PESALEME YA 76

₁Modimo o tsejwa Juda, lebitso la wona le leholo hara Iseraele; ₂tabernakele ya wona e Saleme, moaho wa wona o Sione. ₃Ke moo o robileng metsu e hadimang, le dithebe, le marumo, le dibetsa tsa ntwa. (Sela.)

₄O fetisa dithaba tsa mashodu ka kganya le ka bokgabane! ₅Bahale ba matla ba hlotswe, ba ithobaletse boroko ba bona; bahale ha ba ka ba tseba ho lwana ka matsoho a bona. ₆Ka tshokelo ya hao, Modimo wa Jakobo, makoloi hammoho le dipere tsa tshwarwa ke boroko bo boholo.

₇Wena, o a tshabeha. Ke mang ya ka emang pela hao, ha o qala ho halefa? ₈O boletse tsuo o le mahodimong; lefatshe la tshoha, la ba la kgutsa, ₉ha Modimo o tsoha ho ahlolela le ho boloka bahlomohi bohle ba lefatshe. (Sela.)

₁₀Kgalefo ya motho e tla o fetohela thoriso; ka kgalefo e setseng ho wena o tla itlama letheka. ₁₁Ikaneng ho Jehova, Modimo wa lona, le ntoo mo lefela; ditjhaba tsohle tse kamathoko di ke di tlise dinyehelo ho Modimo o tshabehang. ₁₂O rapalatsa boikgohomoso ba mahosana, a tshabeha ho marena a lefatshe.