DIPROVERBIA 21

₁Pelo ya morena e letsohong la Jehova, o e lebisetsa hohle moo a ratang teng, jwaloka melatswana ya metsi.

₂Tsela tsa motho kaofela di lokile mahlong a hae, empa Jehova ke yena ya lekanyang dipelo.

₃Ho etsa ho hotle le ho lokileng ho kgahlisa Jehova, ho ena le sehlabelo.

₄Mahlo a phahameng le pelo e hohomohileng, eo e leng ho kganya ha ba babe, ke sebe.

₅Merero ya motho ya mahlahahlaha e isa kgoreng; empa ya potlakang o tla wela bofumeng.

₆Ho ipokellela maruo ka leleme le mano, ke bosawana le maraba a lefu.

₇Ho senya ha baetsadibe ho tla ba kuka, hobane ba hana ho etsa ho lokileng.

₈Motho eo tsela ya hae e leng kgopokgopo, o furallane le botle; empa diketso tsa motho ya kgabane di lokile.

₉Ho ikahela ntlheng ya marulelo ho molemo ho ena le ho dula tlung e kgolo hammoho le mosadi wa dikomang.

₁₀Moya wa ya lonya o eletsa bobe, esita le wa habo ha a fumane mohau mahlong a hae.

₁₁Ha ho lefiswa mosomi, sethoto se a hlalefa; ha ho rutwa motho ya kelello, yena o amohela tsebo.

₁₂Ya kgabane o lemoha ntlo ya e mobe; Jehova o senya ba babe ka baka la diketso tsa bona tse mpe.

₁₃Ya ithibang ditsebe hore a se ke a utlwa dillo tsa mosenyehi, o tla lla le yena, empa a ke ke a lemohuwa ke motho.

₁₄Mpho ya sephiring e kokobetsa bohale; neo e sunngwang sefubeng e fedisa hlonamo.

₁₅Ho etsa ho loka ke thabo ho ya lokileng, empa ho bakgopo ke polao.

₁₆Motho ya kgelohang tsela ya hlalefo o tla fella sebokeng sa bafu.

₁₇Ya hlanyetsang menyaka e tla ba mohloki; ya ineelang veine le mafura a ke ke a rua.

₁₈Molotsana o etswa topollo ya ya lokileng, ya kgopo o bolawa bakeng sa ya kgabane.

₁₉Ho ikahela feelleng ho molemo ho ena le ho dula le mosadi wa dikomang, ya bohale.

₂₀Letlotlo le lakatsehang le mafura di ka tlung ya ya bohlale; empa lewatla le di metsa feela.

₂₁Ya phallelang ho loka le mohau o tla fumana bophelo, le ho loka, le kganya.

₂₂Ya bohlale o tlola motse wa dinatla, o diha qhobosheane eo ba neng ba e tshepa.

₂₃Ya ipolokang molomo le leleme o tshabisa moya wa hae mahlomola.

₂₄Mosomi ke lebitso la motho ya ikgohomosang, ya mabela, ya etsang tsohle a rwetse boikgomoso.

₂₅Takatso tsa sekgoba di a se bolaya, hobane matsoho a sona a hana ho sebetsa.

₂₆Taba ya e mobe ke ho lakatsa feela tsatsi lohle, empa ya lokileng o a fana, a sa kganane.

₂₇Sehlabelo sa ba babe se manyala; haholo hakakang ha ba se hlahisa ka morero o sa lokang!

₂₈Paki ya leshano e tla timela; empa motho ya mamelang o tla bua, a be a hlole.

₂₉Motho ya bolotsana o ithatafatsa sefahleho, empa ya lokileng o sasamatsa tsela ya hae.

₃₀Ha ho bohlale, ha ho kelello, ha ho le morero o ka lwantshang Jehova.

₃₁Pere e lokisetswa letsatsi la ntwa; empa poloko ke ya Jehova.