Ho roriswa Modimo wa Iseraele, oo e leng Modimo wa medimo.
1Bokang Jehova.
Rorisang lebitso la Jehova; mo roriseng, lona, bahlanka ba Jehova, 2ba emang ka tlung ya Jehova, mabaleng a ntlo ya Modimo wa rona! 3Rorisang Jehova, hobane Jehova o molemo; le roke lebitso la hae, hobane ke ntho e ratehang. 4Hobane Jehova o ikgethetse Jakobo, Iseraele a be lefa la hae.
5Hobane ke tseba hoba Jehova o moholo, Morena wa rona o moholo haholo ho fetisa medimo yohle; 6seo a se ratang kaofela Jehova o se etsa mahodimong le lefatsheng, mawatleng le madibeng kaofela. 7Ke yena ya tsosang maru dipheletsong tsa lefatshe, ya nesang dipula ka diaduma, ya ntshang meya dipolokelong tsa hae; 8ke yena ya neng a otle matsibolo a Egepeta, ho qala ka batho ho isa ho makgomo. 9Hara wena, Egepeta, o hlahisitse dipontsho le mehlolo e kileng ya lwantsha Faro le bahlanka ba hae kaofela. 10Ke yena ya timeditseng ditjhaba tse ngata, a bolaya marena a matla: 11Sihone, morena wa Baamore, le Oge, morena wa Bashane, le marena kaofela a Kanana; 12naha ya bona a e neela e be lefa, lefa la Iseraele, setjhaba sa hae.
13Jehova, lebitso la hao le hlola ka ho sa yeng kae; o hopolwa, Jehova, melokong le melokong. 14Hobane Jehova o tla ahlolela setjhaba sa hae, a utlwele bahlanka ba hae bohloko.
15Medimo ya ditjhaba ke silefera le kgauta, ke mosebetsi wa matsoho a batho. 16E na le melomo, mme ha e bue; e na le mahlo, mme ha e bone; 17e na le ditsebe, mme ha e utlwe, le ka melomo ya yona ha e phefumolohe. 18Ba e etsang ba tla tshwana le yona, hammoho le bohle ba itshepelang yona.
19Lona, ba ntlo ya Iseraele, bokang Jehova! 20Ba ntlo ya Aarone, bokang Jehova! 21Ba ntlo ya Levi, bokang Jehova! Lona ba tshabang Jehova, bokang Jehova! Jehova ya ikaheletseng Jerusalema a ke a bokwe Sione! Bokang Jehova!
