LUKA 12

₁Ho sa le jwalo, batho ba dikete ba ne ba phuthehile hammoho, ba bile ba hatellana; mme Jesu a qala ho bua le barutuwa ba hae pele, a re: Le tshabe ditomoso tsa bafarisi, e leng boikaketsi. ₂Hobane ha ho letho le kwahetsweng le sa tlo ka le kwahollwa, leha e le ntho e patilweng e sa tlo ka e tsejwa. ₃Ka baka leo, tsohle tseo le di buileng lefifing di tla utlwahala leseding; le tseo le di nyenyeletsang tsebeng diphaposing, di tla bolelwa dihlorong tsa matlo. ₄Empa ke re ho lona le leng metswalle ya ka: Le se ke la tshaba ba bolayang mmele, mme kamorao ha ba na ho hong hoo ba ka ho etsang. ₅Empa ke tla le lekanyetsa eo le tshwanetseng ho mo tshaba; tshabang eo, ereng hobane a bolaye mmele, a nang le matla a ho dihela motho diheleng. E, ke re ho lona: Eo le mo tshabe. ₆Dirobele tse hlano hleka ha di rekwe ka peni tse pedi na? Leha ho le jwalo, Modimo ha o lebale le se seng sa tsona. ₇Esita le qoba tsa moriri wa dihlooho tsa lona di badilwe kaofela. Se tshabeng ke hona; le fetisa dirobele tse ngata.

₈Ke re ho lona: E mong le e mong ya tla mpolela pela batho, Mora motho le yena o tla mmolela pela mangeloi a Modimo; ₉empa ya ntatolang pela batho, o tla latolwa pela mangeloi a Modimo.

₁₀E mong le e mong ya sebileng Mora motho, a ka tshwarelwa; empa ya nyefotseng Moya o Halalelang, a ke ke a tshwarelwa.

₁₁Etlare ha ba le isa masinagogeng, le pela baholo le babusi, le se ke la belaella mokgwa oo le tla ikarabela ka wona, leha e le seo le tla se bolela; ₁₂hobane Moya o Halalelang o tla le ruta, ka yona nako eo, seo le tshwanetseng ho se bolela.

₁₃E mong hara bongata a re ho yena: Moruti, bolella ngwaneso hore a arolelane lefa le nna. ₁₄Empa Jesu a re ho yena: Monna, ke mang ya mpeileng moahlodi, leha e le moaroledi wa lona? ₁₅A eketsa a re ho bona: Iponeleng, le ipoloke bakeng sa takatso ya leruo; hobane bophelo ba motho bo ke ke ba tswa bongateng ba dintho tseo a di ruileng, leha di mo atetse haholo. ₁₆A ba bolella le setshwantsho, a re: Masimo a morui a ne a beile haholo. ₁₇Yaba o nahana ka ho yena, a re: Ke tla etsa jwang; hobane ha ke na moo nka bokellang dijo tsa ka teng? ₁₈A re: Seo ke tla se etsa ke sena: Ke tla qhaqha mediko ya ka, ke hahe e meholo; mme ke tla bokella teng dijo tsa ka kaofela le mesebetsi ya ka; ₁₉mme ke tla re ho moya wa ka: Moya, o na le mesebetsi e mengata e bokelletsweng dilemo tse ngata; phomola, o je, o nwe, o nyakalle. ₂₀Empa Modimo wa re ho yena: Lewatla towe! Ka bosiu bona, moya wa hao o tla latwa ho wena; mme dintho tseo o di lokisitseng, e tla ba tsa mang na? ₂₁Ya ipokellelang matlotlo, a mpa a sa ruele ho Modimo, o jwalo.

₂₂Yaba o re ho barutuwa ba hae: Ka baka leo, ke re ho lona: Le se ke la belaela ka tsa ho phela ha lona, ka seo le tla se ja, leha e le ka sa mmele, ka seo le tla se apara. ₂₃Bophelo bo fetisa dijo, le mmele o fetisa diaparo. ₂₄Lemohang makgwaba; ha a leme, ha a kotule, ha a na ntlo moo a bolokelang teng, leha e le modiko; mme Modimo o a a fepa. Le fetisa dinonyana hakakang! ₂₅Ke mang hara lona ya ka eketsang boemo ba hae ka setswe se le seng ka ho belaella teng? ₂₆Mme jwale, ha esita tse nyenyane di le hlola, le ipelaetsa keng ka tse ding? ₂₇Lemohang dikgahla kamoo di melang kateng; ha di sebetse, ha di ohle; leha ho le jwalo, ke re ho lona: Esita le Salomone, kganyeng yohle ya hae, ha a ka a ba le seaparo se jwaloka sa e nngwe ya tsona. ₂₈Mme jwale, erekaha Modimo o apesa jwalo jwang ba naheng, bo leng teng kajeno, mme hosasane bo se bo tla lahlelwa seboping, na haholo o ke ke wa le apesa lona batho ba tumelo e nyenyane! ₂₉Ka baka leo, le se ke la batla seo le tla se ja le seo le tla se nwa, mme le se ke la ipelaetsa; ₃₀hobane dintho tseo kaofela di batlwa ke ditjhaba tsa lefatshe; empa Ntata lona o tseba hobane le a di hloka; ₃₁le mpe le batle mmuso wa Modimo pele, mme ntho tseo kaofela le tla di ekeletswa.

₃₂Mohlatswana, se tshabe, hobane ho kgahlile Ntata lona ho le fa mmuso.

₃₃Bapatsang ka tseo le nang le tsona, mme le fane; iketsetseng mekotla e sa tsofaleng, letlotlo le sa feleng mahodimong, moo leshodu le sa atameleng teng, le moo tshwele e sa senyeng. ₃₄Hobane, moo letlotlo la lona le leng teng, ke moo le dipelo tsa lona di tla ba teng.

₃₅Matheka a lona a tlangwe, mme mabone a lona a tuke. ₃₆Le lona le be jwaloka batho ba lebeletseng morena wa bona hore na o tla kgutla neneng bohading, hore, etlere ha a fihla, a kokota, ba mmulele hanghang. ₃₇Ho lehlohonolo bahlanka bao, morena ha a fihla, a tla ba fumana ba fadimehile! Kannete ke re ho lona: O tla itlama, a ba dudise dijong, mme o tla atamela, a ba sebeletse. ₃₈Leha a ka tla tebelong ya bobedi, leha a ka tla tebelong ya boraro, mme a ba fumana ba le jwalo, ho lehlohonolo bahlanka bao. ₃₉Le lemohe hoba, hola monga ntlo a ka tseba nako eo leshodu le tla tla ka yona, a ka lebela, a se ke a lesa ntlo ya hae ya phunngwa. ₄₀Jwale, le lona le itokise; hobane Mora motho o tla tla ka nako eo le sa e hopolang.

₄₁Yaba Petrose o re ho yena: Morena, setshwantsho seo hleka o se bolella rona feela kapa u se bolella le bohle na? ₄₂Morena a re: Mohlahlobi ke ofe ya kgabane, ya bohlale, eo monga hae a mmeileng moalosi wa bahlanka ba hae, ho ba nea dijo tsa bona ka nako e tshwanelang? ₄₃Ho lehlohonolo mohlanka eo, etlareng ha morena wa hae a etla, a mo fumane a ntse a etsa jwalo. ₄₄Kannete ke re ho lona: O tla mmea moalosi wa mesebetsi ya hae kaofela. ₄₅Empa ekare ha mohlanka eo a ka bua pelong ya hae, a re: Morena wa ka o diehile ho tla; mme jwale a qala ho otla bahlanka ba batona le ba batshehadi, a eja, a enwa, a tahwa, ₄₆morena wa mohlanka eo o tla tla ka tsatsi leo a sa mo lebellang, le ka hora eo a sa e tsebeng; mme o tla mo pomahanya dikoto, a mo fe kabelo ya hae le ba sa tshepeheng. ₄₇Mohlanka ya tsebileng thato ya morena wa hae, mme a sa ka a lokisa letho, le ho etsa thato ya morena wa hae, o tla otlwa haholo. ₄₈Empa ya sa kang a tseba, mme a entse ditaba tse tshwanelwang ke kotlo, o tla otlwa hanyenyane. E mong le e mong ya neilweng haholo, ho tla batlwa haholo ho yena; mme ya laeleditsweng haholo, ho tla botswa haholo ho yena.

₄₉Ke tlile ho dihela mollo lefatsheng; mme ke sa batlang, ha o se o tukile? ₅₀Ke na le kolobetso eo ke tla kolobetswa ka yona; mme ke e hlolohetswe hakakang, e be e phethehe! ₅₁Na le lekanya hoba ke tlile ho kenya kgotso lefatsheng na? Ke re ho lona: Tjhe, empa e le karohano. ₅₂Hobane ho tloha jwale, batho ba bahlano ba ntlo e le nngwe ba tla arohana, ba bararo ba lwantshe ba babedi, ba babedi ba lwantshe ba bararo. ₅₃Ntata motho o tla arohana le mora wa hae, le mora a arohane le ntatae; mma motho o tla arohana le moradi wa hae, le moradi a arohane le mmae; matsala motho o tla arohana le ngwetsi ya hae, mme ngwetsi e arohane le matsala yona.

₅₄A ntoo re ho bongata: Mohla le bonang leru le nyoloha Bophirimela, le ye le phakise le re: Pula e tla na. Mme ho fele ho be jwalo. ₅₅Ere ha le bona ha foka moya o tswang nqa Borwa, le re: Ho tla futhumala. Mme ho fele ho be jwalo. ₅₆Baikaketsi! le tseba ho lemoha tshobotsi ya lehodimo le ya lefatshe, mme nako ena ha le tsebe keng ho e lemoha?

₅₇Mme ha le ikgethele keng se lokileng e le lona? ₅₈Jwale, ha o eya ho morena le eo le tsekisanang le yena, o phehelle ho fedisa taba le yena le sa le tseleng le yena, esere mohlomong a o hulela pela moahlodi, moahlodi yena a o neela mohlanka wa lekgotla, mme mohlanka a o kgarameletsa teronkong. ₅₉Ke a o bolella, o ke ke wa tswa teng, o eso ho lefe le tjheletana e horeletseng.