LEVITIKE 14

₁Jehova a bua le Moshe, a re: ₂Molao oo molepera a tlang ho ya ka wona ka letsatsi la ho itlhatswa ha hae, ke wona ona: ₃O tla tliswa ho moprista; moprista o tla tswela kantle ho diahelo, mme moprista o tla mo tadimisisa. Ha a bona hoba molepera o fodile bohlokong ba hae, ₄moprista o tla laela hore ya tshwanetseng ho itlhatswa, a tlisetswe dirobele di le pedi di sa utlwa, tse hlwekileng, le lehong la kedare, le krimsone, le hisopa. ₅Moprista o tla laela hore serobele se le seng se hlabelwe pitseng ya letsopa, e tshetseng metsi a molatswana. ₆Jwale o tla nka serobele se utlwang, le lehong la kedare, le krimsone, le hisopa, mme o tla di qopetsa hammoho le serobele se utlwang mading a serobele se hlabetsweng hodima metsi a molatswana; ₇o tla foka hasupa hodima motho ya itlhatswang lepera la hae, mme o tla re, o hlatswehile, a ntoo lesa serobele se sa utlwang se fofele nahathothe.

₈Ya itlhatswang a hlatswe diaparo tsa hae, a beole mohwete wa hae kaofela, a ntoo itlhatswa ka metsi, mme etlaba o hlwekile; ke hona a tla lokela ho boela a kgutlela diahelong; empa o tla tshwanela ho dula kantle ho tente ya hae ka matsatsi a supileng. ₉Ka letsatsi la bosupa, o tla beola mohwete wa hae kaofela; a beole sehlotho sa hae, le ditedu, le dintshi, mohwete wa hae kaofela; o tla hlatswa diaparo tsa hae, a hlatswe le mmele wa hae ka metsi; o tla hlweka jwalo. ₁₀Ka letsatsi la boroba meno e le mmedi, o tla tlisa dikonyana tse pedi tse tona, tse se nang sekodi, le nku e lemo se le seng, e se nang sekodi, le dikarolo tse tharo tsa boshome ba efa ya lefi la phofo le dubilweng ka ole, ho di etsa nyehelo, le loge ya ole e be teng. ₁₁Moprista ya etsang hlatsuo, o tla hlahisa motho ya itlhatswang le dintho tseo pela Jehova, monyako wa tente ya pokano.

₁₂Moprista o tla nka e nngwe ya dikonyana tse tona, eo a tlang ho e hlahisa le loge ya ole, e be sehlabelo sa molato, mme o tla di tsokotsa, e be kabelo e tsokoditsweng pela Jehova. ₁₃O tla hlaba konyana e tona nqalong eo ho hlabelwang ho yona mahlabelo a sebe le ditjheso, nqalong e kgethehileng, hobane, jwalokaha ntho ya sehlabelo sa sebe e le ya moprista, ho jwalo le ntho ya sehlabelo sa molato; e halalela haholo. ₁₄Moprista o tla nka madi a mang a sehlabelo sa molato, o tla a bea lereteng la tsebe e tona ya motho ya itlhatswang, le monwaneng o motona wa letsoho le letona la hae, le monwaneng o motona wa leoto la hae le letona. ₁₅Moprista o tla nka logeng ya ole, mme o tla tshela koting sa seatla sa hae se setshehadi; ₁₆moprista o tla qopetsa monwana wa hae wa letsoho le letona oleng eo a nang le yona seatleng sa hae se setshehadi, mme ka monwana wa hae o tla foka hasupa pela Jehova. ₁₇Ole e setseng seatleng sa hae, moprista o tla bea e nngwe lereteng la tsebe e tona ya motho ya hlatsuwang, le monwaneng o motona wa letsoho le letona la hae, le monwaneng o motona wa leoto le letona la hae, hodima madi a sehlabelo sa molato. ₁₈Se setseng sa ole e seatleng sa hae, moprista o tla se bea hodima hlooho ya motho ya itlhatswang, mme moprista o tla mo etsetsa pheko pela Jehova. ₁₉Moprista o tla hlahisa sehlabelo sa sebe, e be pheko ya eo e ka kgonang a hlatswehe sesila sa hae; kamora moo, a hlabe nku ya setjheso. ₂₀Moprista o tla tlisa setjheso aletareng, le nyehelo; moprista o tla mo etsetsa pheko, hore a tle a hlweke.

₂₁Empa ekare haele mofumanehi, mme a sitwa ho hlahisa ntho tseo, o tla nka konyana e tona e le nngwe, e be sehlabelo sa molato, mme o tla e hlahisa ka tsokotso, e be pheko ya hae; a tlise le karolo ya leshome ya efa ya lefi la phofo le dubilweng ka ole, e be nyehelo, le loge ya ole, ₂₂le maebanakgorwana a mabedi, leha e le madinyane a mabedi a maeba, kamoo a ka ntshang kateng, le leng e be sehlabelo sa sebe, le leng e be setjheso. ₂₃Ka letsatsi la boroba meno e le mmedi, o tla tlisa ntho tseo, tseo a itlhatswang ka tsona, ho moprista, monyako wa tente ya pokano, pela Jehova.

₂₄Moprista o tla nka konyana ya sehlabelo sa molato, le loge ya ole, tseo a tlang ho di hlahisa, e be kabelo e tsokotswang pela Jehova. ₂₅Moprista o tla hlaba konyana ya sehlabelo sa molato, mme o tla nka madi a mang a sehlabelo sa molato, a a bee lereteng la tsebe e tona ya motho ya itlhatswang, le monwaneng o motona wa letsoho la hae le letona, le monwaneng o motona wa leoto le letona la hae. ₂₆Moprista o tla tshela ole e nngwe koting sa seatla sa hae se setshehadi, sa hae moprista; ₂₇mme ka monwana wa hae wa letsoho le letona, moprista o tla foka ka ole eo a nang le yona ka seatleng se setshehadi, hasupa pela Jehova. ₂₈Moprista o tla bea ole eo a nang le yona seatleng sa hae lereteng la tsebe e tona ya ya itlhatswang, le monwaneng o motona wa letsoho le letona la hae, le monwaneng o motona wa leoto la hae le letona, moo a beileng madi a sehlabelo sa molato. ₂₉Ole e setseng eo a nang le yona seatleng sa hae, moprista o tla e bea hloohong ya ya itlhatswang, a tle a mo etsetse pheko pela Jehova. ₃₀A ntoo hlaba le leng la maebanakgorwana, leha e le le leng la madinyane a maeba, kamoo a ntshitseng kateng; ₃₁le leng e be sehlabelo sa sebe, le leng e be setjheso se tla hlahiswa hammoho le nyehelo, mme moprista o tla etsetsa ya itlhatswang pheko pela Jehova.

₃₂Ke oo molao wa ho itlhatswa oo ya jewang ke lepera a tshwanetseng ho ya ka wona, ha a haellwa.

₃₃Jehova a boela a bua le Moshe, le Aarone, a re: ₃₄Etlare hobane le kene naheng ya Kanana eo ke le neang yona, le e rue, ha nka otla ntlo efe le efe ya naha eo le tlang ho e rua ka lefu la lepera, ₃₅monga ntlo o tla tla ho moprista ho mo tsebisa ka ho re: Ke lemohile ho kang letheba ka tlung ya ka. ₃₆Moprista ha a eso ho kene ho tadimisisa letheba leo, o tla laela hore ntlo eo e phahlwe, hore se ka tlung se se ke sa tshwaetswa ke sesila; jwale moprista o tla kena ho tadimisisa ntlo eo. ₃₇O tla tadimisisa letheba; ha a bona hoba le hlahisitse dikotjana maboteng a ntlo tse phobetsehileng leboteng, tse mmala o motalana, kapa o mofubetswana, ₃₈moprista o tla tswa tlung eo; etlare ha a le monyako wa ntlo, a o kwale ka matsatsi a supileng. ₃₉Moprista o tla kgutlela tlung eo ka la bosupa, mme ha a bona hobane letheba le namile maboteng a ntlo, ₄₀o tla laela hore ho qhebollwe majwe ao lefu le namathetseng ho wona, a lahlelwe kantle ho motse, nqalong e sesila. ₄₁Ho ntoo hopuwa ntlo kahare kahohle, mme ho tlositsweng leboteng le hopilweng ho tla tshollelwa kantle ho motse, nqalong e sesila. ₄₂Ho tla nkwa majwe a mang a tlang ho bewa bakeng sa majwe a pele, ho nkwe mobu o mong o dubilweng ho bateha ntlo.

₄₃Ekare ha letheba leo le boela le hlaha, mme le thopohela leboteng la ntlo, ha ho se ho qhebolotswe majwe, mme ha ho hopilwe lebota la ntlo ho bile ho batehilwe; ₄₄moprista o tla tla, mme ha a bona hoba letheba le thopohetse lebota la ntlo, ke lepera le fukutlang, le jang ntlo; ntlo eo e sesila. ₄₅Ntlo eo e tla heletswa, le majwe a yona, le difate tsa yona, le mabota a yona; ntho tseo kaofela di tla thothelwa kantle ho motse, nqalong e sesila. ₄₆Leha e ka ba mang le mang ya keneng ka tlung eo ka matsatsi ao e kwetsweng ka wona, o tla ba sesila ho isa mantsiboya. ₄₇E mong le e mong ya robetseng ka tlung eo, o tla hlatswa diaparo tsa hae; leha e ka ba mang le mang ya jetseng ka tlung eo, o tla hlatswa diaparo tsa hae.

₄₈Empa ekare ha moprista a kgutlela, mme a bona hoba letheba ha le a ka la thopohela leboteng la ntlo, ha e se e batehilwe, moprista o tla bolela hore e hlwekile, hobane letheba le fedile. ₄₉Hlatsuo ya ntlo eo e tla etswa ke moprista ka dirobele tse pedi, le lehong la kedare, le krimsone, le hisopa. ₅₀Se seng sa dirobele o tla se hlabela pitseng ya letsopa e tshetseng metsi a molatswana; ₅₁o tla nka lehong la kedare, le hisopa, le krimsone, le serobele se utlwang, mme o tla di qopetsa hammoho mading a serobele se hlabilweng, le metsing a molatswana, mme o tla foka ntlo eo hasupa ka wona. ₅₂O tla etsa jwalo pheko ya ntlo ka madi a serobele, le ka metsi a molatswana, le ka serobele se utlwang, le ka lehong la kedare, le ka hisopa, le ka krimsone. ₅₃Haele serobele se utlwang, o tla se tlohela a le kantle ho motse, nahathothe. Ho tla etswa jwalo pheko ya ntlo, mme etlaba e hlwekile.

₅₄Ke wona oo molao o beetsweng mefuta yohle ya lepera, le setshwa, ₅₅le lepera la diaparo, le la matlo, ₅₆le diso, le makgopho, le matheba, ₅₇ho tle ho tsejwe ka wona ntho e sesila, le ntho e hlwekileng. Ke oo molao bakeng sa lepera.