JOSHUA 22

₁Yaba Joshua o bitsa Barubene, le Bagade, le ba mothapo o mong wa leloko la Manasse; ₂a re ho bona: Le bolokile tsohle tseo Moshe, mohlanka wa Jehova, a le laetseng tsona, le bile le utlwile le lentswe la ka ho tsohle tseo ke nnileng ka le laela tsona. ₃Ha le a ka la tlohela banababo lona tshiung tsena tse ngata ho fihlela kajeno; le bolokile tse tshwanetseng ho bolokwa, e leng molao wa Jehova, Modimo wa lona. ₄Mme jwale, Jehova, Modimo wa lona, o kgatholotse banababo lona, jwalokaha a ne a ba boleletse; ka baka leo, ikgutleleng jwale, le ipoelle tenteng tsa lona, fatsheng leo le le ruileng, leo Moshe, mohlanka wa Jehova, a le neileng lona mose wane wa Jordane. ₅Feela, le hlokomele haholo ho ya ka taelo le ka molao oo Moshe, mohlanka wa Jehova, a le laetseng wona, wa ho rata Jehova, Modimo wa lona, le ho tsamaya ka ditsela tsohle tsa hae, le ho boloka ditaelo tsa hae, le ho mo kgomarela, le ho mo sebeletsa ka pelo yohle le ka moya wohle. ₆Yaba Joshua o a ba hlohonolofatsa, a ba kgutlisa, mme ba ikela ditenteng tsa bona.

₇Moshe o ne a neile mothapo o mong wa leloko la Manasse lefa naheng ya Bashane; mme mothapo o mong o ne o neilwe lefa ke Joshua hammoho le banababo bona, mose o mong wa Jordane, nqa bophirimela. Joshua, ha a ba kgutlisetsa tenteng tsa bona, a ba hlohonolofatsa.

₈A re: Ipoelleng tenteng tsa lona ka maruo a maholo, ka makgomo a mangatangata, ka silefera, ka kgauta, ka koporo, ka tshepe, ka diaparo tse ngatangata, mme le arolelane le banababo lona tse hapilweng tsa dira tsa lona.

₉Ebile bana ba Rubene, le bana ba Gade, le ba mothapo o mong wa leloko la Manasse ba ikgutlela, ba siya bana ba Iseraele Silo, fatsheng la Kanana, ba ya naheng ya Gileade, e leng naha ya lefa la bona, eo ba neng ba e ruile, jwalokaha ho ne ho boletse Jehova ka Moshe.

₁₀Bana ba Rubene, le bana ba Gade, le ba mothapo o mong wa leloko la Manasse, ha ba fihla lebopong la Jordane, moeding wa naha ya Kanana, teng ba haha aletare pela Jordane, aletare e kgolo, e bonahalang. ₁₁Empa bana ba Iseraele ba utlwa ho thwe: Bonang, bana ba Rubene, le bana ba ba Gade, le ba mothapo o mong wa leloko la Manasse ba hahile aletare e pontsheng ho naha ya Kanana, lebopong la Jordane, ka nqa ka ha bana ba Iseraele. ₁₂Yare bana ba Iseraele ha ba utlwa hoo, phutheho yohle ya bana ba Iseraele ya bokana Silo ho ya ba lwantsha.

₁₃Bana ba Iseraele ba roma Finease, mora moprista Eleasare, ho bana ba Rubene, le ho bana ba Gade, le ho ba mothapo o mong wa leloko la Manasse, naheng ya Gileade, ₁₄a ena le dikgosana tse leshome, kgosana e nngwe ka ntlo e nngwe le e nngwe ya bontata meloko yohle ya Baiseraele, e nngwe le e nngwe e le hlooho ya ntlo ya bontata bona hara dikete tsa Baiseraele. ₁₅Ba tla ho bana ba Rubene, le ho bana ba Gade, le ho ba mothapo o mong wa leloko la Manasse, naheng ya Gileade, ba ba bolella, ba re: ₁₆Ho itswe ke phutheho yohle ya Jehova: Molato oo ke o jwang oo le sitetsweng Modimo wa Iseraele ka wona, ha le furaletse Jehova kajeno, le bile le ikgahetse aletare, hore le tle le fetohele Jehova na? ₁₇Na bokgopo ba Peore e bile ntho e nyenyane ho rona, boo re esong ho hlatswe ditshila tsa bona ho rona, leha lefu le ile la wela phutheho ya Modimo, ₁₈haele moo le furalla Jehova kajeno na? Hobane, ha le fela la fetohela Jehova kajeno, hosasane o tla halefela phutheho yohle ya Iseraele. ₁₉Ha ekaba lefatshe leo le le ruileng le ditshila, ha le keng le tshelele lefatsheng le ruilweng ke Jehova, moo tabernakele ya Jehova e emeng teng, mme le nke lefa hara rona; le mpe le se ke la fetohela Jehova, hape le se ke la fetohela rona, ka ho ikgahela aletare esele ho aletare ya Jehova, Modimo wa rona. ₂₀Hleka Akane, mora Sera, ha a ka a tlola molao wa tse entsweng anathema, mme phutheho kaofela ya Iseraele ya halefelwa na? Hape, le motho eo ha a ka a timela a nnotshi bokgopong ba hae.

₂₁Ebile bana ba Rubene, le bana ba Gade, le ba mothapo o mong wa leloko la Manasse, ba fetola dihlooho tsa dikete tsa Iseraele, ba re: ₂₂Modimo, Modimo, Jehova, Modimo, Modimo Jehova, o a tseba le Baiseraele bohle ba tla tseba hoo le bona — ha ekaba ke ka ho fetohela Jehova, le ka ho mo sitelwa, o se ke wa re pholosa kajeno! ₂₃Ha re ikgahetse aletare, jwaloka eka re ya furalla Jehova leha e le ho hlaba ditjheso le dinyehelo hodima yona, leha e le ho hlaba mahlabelo a teboho hodima yona Jehova e be yena ya batlang taba ena ho rona! ₂₄Athe re entse hoo ka ho tshaba, ra re: Mehleng e tlang, bana ba lona ba tla bolella bana ba rona, ba re: Na le na le taba efe le Jehova, Modimo wa Iseraele, na? ₂₅Etswe Jehova a beile Jordane e be moedi mahareng a rona le lona bana ba Rubene, le lona bana ba Gade; ha le na kabelo ho Jehova. Bana ba lona ba ne ba tla etsa hore bana ba rona ba lesele ho tshaba Jehova. ₂₆Ke moo re itseng: A re itokiseng, re ikgahele aletare, e seng ya ditjheso, leha e le ya mahlabelo; ₂₇e mpe e be bopaki mahareng a rona le lona le ditloholo tsa rona tse re hlahlamang, ba hore re na le tokelo ya ho etsa tshebeletso ya Jehova pela hae ka ditjheso tsa rona, le ka mahlabelo a rona a dipheko, le ka mahlabelo a rona a teboho; mehleng e tlang, bana ba lona ba tle ba se ke ba re ho bana ba rona: Ha le na kabelo ho Jehova.

₂₈Ra re: Ha ekaba mehleng e tlang ba ka rialo ho rona le ho ditloholo tsa rona, re tla re: Bonang mohaho wa aletare ya Jehova eo bontata rona ba e entseng, e seng ya ditjheso, leha e le ya mahlabelo, e mpe e be bopaki mahareng a rona le lona. ₂₉Ho se ke ha bolelwa hore re ka fetohela Jehova, le ho furalla Jehova kajeno ka ho haha aletare ya ditjheso, le ya dinyehelo, le ya mahlabelo, esele ho aletare ya Jehova, Modimo wa rona, e pela tabernakele ya hae!

₃₀Yaba moprista Finease, le dikgosana tsa phutheho, le dihlooho tsa dikete tsa Iseraele tse neng di na le yena, ha ba utlwa taba tse bolelwang ke bana ba Rubene, le bana ba Gade, le bana ba Manasse, ba kgolwa. ₃₁Finease, mora moprista Eleasare, a re ho bana ba Rubene, le ho bana ba Gade, le ho bana ba Manasse: Kajeno re lemohile hobane Jehova o hara rona, hobane ha le a ka la sitelwa Jehova ka tshito eo; le lokolotse bana ba Iseraele jwale matsohong a Jehova.

₃₂Ebile Finease, mora moprista Eleasare, le dikgosana, ba tloha ho bana ba Rubene, le ho bana ba Gade naheng ya Gileade, ba boela naheng ya Kanana, ho bana ba Iseraele, mme ba ba phetela ditaba. ₃₃Taba ena ya kgodisa bana ba Iseraele, mme bana ba Iseraele ba rorisa Modimo, mme ha ba ka ba hlola ba bolela hore ba ka ya ba lwantsha le ho senya lefatshe leo bana ba Rubene le bana ba Gade ba ahileng ho lona.

₃₄Haele bana ba Rubene, le bana ba Gade, ba rea aletare eo lebitso la Ede, ba re: Ke paki ho rona ya hore Jehova ke Modimo.