NUMERE 32

₁Bara ba Rubene le bara ba Gade ba ne ba ruile mehlape e mengatangata; ba bona hoba naha ya Jaesere le ya Gileade di tshwanela mehlape. ₂Yaba bara ba Gade le bara ba Rubene ba tla ho Moshe, le ho moprista Eleasare, le ho marena a phutheho, ba re ho bona: ₃Atharothe, Dibone, Jaesere, Nimra, Heshbone, Eleale, Sebame, Nebo, le Beone, ₄naha eo Jehova a e otlileng pela phutheho ya Iseraele, ke lefatshe le tshwanelang mehlape, mme bahlanka ba hao ba na le mehlape. ₅Ba eketsa ba re: Haeba re fumane mohau pela mahlo a hao, naha eo e ke e newe bahlanka ba hao, ba e rue; o se ke wa re tshedisa Jordane.

₆Moshe a araba bara ba Gade le bara ba Rubene, a re: Hleka banababo lona ba tla ya ntweng, lona le setse kwano na? ₇A ke ka baka lang le ratang ho nyebisa bana ba Iseraele ho tshelela naheng eo Jehova a ba neileng yona? ₈Bontata lona ba entse jwalo mohla ke ba romileng ho lekola naha, re le Kadeshe-Barnea. ₉Ba nyoloha ho fihlela sekgutlong sa Eshkole; eitse hobane ba hlwele naha, ba nyebisa bana ba Iseraele ho ya naheng eo Jehova a neng a ba neile yona. ₁₀Mme bohale ba Jehova ba tuka ka tsatsi leo, mme a hlapanya, a re: ₁₁Batho bana ba tswileng Egepeta, ho qala ka ya nang le dilemo tse mashome a mabedi ho isa ho ba fetang moo, ba ke ke ba bona naha eo ke hlapantseng, ka re, ke tla e nea Abrahama le Isaaka le Jakobo; hobane ha ba ka ba nkgomarela hantle; ₁₂haese Kalebe, mora Jefunne, Mokenise, le Joshua, mora Nune, ba ileng ba kgomarela Jehova hantle. ₁₃Bohale ba Jehova ba tukela Iseraele; a ba dikadikisa feelleng ka dilemo tse mashome a mane, ha ba ha timela moloko wohle wa bao ba neng ba entse bobe pela mahlo a Jehova. ₁₄Mme bonang, le tlile ho ema bakeng sa bontata lona jwaloka mahlomela a batho ba babe, le tle le boele le totisetse Iseraele bohale ba Jehova. ₁₅Hobane ha le mo kgeloha, o tla nne a tlohelle Iseraele feelleng, mme le tla biletsa setjhaba sena timelo.

₁₆Yaba ba atamela Moshe, ba re: Re tla hahela mehlape ya rona masaka mona, le bana ba rona metse; ₁₇re ntoo phakisa ho hlomela, re etelle bana ba Iseraele pele, re be re ba kenye naheng ya bona; bana ba rona bona ba tla sala metseng e dikilweng ka marako ka baka la baahi ba naha. ₁₈Re ke ke ra kgutlela matlung a rona, bana ba Iseraele ba eso ho rue e mong le e mong lefa la hae; ₁₉mme re ke ke ra rua letho hammoho le bona ka mose wane wa Jordane, le ka pele ho moo, kahobane, re tla ba le lefa la rona ka mose o kwano wa Jordane, ka nqa botjhabela.

₂₀Moshe a re ho bona: Ha le etsa hoo, ha le hlomella ntwa pela Jehova, ₂₁ha bohle ba lona ba hlometseng ba tshela Jordane pela Jehova, ho fihlela ha a tlositse dira tsa hae pela sefahleho sa hae; ₂₂ha le sa kgutle naha e eso ho bewe tlasa Jehova, teng le tla hloka molato pela Jehova le pela Iseraele, mme naha ena e tla ba leruo la lona pela Jehova. ₂₃Empa ha le sa etse jwalo, etlaba le sitetswe Jehova; mme le tsebe hoba sebe sa lona se tla le tshwara. ₂₄Hahelang bana ba lona metse, le mehlape ya lona masaka, mme le etse ka tse tswileng melomong ya lona.

₂₅Bara ba Gade le bara ba Rubene ba re ho Moshe: Bahlanka ba hao ba tla etsa seo monghadi wa rona a se laetseng. ₂₆Ho tla sala metseng ya Gileade bana ba rona, le basadi ba rona, le mehlape ya rona, le makgomo wohle a rona; ₂₇mme bahlanka ba hao, bohle, ba hlomeletseng ntwa, ba tla ya lwana pela Jehova, kamoo monghadi wa rona a boletseng kateng.

₂₈Bakeng sa bona, Moshe a laela Eleasare moprista, le Joshua mora Nune, le dihlooho tsa matlo a meloko ya bana ba Iseraele, a re ho bona: ₂₉Ha bara ba Gade le bara ba Rubene ba tshela Jordane le lona, ba hlomeletse ho lwana pela Jehova ho fihlela ha naha e bewa tlasa lona, le tla ba nea naha ya Gileade, ba e rue. ₃₀Empa ha ba sa ye le lona ba hlometse, ba tla aha hammoho le lona naheng ya Kanana.

₃₁Bara ba Gade le bara ba Rubene ba araba, ba re: Re tla etsa kamoo Jehova a boleletseng bahlanka ba hao kateng. ₃₂Re tla feta re hlometse pela Jehova naheng ya Kanana; re mpe re rue lefa la rona ka mose o kwano wa Jordane.

₃₃Moshe a nea bara ba Gade, le bara ba Rubene, le halofo ya moloko wa Manasse, mora Josefa, mmuso wa Sihone, morena wa Baamore, le mmuso wa Oge, morena wa Bashane, le lefatshe le metse ya lona, le yona naha ya metse e ka nqa tsohle.

₃₄Bara ba Gade ba haha Dibone, le Atharothe, le Aroere, ₃₅le Athrothe-Shofane, le Jaesere, le Jogbeha, le Bethe-Nimra, le Bethe-Harane, ₃₆metse e dikilweng ka marako, mme ba hahela mehlape masaka.

₃₇Bara ba Rubene ba haha Heshbone, le Eleale, le Kiryathaime; Nebo le Baale-Meone, eo ba e reileng mabitso asele, le Sibma; ₃₈mme ba rea metse eo ba e hahileng mabitso.

₃₉Bara ba Makire, mora Manasse, ba futuhela metse ya Gileade, mme ba e hapa; ba lelekisa Baamore, ba neng ba ahile teng. ₄₀Moshe a nea Makire, mora Manasse, Gileade, mme a aha teng. ₄₁Jaire, mora Manasse, a futuha, mme a hapa metse, a e bitsa Havvoth-Jaire. ₄₂Nobake le yena a ya, a hapa motse wa Kenathe le metsana ya teng, mme a o rea Nobake ka lebitso la hae.