LUKA 19

₁Jesu a kena Jeriko, a pholletsa hara motse. ₂Mme bonang, monna o ne a le teng ya bitswang Sakea; e ne e le molaodi wa balekgetho, hape e ne e le morui. ₃a rata ho bona Jesu hoba ke mang, a mpa a sitwa ka baka la bongata; hobane a ne a le mokgutshwanyane boemong. ₄Yaba o mathela pele, a hlwella sefateng sa sikomora, hore a tle a mmone, hobane o ne a tla feta ho sona. ₅Yare ha Jesu a etla moo, a lelala hodimo, a mmona, mme a re ho yena: Sakea, phakisa o theohe; hobane e ka kgona ke fapohele tlung ya hao kajeno. ₆Yaba o phakisa a theoha, a mo amohela ka thabo. ₇Bohle, ha ba bona hoo, ba seba, ba re: O fapohetse ha monna wa moetsadibe. ₈Empa Sakea a ema, a re ho Morena: Bona, Morena, leruo la ka ke le arolela mafutsana kalehare; mme ha ke amohile motho ntho e nngwe ka thetso, ke busetsa ho yena tse nne. ₉Jesu a re ho yena: Kajeno, poloko e kene tlung ena; hobane enwa le yena ke mora wa Abrahama. ₁₀Hobane Mora motho o tlile ho batla le ho pholosa ho timetseng.

₁₁Eitse ha ba sa mametse taba tseo, Jesu a eketsa ho bolela setshwantsho, hobane a ne a le haufi le Jerusalema, mme ba ne ba lekanya hobane mmuso wa Modimo o tla hlaha kapele. ₁₂A re: Motho e moholo o ne a etela fatsheng le hole ho inkela borena, a ntoo boya. ₁₃A bitsa bahlanka ba hae ba leshome, a ba nea ponto tse leshome, a re ho bona: Le nne le bapatse ka tsona, ke be ke fihle. ₁₄Empa batho ba motse wa hae ba ne ba mo hloile; ba roma manqosa mehlaleng ya hae, a reng: Ha re rate ha enwa a re busa. ₁₅Eitse mohla a kgutlang a se a nkile borena, a laela hore bahlanka ba hae, bao a ba neileng ditjhelete, ba bitswe, a tle a tsebe hoba e mong le e mong o ruile ho le hokae ka papatso ya hae. ₁₆Ha fihla wa pele, a re: Morena, ponto ya hao e hlahisitse ponto tse leshome. ₁₇A re ho yena: Ho lokile, mohlanka ya molemo; ereka ha o bile kgabane ka ntho e nyenyane, busa metse e leshome. ₁₈Wa bobedi a tla, a re: Morena, ponto ya hao e hlahisitse ponto tse hlano. ₁₉a re ho yena: Le wena, o buse metse e mehlano. ₂₀Mme e mong a tla, a re: Morena, ponto ya hao e sa le yona ena eo ke neng ke e phuthetse leseleng; ₂₁hobane ke o tshabile, kahobane o le motho ya thata: o nka seo o sa kang wa se bea, mme o kotula seo o sa kang wa se jala. ₂₂A re ho yena: Mohlanka e mobe, ke tla o ahlola ka polelo ya hao. O ne o tseba hobane ke motho ya thata, ke nkang seo ke sa kang ka se bea, ke kotulang seo ke sa kang ka se jala! ₂₃Ha ho le jwalo, ha o ka wa bea keng tjhelete ya ka bankeng, mme ho kgutleng ha ka nka be ke e latile le phaello ya yona? ₂₄Yaba o re ho ba leng teng: Mo amoheng ponto eo, le e nee ya nang le diponto tse leshome. ₂₅Ba re ho yena: Morena, o se a ena le diponto tse leshome. ₂₆Ke fela ke re ho lona: Ho tla fuwa e mong le e mong ya nang le ntho; empa ya se nang letho o tla amohuwa le seo a nang le sona. ₂₇Haele dira tseo, tse sa kang tsa rata hoba ke di buse, di tliseng mona, le di bolaye pela ka.

₂₈Eitse hobane a bue taba tseo, a ba etella pele, a nyolohela Jerusalema.

₂₉Eitse ha a atametse Bethefage le Bethania, pela thaba e bitswang ya Mehlwaare, a roma barutuwa ba hae ba le babedi, ₃₀a re: Eyang motsaneng oo le o lebileng; etlare ha le sa kena ho wona, le tla fumana petsana ya esele e holehilweng, e esong ho kallwe ke motho le ka mohla o le mong; e lokolleng, le e tlise. ₃₁Ha e mong a ka le botsa, a re: Le e lokollelang? le re ho yena: Ke hobane Morena o a e hloka.

₃₂Ba romilweng ba ya, ba fihlela ho le jwalokaha ba boleletswe. ₃₃Eitse ha ba lokolla petsana, beng ba yona ba ba botsa, ba re: Petsana eo le e lokollelang? ₃₄Ba re: Morena o a e hloka. ₃₅Jwale ba tla le yona ho Jesu, ba ala dikobo tsa bona hodima petsana, mme ba hlwesa Jesu hodima yona. ₃₆Ha a ntse a tsamaya, ba ala dikobo tsa bona tseleng. ₃₇Ha a se a atametse motheo wa thaba ya Mehlwaare, bongata jwa barutuwa kaofela ba qala ho thaba, ba boka Modimo ka mantswe a maholo, ka baka la mehlolo yohle eo ba e boneng; ₃₈ba re: Ho bokwe monghadi ya tlang ka lebitso la Morena! Kgotso e be lehodimong, le kganya mahodimong a hodimodimo!

₃₉Bafarisi ba bang, ba hara bongata, ba re ho yena: Moruti, kgalemela barutuwa ba hao. ₄₀A ba araba, a re ho bona: Ke a le bolella, ke re: Bao ha ba ka kgutsa, majwe a ka howa.

₄₁Ha a atametse Jerusalema, a bona motse, a o llela, ₄₂a re: Jo! hoja ebe le wena o tsebile, le ka tsatsi lena la hao, tse ka beng di o hlahisetsa kgotso! Empa jwale di patetswe mahlo a hao. ₄₃Hobane matsatsi a tla o wela hodimo, ao bao e leng dira ho wena ba tla tjheka lengope, ba o teele hare ka lona, ba o thibelle ka nqa tsohle; ₄₄ba tla o dihela fatshe, wena le bana ba hao ba ho wena, mme ba ke ke ba lesa ha hao lejwe hodima lejwe le leng; hobane ha o a ka wa tseba nako eo o etetsweng ka yona.

₄₅Yaba o kena tempeleng, a qala ho phahlela ntle ba bapatsang le ba rekang teng; ₄₆a re ho bona: Ho ngodilwe, ho thwe: Ntlo ya ka ke ntlo ya thapelo; empa lona, le e entse lehaha la mashodu.

₄₇O ne a ruta tempeleng ka matsatsi wohle; mme baprista ba baholo, le bangodi, le baholo ba setjhaba, ba ne ba rata ho mo timetsa. ₄₈Empa ba ne ba sa bone hore na ba tla etsa jwang kahobane setjhaba kaofela se ne se mo kgomaretse, se tle se mo mamele.