PESALEME YA 147

₁Rorisang Jehova, hobane ho hotle ho roka Modimo wa rona; e, ke ntho e monate; thoko e a mo tshwanela. ₂Jehova o tsosa Jerusalema, o bokella balelekwa ba Iseraele. ₃O fodisa ba pelo di hlabehileng, o tlamella maqeba a bona. ₄O lekanya palo ya dinaledi, o di rea mabitso kaofela. ₅Morena wa rona o moholo, matla a hae a maholo ka ho fetisisa; kutlwisiso ya hae ha e na ho lekanngwa. ₆Jehova o tsosa ba ikokobetsang, o kokobetsa ba babe ho isa fatshe.

₇Binelang Jehova diteboho, le roke Modimo wa rona ka harepa! ₈O thiba lehodimo ka maru, o lokisa pula ho na lefatsheng; o medisa jwang dithabeng; ₉o fa diphoofolo dijo tsa tsona, o fepa madinyane a makgwaba a llang. ₁₀Ha a re letho ka matla a pere, ha a kgahliswe ke maoto a motho. ₁₁Jehova o kgahliswa ke ba mo tshabang, ba itshepelang mohau wa hae.

₁₂Jerusalema, rorisa Jehova! Sione, o roke Modimo wa hao! ₁₃Hobane o tiisa mekwallo ya menyako ya hao, o hlohonolofatsa bara ba hao kahare ho wena. ₁₄O bea kgotso meeding ya hao, o o kgorisa ka moko wa koro. ₁₅O romela lefatshe taelo ya hae, lentswe la hae le tjhatjhametsa kapelepele. ₁₆O nesa lehlwa, le lesweu jwaloka boya ba nku; o hasa serame fatshe jwaloka molora; ₁₇o diha sefako sa hae se thata; ke mang ya ka tsebang ho ema pela dirame tsa hae? ₁₈O romela lentswe la hae, a di qhibidihise; o fokisa moya wa hae, metsi a phorosetse. ₁₉O senoletse Jakobo lentswe la hae, o neile Iseraele melao ya hae le dikahlolo tsa hae. ₂₀Ha a ka a etsa jwalo bakeng sa ditjhaba tse ding kaofela, mme ha di tsebe dikahlolo tsa hae. Bokang Jehova!