DIPROVERBIA 7

₁Mora wa ka, boloka ditaba tsa ka, o tiise dikeletso tsa ka ka pelong ho wena. ₂O lotolotse dikeletso tsa ka, mme o tla phela; o boloke dithuto tsa ka jwaloka thaka tsa mahlo a hao. ₃O di ngomele menwaneng ya hao, o di ngole letlapeng la pelo ya hao. ₄Bolella bohlale, o re: O ngwaneso, mme masene o a bitse motswalle wa hao, ₅di tle di o fapose mosadi wa sehlola le sefebe se nyekang ka leleme la sona.

₆Ke ne ke eme sefensetereng sa ntlo ya ka, ka tadima ka dipaka tsa lehlafi la teng; ₇ka bona ho le dithoto, hara ba batjha ka lemoha mohlankana e mong ya hlokang kutlwisiso; ₈a tjhalatsa le mabala mabapa le kou ya ntlo ya mosadi eo, a nkile tsela ya teng. ₉E ne e le ka shwalane, ka phirima, bosiu bo se bo tshwere, ho le lefifi le letsho. ₁₀Mme bonang, a kgahlanyetswa ke mosadi ya ikgabisitseng ka mokgwa wa sehlola, a ikgakantse pelo; ₁₁athe o manganga, o hlooho e thata; maoto a hae ha a dule ka tlung ya hae; ₁₂mohlomong o eme mapatlelong, mohlomong mabaleng, o lalla koung tsohle. ₁₃Jwale, a mo tshwara, a mo aka; ka sefahleho se se nang dihlong a re ho yena: ₁₄Ke na le mokete wa mahlabelo a teboho hae ha ka; kajeno ke phethile dikano tsa ka. ₁₅Ke ka baka leo ke tswileng ho tla o kgahlanyetsa, ho o batla lefifing, mme jwale ke o fumane. ₁₆Ke adile diphate tsa ka ka masela a mebalabala le ka dikobo tse lohilweng ka ditshwele tsa Egepeta. ₁₇Ke noneditse diphate tsa ka ka mirra, le lekgala, le sinnamone. ₁₈Tloo, re itahe leratong ho fihlela ho esa, re thabele monate hammoho; ₁₉hobane monna wa ka ha a yo hae, o etetse hole; ₂₀o nkile mokotlana wa tjhelete, o tla boela hae ka kgwedi e tla thwasa. ₂₁A mo menamena ka dipuo tse ngata tse monate, a mo hlola ka molomo o qekisang. ₂₂Yaba mohlankana eo o mo latela ka bonolo jwaloka kgomo e buswang lekaba, leha e le kgama e tlolelang lemeneng, mme e hlajwa sebete ka teng ke lerumo; ₂₃hape, leha e le jwaloka nonyana e thwethwelang sefing, e sa tsebe hoba se tjhehetswe ho phela ha yona.

₂₄Ka baka leo, bana ba ka, mmameleng, le ele dipolelo tsa molomo wa ka hloko. ₂₅Pelo ya hao e se ke ya kgelohela tseleng ya eo, o se ke wa lahleha mmileng wa hae. ₂₆Hobane ba hlabilweng o ba dihile ba le bangata, bao a ba bolaileng ba bangata ho fetisisa. ₂₇Ntlo ya hae ke tsela ya nqalo ya bafu, e theohela madibeng a lefu.