgabane ba wona ba wela matsohong a dira; ₆₂setjhaba sa wona wa se neela lerumo, wa halefela lefa la wona. ₆₃Wa fedisa bahlankana ba bona ka mollo, mme barwetsana ba bona ha ba ka ba etsetswa mekete ya manyalo. ₆₄Baprista ba bona ba dihuwa ke lerumo, mme bahlolohadi ba bona ha ba ka ba lla.

₆₅Yaba Morena o phaphama jwaloka motho ya robetseng, jwaloka mohale ya hoiswang ke veine, ₆₆a suthisa dira tsa hae, a ba jarisa dihlong tse sa feleng. ₆₇Leha ho le jwalo, a lahla tente ya Josefa, mme ha a ka a kgetha leloko la Efraime; ₆₈empa a kgetha leloko la Juda le thaba ya Sione eo a e ratang. ₆₉A tiisa sehalalelo sa hae jwaloka dithaba, jwaloka lefatshe leo a le theetseng mehla e sa feleng.

₇₀A kgetha Davida, mohlanka wa hae, a mo nka merakeng ya dinku; ₇₁a mo tlosa dinkung tsa ditswetse, e tle e be modisa wa Jakobo, setjhaba sa hae, le wa Iseraele, lefa la hae. ₇₂Mme Davida a ba moalosi wa bona ka pelo e hlwekileng, a ba tsamaisa ka letsoho le hlalefileng.