DIPROVERBIA 9

₁Bohlale bo hahile ntlo ya jona ka ditshiya tse supileng tse betlisitsweng hantle. ₂Bo hlabile dikgomo tsa jona, bo tswakile veine, bo tekile le tafole ya jona. ₃Bo romile makgabunyane a jona ho mema, le bona bo eme mahareng a motse, bo a tlerola, bo re: ₄He! ya sethoto ke mang? a fapohele kwano! ₅Le ho ba hlokang kelello bo re: Tloong, le je bohobe ba ka, le nwe le veine eo ke e tswakileng. ₆Le hlobohe bothoto, mme le tla phela, le tsamaye tseleng ya hlalefo.

₇Ya layang mosomi o ipatlela sekgobo, ya kgalemelang e mobe le yena o ya hlomphollwa. ₈O se ke wa laya mosomi, esere mohlomong a o hloya; o laye mohlalefi, yena o tla o rata. ₉Ruta ya nang le kelello, o tla eketsa ho hlalefa. O rute ya lokileng, o tla ekelletswa tsebo. ₁₀Qalo ya bohlale ke ho tshaba Jehova; ho tseba Ya halalelang ke hlalefo. ₁₁Hobane ke ka nna ditshiu tsa hao di tla atiswa, dilemo tsa ho phela ha hao di lelefatswe. ₁₂Ha o hlalefile, ke wena o tla thuswa ke hlalefo ya hao; empa ha o le mosomi, ke wena o nnotshi o tla senyehelwa.

₁₃Bowatla ke mosadi ya lerata; ha bo na pelokeletsi, ha bo na tsebo. ₁₄Bo dula pela monyako wa ntlo ya bona monamong le diphahameng tsa motse, ₁₅ho howeletsa ba fetang ka tsela, ba tsamayang ka ho loka; bo re: ₁₆Ya leebelo a fapohele kwano; mme ho sethoto bo re: ₁₇Metsi a utsuwang a monate, le bohobe bo jewang ka sephiring bo a hlabosa. ₁₈Athe eo ha a tsebe hobane ke moo bafu ba leng teng, le hoba ba lallang le bona ba mohohlong wa nqalo ya bafu.