PESALEME YA 21

₁Jehova, matla a hao a thabisa morena, poloko ya hao e a mo nyakalatsa! ₂O mo file kamoo pelo ya hae e lakaditseng kateng, ha o a ka wa nyatsa thapelo ya molomo wa hae. (Sela.) ₃O mo rakile ka mahlohonolo a molemo, o mo rwesitse moqhaka wa kgauta e tshekehileng hloohong. ₄A nna a o kopa bophelo, mme wa mo fa jona, e le bophelo bo bolelele, bo tiileng, bo sa feleng. ₅Kganya ya hae e kgolo ka baka la thuso ya hao, o mo file bokgabane le boholo; ₆hobane o mo entse ya lehlohonolo ka ho sa feleng, wa mo nyakalatsa ka sefahleho sa hao. ₇Hobane morena o itshepetse Jehova; ka kgauhelo ya Mookamedi ya phahameng, a ke ke a sisinyeha.

₈Letsoho la hao le tla tshwara dira tsa hao kaofela; letsoho le letona la hao le tla fihlela ba o hloileng. ₉O tla ba etsa ba be jwaloka sebopi se tukileng, tsatsing leo o hlahang ka lona; Jehova o tla ba fedisa ka kgalefo ya hae, mme ba tla tjheswa ke mollo; ₁₀o tla fedisa moloko wa bona lefatsheng, le ditloholo tsa bona hara bana ba batho; ₁₁hobane ba o etseditse bolotsana, ba lohile mano, empa ba tla hloka matla; ₁₂o tla ba balehisa ka ho lebisa seqha sa hao difahlehong tsa bona.

₁₃Tsoha, Jehova, ka matla a hao! Re rata ho bina le ho rorisa diketso tsa hao tse phahameng.