LEVITIKE 11

₁Jehova a bua le Moshe le Aarone, a re ho bona: ₂Bolellang bana ba Iseraele, le re: Tse utlwang tseo le ka di jang hara diphoofolo tsohle tse lefatsheng ke tsena: ₃Phoofolo e nngwe le e nngwe e nang le dikgola tse pedi le tlhako e arohaneng, e busolosa, e be dijo ho lona. ₄Haele tse busolosang feela, kapa tse ditlhako di arohaneng feela, tsona le se ke la di ja: ke kamele, hobane e a busolosa, empa ha e na tlhako e arohaneng; e tla ba sesila ho lona; ₅le pela, hobane e a busolosa, empa ha e na tlhako e arohaneng; e tla ba sesila ho lona; ₆le moutla, hobane o a busolosa, empa ha o na tlhako e arohaneng; o tla ba sesila ho lona; ₇le kolobe, hobane leha e na le tlhako e arohaneng, le dikgola tse pedi, ha e busolose; e tla ba sesila ho lona. ₈Le se ke la ja nama ya tsona, leha e le ho ama ditopo tse shweleng tsa tsona; di tla ba ditshila ho lona.

₉Haele tse utlwang tse ka metsing, tseo le ka di jang, ke kaofela ha tse nang le maphewana a ho hlapa le makgakgapha; tse jwalo tse ka metsing, le mawatleng, le dinokeng, e tla ba dijo ho lona; ₁₀empa tsohle tse se nang maphewana a ho hlapa le makgakgapha, tse ka mawatleng le dinokeng, leha e le tsohle tse nyekenyehang metsing, le tse utlwang tse phelang ka metsing, di tla ba manyala ho lona. ₁₁E hle e be manyala ho lona. Le se ke la ja nama ya tsona; le ditopo tse shweleng tsa tsona e ke e be manyala ho lona. ₁₂Tsohle tse ka metsing, tse se nang maphewana a ho hlapa le makgakgapha, e tla ba manyala ho lona.

₁₃Haele dinonyana tseo le tla re ke manyala, tse se nang ho jewa, tse tlang ho ba manyala ho lona, ke tsena: Ntsu, le seodi, le ntsu ya lewatle; ₁₄letlaka, le nkgodi, ka mefuta ya tsona; ₁₅mefuta yohle ya makgwaba; ₁₆mpshe, kgohwadira, letlakapipi, le phakwe ka mefuta ya tsona; ₁₇sephooko, seinodi, lengangane; ₁₈lehalanyane, moholodi, kokolofitwe, ₁₉mokotatsie, masianoke, ka mefuta ya tsona, le lehehemu, le mmankgane.

₂₀Diphoofotswanyana tsohle tse rurang, tse tsamayang ka maoto a mane, e tla ba manyala ho lona. ₂₁Diphoofotswanyana tse rurang, tse tsamayang ka maoto a mane, tseo le ka di jang, ke tsona feela tse nang le menoto maotong a tsona ya ho qotoma hodima lefatshe. ₂₂Tseo le ka di jang, ke tsie ka mefuta ya yona, le seongwane ka mefuta ya sona, le marutle ka mefuta ya wona, le bookgolane ka mefuta ya bona. ₂₃Empa diphoofotswanyana tse ding tse rurang kaofela, tse maoto a mane, e tla ba manyala ho lona, di tla ba ditshila ho lona. ₂₄E mong le e mong ya tlang ho ama ditopo tse shweleng tsa tsona, o tla ba sesila ho isa mantsiboya; ₂₅e mong le e mong ya jereng setopo se shweleng sa tsona, o tla hlatswa diaparo tsa hae, mme a be sesila ho isa mantsiboya.

₂₆Phoofolo tsohle tse tlhako tse arohaneng, tseo dikgola tsa tsona di seng pedi, tse sa busoloseng, di tla ba ditshila ho lona; e mong le e mong ya di amang, o tla ba sesila. ₂₇Tsohle tse maoto a mane, tse tsamayang ka maro a tsona, di tla ba sesila ho lona; e mong le e mong ya amang ditopo tse shweleng tsa tsona, o tla ba sesila ho isa mantsiboya. ₂₈Ya tlang ho jara ditopo tse shweleng tsa tsona, o tla hlatswa diaparo tsa hae, mme o tla ba sesila ho isa mantsiboya. Di tla ba sesila ho lona.

₂₉Haele diphoofotswanyana tse nyekenyehang lefatsheng, tseo le tla di tadima hore di ditshila, ke kgwiti, le tweba, le bommampharwane ka mefuta ya bona; ₃₀le hlong, le sehoho, le lekgala, le kgofu, le lenwabo. ₃₁Tseo e tla ba ditshila ho lona hara tsohle tse nyekenyehang; e mong le e mong ya tlang ho di ama ha di shwele, o tla ba sesila ho isa mantsiboya. ₃₂Ntho efe le efe eo ditopo tsa tsona di wetseng hodima yona, e tla ba sesila, leha e ka ba ntho efe le efe ya lehong, leha e le seaparo, kapa letlalo, kapa mokotla, kapa ntho efe le efe eo ho sebetswang eng le eng ka yona; e tla inwa metsing, mme e tla ba sesila ho isa mantsiboya, mme kamora moo, e tla ba e hlwekile. ₃₃Pitsa efe le efe ya letsopa eo ho welang ho hong ha tsona ho yona, e tla ba sesila, le tsohle tse ka teng di tla ba sesila le tsona, mme le tla thuha pitsa eo. ₃₄Dijo tsohle tse jewang tseo metsi a ntho tseo tse shweleng a tsholohetseng hodima tsona, di tla ba ditshila, hammoho le tse nowang kaofela, leha di le pitseng efe le efe, di tla ba ditshila. ₃₅Ntho efe le efe eo ho wetseng ntho e nngwe ya ditopo tsa tsona hodima yona, e tla ba sesila; sebopi le leifo di tla thuhakanngwa, hobane di le ditshila, mme le ho lona di tla ba ditshila. ₃₆Haele mehlodi ya didiba le mamena ao bokellwang metsi ho wona, ke tsona feela tse sa tlong ho ba ditshila; empa leha e ka ba mang ya tlang ho ama ditopo tse didibeng tseo, o tla welwa ke sesila. ₃₇Ekare ha ntho e nngwe ya ditopo tsa tsona e wetse hodima dipeo tse seng di tla jalwa, di ke se ke tsa lesa ho hlweka; ₃₈empa dipeo tseo ha di ka kolobiswa, mme ntho e nngwe ya ditopo tsa ntho tseo e ka wela hodima tsona, e tla ba sesila ho lona.

₃₉Ha ho ka shwa phoofolo e nngwe ya tseo le ka di jang, motho ya tlang ho ama setopo sa yona, o tla ba sesila ho isa mantsiboya. ₄₀Ya ka jang nama ya setopo sa yona, o tla hlatswa diaparo tsa hae, a be sesila ho isa mantsiboya; ya tlang ho jara setopo sa yona, o tla hlatswa diaparo tsa hae, a be sesila ho isa mantsiboya.

₄₁Tsohle tse hahabang fatshe e tla ba manyala ho lona; le ke ke la di etsa dijo. ₄₂Haele tse hahabang fatshe, tse kunyapang, le tse kgasang ka maoto a mane, leha a ka ba mangata, e ke ke ya eba dijo ho lona; di ditshila. ₄₃Le se ke la itshela ditshila mmeleng ya lona ka dihahabi tsohle tseo tse hahabang, mme le se ke la itshilafatsa ka ho ama manyala a tsona; ₄₄hobane ke nna Jehova, Modimo wa lona; le tshwanetse ho ikgetha, le be le halalele, hobane ke a halalela; ka baka lena, le tse ke la tshela mmele ya lona ditshila ka tse hahabang fatshe. ₄₅Hobane ke nna Jehova ya le nyolotseng naheng ya Egepeta, hore ke be Modimo wa lona. Halalelang ke hona, hobane ke a halalela.

₄₆Ke wona molao o beilweng hodima diphoofolo le dinonyana, le tse utlwang kaofela, tse nyekenyehang metsing, le tse hahabang lefatsheng kaofela, ₄₇oo le tlang ho rutwa ka wona ho kgetha se hlwekileng le se sa hlwekang, phoofolo e jewang le e sa jeweng.