Dinoha tse tjhesang. — Baamore ba hlolwa.
1Eitse ha morena wa Arade, e leng Mokanana, ya neng a ahile ka nqa borwa, a utlwa hoba Baiseraele ba tla ka tsela ya Atharime, a lwantsha Baiseraele, mme a kgutla a hapile ba bang. 2Yaba Baiseraele ba ikana ho Jehova, ba re: Ha o neela setjhaba seo matsohong a rona, re tla neela metse ya bona anathema. 3Jehova a utlwa lentswe la Baiseraele, a ba neela Bakanana; mme ba neela metse ya bona anathema. Sebaka seo sa rewa lebitso la Horma.
4Ba tloha thabeng ya Hore ka tsela ya Lewatle le Lefubedu, ba pota naha ya Edomo. Tseleng, setjhaba sa fellwa ke pelo, mme batho ba bua hampe ka Modimo le ka Moshe, ba re: 5Na ke ka baka lang ha le re nyolotse Egepeta hore re tlo shwela lefeelleng na? Hobane, mona, ha ho bohobe, ha ho metsi, mme pelo tsa rona di tennwe ke bohobe bona bo sa tsebisahaleng. 6Yaba Jehova o romela setjhaba dinoha tse tjhesang; tsa loma batho, mme ha eshwa batho ba bangata Iseraeleng. 7Jwale setjhaba sa tla ho Moshe, sa re: Re sitilwe, hobane re buile hampe ka Jehova le ka wena. Rapela Jehova hore a tlose dinoha tsena ho rona. Moshe a rapella setjhaba. 8Yaba Jehova o re ho Moshe: Etsa noha e tjhesang, o e fanyehe sefateng; e mong le e mong ya lomilweng, ya tlang ho e tadima, o tla phela. 9Moshe e etsa noha ka koporo, a e fanyeha sefateng; mme e mong le e mong ya lomilweng ke noha, ha a tadima noha ya koporo, o ne a phela.
10Bana ba Iseraele ba tloha, ba ya emisa Obothe; 11ba tloha Obothe, ba ya emisa thakong tsa Abirame, lefeelleng le malebana le Moabe, ka nqa botjhabela. 12Ba tloha moo, ba emisa sekgutlong sa Serede. 13Ba tloha teng, ba ya emisa mose wane wa Aarone, e leng noka e phallang feelleng ha e etswa naheng ya Baamore; hobane Arnone ke moedi wa Moabe, mahareng a Moabe le Baamore. 14Ke ka baka leo ho itsweng Bukeng ya Dintwa tsa Jehova: 15Vahebe wa Sufa, le dinokana tsa Arnone, le ho phalla ha dinokana ho lebileng nqa Are, ho isa moeding wa Moabe.
16Ba tloha moo, ba ya Beere. Ke ka sediba seo Jehova a itseng ho Moshe: Bokella setjhaba, mme ke tla se fa metsi. 17Ke moo Iseraele a kileng a bina sefela sena: 18Nyoloha, sediba! Se bineleng ka ho arabelana, le roke sediba se tjhekilweng ke marena, se tjhekilweng ke baholo ba setjhaba ka lere la borena, ka mare a bona!
19Ba tloha feelleng, ba ya Matthana; ba tloha Matthana, ba ya Nahaliele; ba tloha Nahaliele, ba ya Bamothe; 20ba tloha Bamothe, ba ya sekgutlong se naheng ya Moabe, se fellang qhoweng ya Pisga, ka nqa feelleng.
21Baiseraele ba roma manqosa ho Sihone, morena wa Baamore, ka ho re: 22Re dumelle re fete naheng ya hao; re ke ke ra kgelohela masimong, leha e le merareng; re ke ke ra nwa metsi a didiba tse tjhekilweng; re tla ya ka mmila o phatlaletseng, re be re tswe meeding ya hao. 23Empa Sihone ha a ka a dumella Iseraele ho feta ka naha ya hae; empa a bokella setjhaba sa hae kaofela, a ya kgahlanyetsa Iseraele feelleng. A tla Jahatse, a lwantsha Iseraele teng. 24Baiseraele ba mo hlola ka bohale ba lerumo, ba nka naha ya hae, ho tloha Arnone ho isa Jabboke, le ho isa moeding wa bana ba Ammone; hobane moedi wa bana ba Ammone o ne o tiisitswe. 25Baiseraele ba hapa metse yohle, ba aha metseng yohle ya Baamore, Heshbone, le metseng e meng yohle e pusong ya bona. 26Hobane Heshbone e ne e le motse wa Sihone, morena wa Baamore. Sihone o ne a lwane le morena wa Moabe ya neng a le teng pele, o ne a mo amohe naha ya hae yohle ho isa Arnone. 27Ke ka baka leo baroki ba reng: Tloong Heshbone! Motse wa Sihone o tsoswe, o hahuwe! 28Hobane ho tswile mollo Heshbone, le lelakabe motseng wa Sihone; le tjhesitse Are-Moabe le marena a diphahameng tsa Arnone. 29Ho madimabe, wena Moabe! O timetse, setjhaba sa Kemoshe! Se neetse bara ba sona palehong, le baradi ba sona kgolehong ya Sihone, ya morena wa Baamore. 30Re ba betsitse ka metsu ya rona. Tsohle di sentswe ho tloha Heshbone ho isa Dibone; re sentse ho ya fihla Nofake, le ho isa Medeba.
31Baiseraele ba ya aha naheng ya Baamore. 32Jwale Moshe a romela ho ya hlwela Jaesere, mme ba kena metse ya teng, ba lelekisa Baamore ba neng ba ahile ho yona.
33Hamorao, ba kgutla, mme ba nyoloha ka tsela ya Bashane. Yaba Oge, morena wa Bashane, o a tswa, a ba kgahlanyetsa ho ba lwantsha Edrei, a ena le batho ba hae kaofela. 34Yaba Jehova o re ho Moshe: O se ke wa mo tshaba; hobane ke mo neetse matsohong a hao, yena le setjhaba sa hae kaofela, le naha ya hae; o tla mo etsa jwalokaha o entse Sihone, morena wa Baamore ya neng a ahile Heshbone. 35Mme ba mo hlola, yena le bara ba hae, le setjhaba sa hae kaofela, ho sa pholohe motho le a mong; mme ba hapa naha ya hae.
