PESALEME YA 144

₁Ho bokwe Jehova, lefika la ka, ya rutang matsoho a ka ntwa, le menwana ya ka hlabano; ₂ke thuso ya ka, le qhobosheane ya ka, tora ya ka e phahameng, le monamoledi wa ka, thebe ya ka, le palehelo ya ka; ke yena ya kokobetsang setjhaba sa katlasa ka. ₃Jehova, motho keng, ha o tla mo tseba, le ngwana motho, ha o tla mo hlokomela? ₄Motho o tshwana le pudulo, mme matsatsi a hae a ka leswiti le fetang.

₅Jehova, sekamisa mahodimo a hao, o theohe; o ame dithaba, di kubelle! ₆Tjhatjhamedisa mahadima, o ba qhalanye; o phose metsu ya hao, o ba timetse! ₇Nanabetsa matsoho a hao, o dutse phahameng, o ntopolle, o nnyolle metsing a maholo, o nntshe letsohong la bana ba baditjhaba, ₈bao molomo wa bona o bolelang lefeela, bao tsoho le letona la bona e leng letsoho la thetso.

₉Oho Modimo, ke rata ho o binela sefela se setjha, ke rata ho o rorisa ka thomo ya dikgole tse leshome, ₁₀wena ya neang marena poloko, wena ya namoletseng mohlanka wa hao, Davida lerumong le bolayang. ₁₁O ntopolle, o nntshe letsohong la bana ba baditjhaba, bao molomo wa bona o bolelang lefeela, bao letsoho le letona la bona e leng letsoho la thetso.

₁₂Ekare ha bara ba rona ba hola botjheng ba bona jwaloka dimela, mme baradi ba rona ba le jwaloka ditshiya tse dintlha tse kgabisitsweng ka mokgwa wa matlo a borena; ₁₃mediko ya rona ha e tletse dijo tsa mefuta yohle; makgomo a rona ha a atile ka dikete, a fula metebong ya rona ka mashome a dikete; ₁₄marole a rona ha a tswala, mme dikgeo, le ho patelwa, le mekgosi mapatlelong a rona di le siyo: ₁₅ho lehlohonolo setjhaba seo ho leng jwalo ho sona! Ho lehlohonolo setjhaba seo Jehova e leng Modimo wa sona!