DIPROVERBIA 25

₁E sa le tsona dipolelo tsa Salomone tse ngodilweng ke batho ba Esekiase, morena wa Juda.

₂Kganya ya Modimo ke ho bea ditaba sephiring, empa ho di batlisisa ke kganya ya marena.

₃Ho phahama ha lehodimo le ho teba ha lefatshe, le dipelo tsa marena, ha di na ho fuputswa.

₄Ha o tlosa manya silefereng, lelala le tla etsa pitsa ka yona; ₅ha o tlosa molotsana pela morena, terone ya hae e tla tiiswa ke ho loka.

₆O se ke wa ikakasa pela morena, o se ke wa dula ditulong tsa ba baholo. ₇Hobane ho ka ba hotle ha ho ka thwe ho wena: Nyolohela mona; e seng hore ba o kokobetse pela morena eo o mmonang ka mahlo.

₈O se ke wa phaka wa ya nyeweng, esere mohlomong qetellong wa kena tsietsing, ha o se o hlotswe ke wa heno.

₉Leha o tseka le wa heno, o se ke wa phunya lekunutu la e mong, ₁₀esere mohlomong ya utlwang a o nyatsa, a o apesa ka dihlong tse o kgomarelang.

₁₁Polelo e builweng ka motsotso o tshwanelehang, e jwaloka diapole tsa kgauta pitsaneng ya silefera.

₁₂Monyatsi ya hlalefileng, ditsebeng tsa motho ya utlwang, o jwaloka lesale la kgauta, le lepetu la kgauta e hlwekileng.

₁₃Lenqosa le tshepehang ho ba le romileng, le jwaloka lehlwa le tsedidi mohla kotulo, le phodisa pelo ya morena wa lona jwalo.

₁₄Ya ithorisang ka ho fana ha leshano, o jwaloka maru le moya o fokang, pula e le siyo.

₁₅Morena o hlolwa ka sebete, mme leleme le bonolo le roba masapo.

₁₆Na o fumane dinotshi? O di je ka tekano, esere mohlomong wa tenwa, mme wa di hlatsa.

₁₇O se ke wa itlwaetsa haholo lapeng le wa heno, esere mohlomong a tenwa ke wena, a ba a o hloya.

₁₈Motho ya pakang leshano ho senya wa habo, ke molamu, le lerumo, le motsu o ntjhotjho.

₁₉Molotsana eo o mo tshepileng mohla tsietsi, ke leino le robehileng le leoto le tetemang.

₂₀Ho hlobola kobo mohla ho hatsetseng, le ho tshela asene ka letobola, ke ho hlabela pelo e hlomohileng dipina tsa menyaka.

₂₁Ekare ha sera sa hao se lapile, se fe ho ja bohobe; ha se nyorilwe, o se nee metsi, se nwe; ₂₂e tla ba mashala a hlenneng ao o a bokellang hloohong ya sona, mme Jehova o tla o putsa.

₂₃Moya wa leboya o hlahisa pula, mme leleme le sebang le hlahisa sefahleho se halefileng.

₂₄Ho ikahela ntlheng ya marulelo a ntlo, ho molemo ho ena le ho dula ka tlung e kgolo le mosadi ya omanang.

₂₅Taba tse monate tse tswang naheng e hole, di jwaloka metsi a phodileng ho motho ya nyorilweng.

₂₆Sediba se dukehileng, le mohlodi o katehileng, di ka motho ya lokileng ya tetemang pela moetsadibe.

₂₇Ho kgora dinotshi tse ngata hampe ha ho monate; ho jwalo ba ipatlelang hlompho, ba imelwa ke yona.

₂₈Motho ya hlolwang ke ho busa pelo ya hae, ke motse o kenweng ke dira, o se nang lerako.