NUMERE 4

₁Jehova a bua le Moshe le Aarone, a re: ₂A ho ke ho balwe bara ba Kehathe, ba kgethwe ha bara ba Levi, mme ba ngolwe ka matlo a bona le ka matlo a bontata bona, ₃ho qala ka ba dilemo tse mashome a mararo, ho isa ho ba dilemo tse mashome a mahlano, ke ho re, bohle ba ka etsang tshebetso ya tente ya pokano.

₄Ke ena tshebetso ya bara ba Kehathe ka tenteng ya pokano, bakeng sa ntho tse kgethehileng ka ho fetisa. ₅Etlare ha phutheho e tloha, Aarone le bara ba hae ba tla kena, ba fanyolle lesira la karohanyo; ba tla kwahela areka ya bopaki ka lona; ₆ba tla bea hodima yona sekgurumetso sa matlalo a diqibi, kahodimo ba tla ala lesela la purepera kahohle, mme ba tla kenya arekeng mejaro ya yona. ₇Hodima tafole ya mahobe a pontsha, ba tla ala lesela la purepera; ba tla bea hodima yona mekekana, le dinwelo, le merifi, le dipitsa tsa ditshelo; bohobe bo bewe hodima yona kamehla. ₈Hodima ntho tseo tsohle, ba tla ala lesela le krimsone, ba ntoo e kwahela ka sekgurumetso sa matlalo a diqibi, mme ba tla kenya ho yona mejaro ya yona. ₉Ba tla nka lesela la purepera, ba kwahele ka lona kandelare e bonesang, le dilampi tsa yona, le matlawana a yona, le dipitsana tsa yona tsa molora, le dipitsa tsohle tsa yona tsa ole, tseo ho etswang mosebetsi wa yona ka tsona; ₁₀ba tla phuthela kandelare le mesebetsi yohle ya yona sekgurumetsong sa matlalo a diqibi, mme ba tla e bea mejarong. ₁₁Hodima aletare ya kgauta, ba tla ala lesela la purepera, ba e kwahele ka sekgurumetso sa matlalo a diqibi, mme ba tla kenya mejaro ho yona. ₁₂Ba tla nka mesebetsi yohle eo ho etswang tshebetso yohle ka yona sehalalelong; ba tla e phuthela leseleng la purepera, ba e kwahele ka sekgurumetso sa matlalo a diqibi, mme ba e bee hodima mejaro. ₁₃Ba tla ola molora o aletareng, ba ale hodima yona lesela la purepera. ₁₄Kahodima yona, ba tla bea dintho tsohle tsa tshebetso ya yona, e leng dipitsa tsa dibano, le difereko, le dikgarashwana, le mehope ya dinwelo, le mesebetsi yohle ya aletare; ba tla ala kahodimo sekgurumetso sa matlalo a diqibi, ba kenye ho yona mejaro. ₁₅Etlare ha phutheho e tloha, mme Aarone le bara ba hae ba qetile ho phutha dintho tsa sehalalelo le mesebetsi yohle ya sehalalelo, bara ba Kehathe ba tla kena ho di jara. Ba se ke ba ama dintho tse kgethehileng, ba se tshohe ba eshwa. Ke eo phahlo ya bara ba Kehathe ho tsa tente ya pokano.

₁₆Eleasare, mora Aarone, moprista, o tla hlahloba ole ya kandelare, le dibano tse nkgang hamonate, le sehlabelo sa kamehla, le ole ya setlolo, a hlahlobe tabernakele yohle, le tsohle tse ka ho yona, e leng tsa sehalalelo le mesebetsi ya sona.

₁₇Jehova a bua le Moshe le Aarone, a re: ₁₈Le se ke la etsa taba e ka tlosang leloko la matlo a Bakehathe mahareng a Balevi, ₁₉le mpe le ba etsetse hona, ba tle ba phele, mme ba se ke ba eshwa, ha ba tshoba ba atamela sehalaledisiso: Aarone le bara ba hae ba ke ba kene, ba ba laele e mong le e mong mosebetsi wa hae le phahlo ya hae, ₂₀empa ba se ke ba kena ho ya bona dintho tse kgethehileng leha e le ka motsotsonyana, esere ba eshwa.

₂₁Jehova a bua le Moshe, a re: ₂₂A ho ke ho balwe bara ba Gershone, ba ngolwe ka matlo a bontata bona le ka matlo a bona. ₂₃O ba ngole ho qala ka ba dilemo tse mashome a mararo, ho isa ho ba dilemo tse mashome a mahlano, ke ho re, bohle ba ka etsang tshebetso ya tente ya pokano. ₂₄Tshebetso ya ba matlo ya Bagershone ke ena, seo ba tla se sebetsa, le seo ba tla se jara: ₂₅Ba tla jara masela a tabernakele le tente ya pokano, le sekwahelo sa yona, le sekgurumetso sa matlalo a diqibi se bewang kahodima sona, ₂₆le lesira la monyako wa tente ya pokano; le masela a lebala, le lesira la monyako wa lebala le teelang tabernakele le aletare hare, le dikgwele tsa wona, le dintho tsohle tse kenang mosebetsing wa wona; ba tla etsa mosebetsing wa wona; ba tla etsa mosebetsi wohle o tshwanelang ntho tseo. ₂₇Tshebetso yohle ya bara ba Bagershone e tla etswa ka taelo ya Aarone le bara ba hae, leha ba jara, leha ba sebetsa. Le tla e bea paballong ya bona, hore ba boloke tsohle tseo ba tlang ho di jara. ₂₈Ke yona tshebetso ya matlo a bara ba Bagershone, tenteng ya pokano, le tseo ba tlang ho di boloka, ba le taelong ya Ithamare, mora Aarone, moprista.

₂₉O tla ngola bara ba Merari, ka matlo a bona, le ka matlo a bontata bona. ₃₀O ba ngole ho qala ka ba dilemo tse mashome a mararo, ho isa ho ba dilemo tse mashome a mahlano, ke ho re, bohle ba ka etsang tshebetso ya tente ya pokano.

₃₁Ke tsena tseo ba tlang ho di jara le ho di baballa, e leng tsa tshebetso ya bona tenteng ya pokano: Dipolanka tsohle tsa tabernakele, le mekwallo ya yona, le ditshiya tsa yona, le didulwana tsa tsona; ₃₂le ditshiya tse teelang lebala hare, le didulwana tsa tsona, le dithakgisa tsa tsona, le dikgwele tsa tsona, le dintho tsa tsona, le tseo ho etswang mosebetsi wa ntho tseo ka tsona; le tla ba nea, ka ho di bala ka mabitso a tsona, ntho tsohle tseo ba tshwanetseng ho di baballa le ho di jara. ₃₃Ke yona tshebetso ya bara ba matlo a Bamerari, e leng tshebetso ya bona tenteng ya pokano, ba le taelong ya Ithamare, mora Aarone, moprista.

₃₄Moshe, le Aarone, le marena a phutheho, ba ngola bara ba Kehathe ka matlo a bona le ka matlo a bontata bona, ₃₅ho qala ka ba dilemo tse mashome a mararo, ho isa ho ba dilemo tse mashome a mahlano, ha ngolwa bohle ba etsang tshebetso ya tente ya pokano. ₃₆Bakehathe ba ngodilweng ka matlo a bona, ya eba dikete tse pedi tse nang le makgolo a supileng a mashome a mahlano. ₃₇Ke bao ba ngodilweng ba matlo a Bakehathe bohle, ba sebetsang ka tenteng ya pokano, e leng bao Moshe le Aarone ba ba ngodileng ka taelo eo Jehova a e neileng Moshe.

₃₈Haele bara ba Gershone ba ngodilweng ka matlo a bona le ka matlo a bontata bona, ₃₉ho qala ka ba dilemo tse mashome a mararo, ho isa ho ba dilemo tse mashome a mahlano, bohle ba kenang tshebetsong ya tente ya pokano, ₄₀ba ngodilweng ka matlo a bona le ka matlo a bontata bona, ya eba dikete tse pedi tse nang le makgolo a tsheletseng a mashome a mararo. ₄₁Ke bona bao ba ngodilweng ba matlo a bara ba Gershone, bohle ba sebetsang tenteng ya pokano, e leng bao Moshe le Aarone ba ba ngodileng ka taelo ya Jehova.

₄₂Haele ba matlo a bara ba Merari, ba ngodilweng ka matlo a bona le ka matlo a bontata bona, ₄₃ho qala ka ba dilemo tse mashome a mararo, ho isa ho ba dilemo tse mashome a mahlano, bohle ba kenang tshebetsong ya tente ya pokano, ₄₄ba ngodilweng ba bona ka matlo a bona le ka matlo a bontata bona, ya eba kete tse tharo tse nang le makgolo a mabedi. ₄₅Ke bona bao ba ngodilweng ba matlo a bara ba Merari, bao Moshe le Aarone ba ba ngodileng ka taelo eo Jehova a e neileng Moshe.

₄₆Ba ngodilweng bohle ba Balevi, bao Moshe, le Aarone, le marena a Iseraele ba ba ngodileng ka matlo a bona le ka matlo a bontata bona, ₄₇ho qala ka ba dilemo tse mashome a mararo ho isa ho ba dilemo tse mashome a mahlano, bohle ba sebetsang tenteng ya pokano, mme ba e jara; ₄₈ba ngodilweng bao bohle ya eba dikete tse robileng meno e le mmedi, tse nang le makgolo a mahlano a mashome a robileng meno e le mmedi. ₄₉Ba ngolwa ke Moshe, ka taelo ya Jehova, e mong le e mong ka tshebetso ya hae, e mong le e mong ka phahlo ya hae; ba ngolwa kamoo Jehova a neng a laetse Moshe kateng.