JOSHUA 21

₁Yaba dihlooho tsa bontata Balevi ba tla ho moprista Eleasare, le ho Joshua, mora Nune, le ho dihlooho tsa bontata meloko ya bana ba Iseraele. ₂Ba bua le bona Silo, lefatsheng la Kanana, ba re: Jehova o laetse ka Moshe hore re newe metse ya ho aha teng, meraka ya yona e be ya dikgomo tsa rona.

₃Ebile Baiseraele ba nea Balevi metse e itseng le meraka ya yona lefeng la bona, ka taelo ya Jehova.

₄Ha ho laolelwa matlo a Bakehathe, bana ba moprista Aarone, bao e leng Balevi, ba abelwa metse e leshome le metso e meraro lelokong la Juda, le lelokong la Simeone, le lelokong la Benjamine. ₅Ba bang bana ba Kehathe ba abelwa metse e leshome matlung a leloko la Efraime, le lelokong la Dane, le mothapong o mong wa leloko la Manasse. ₆Bana ba Gershone ba laolelwa metse e leshome le metso e meraro matlung a leloko la Issaskare, le lelokong la Asere, le lelokong la Nefthali, le mothapong o mong wa leloko la Manasse, Bashane. ₇Bana ba Merari ba newa ka matlo a bona metse e leshome le metso e mmedi lelokong la Rubene, le lelokong la Gade, le lelokong la Sabulone. ₈Ke wona mokgwa oo bana ba Iseraele ba laoletsweng Balevi ka wona metse eo le meraka ya yona, jwalokaha Jehova a ne a laetse ka Moshe.

₉Ba newa lelokong la bana ba Juda le lelokong la bana ba Simeone, metse e itseng e boletsweng ka mabitso a yona. ₁₀Bana ba Aarone bao e leng ba matlo a Bakehathe, bana ba Levi, ha ba kile ba laolelwa pele, ₁₁ba newa Kiryath-Arba, e leng Hebrone, dithabeng tsa Juda, le meraka ya wona e o teetseng hare; Arba e ne e le ntata Anake. ₁₂Empa masimo a metse le metsana ya yona ba e nea Kalebe, mora Jefunne, ho ba leruo la hae. ₁₃Bana ba moprista Aarone ba newa Hebrone le meraka ya wona, e le motse wa setshabelo sa mmolai; le Libna le meraka ya wona; ₁₄le Jatthire le meraka ya wona, le Eshthemoa le meraka ya wona; ₁₅le Holone le meraka ya wona, le Debire le meraka ya wona; ₁₆le Aine le meraka ya wona, le Jutta le meraka ya wona, le Bethe-Shemeshe le meraka ya wona: metse e robileng mono o le mong melokong eo e mmedi. ₁₇Lelokong la Benjamine, ke Gibeone le meraka ya wona, le Geba le meraka ya wona; ₁₈Anathothe le meraka ya wona, le Almone le meraka ya wona: metse e mene. ₁₉Metse yohle ya baprista, bana ba Aarone, ke metse e leshome le metso e meraro le meraka ya yona.

₂₀Haele ba matlo a bana ba Kehathe, e leng Balevi ba setseng ba bana ba Kehathe, ba laolelwa metse ya bona lelokong la Efraime. ₂₁Ba newa Sikeme le meraka ya wona, thabeng ya Efraime, e le motse wa setshabelo sa mmolai, le Gesere le meraka ya wona, ₂₂le Kibtsaime le meraka ya wona, le Bethe-Horone le meraka ya wona: metse e mene. ₂₃Lelokong la Dane, ke Eltheke le meraka ya wona, le Gibbethone le meraka ya wona; ₂₄Ajalone le meraka ya wona, Gaathe-Rimmone le meraka ya wona: metse e mene. ₂₅Mothapong wa leloko la Manasse ke Thaanake le meraka ya wona, le Gathe-Rimmone le meraka ya wona: metse e mmedi. ₂₆Metse yohle ya bana ba Kehathe ba setseng ya eba e leshome le meraka ya yona.

₂₇Bana ba Gershone ba matlo a Balevi ba newa, mothapong o mong wa leloko la Manasse, Golane, naheng ya Bashane, le meraka ya wona, e le motse wa setshabelo sa mmolai, le Beeshthra le meraka ya wona: metse e mmedi. ₂₈Lelokong la Issaskare, Kishone le meraka ya wona, Dabrathe le meraka ya wona, ₂₉Jarmuthe le meraka ya wona, Ene-Gannime le meraka ya wona metse e mene. ₃₀Lelokong la Asere, Mishaeale le meraka ya wona, Abdone le meraka ya wona. ₃₁Helkathe le meraka ya wona, le Rehobe le meraka ya wona: metse e mene. ₃₂Lelokong la Nefthali, Kedeshe wa Galelea le meraka ya wona, e le motse wa setshabelo sa mmolai, le Hammothe-Dore le meraka ya wona, le Karthane le meraka ya wona: metse e meraro. ₃₃Metse yohle ya Bagershone ka matlo a bona ke metse e leshome le metso e meraro le meraka ya yona.

₃₄Ba matlo a bana ba Merari ba setseng ba Balevi ba newa, lelokong la Sabulone, Jokneame le meraka ya wona, Kartha le meraka ya wona; ₃₅Dimna le meraka ya wona, Nahalale le meraka ya wona: metse e mene. ₃₆Lelokong la Rubene, Betsere le meraka ya wona, le Jahtsa le meraka ya wona; ₃₇Kedemothe le meraka ya wona, le Mefaathe le meraka ya wona: metse e mene. ₃₈Lelokong la Gade, Ramothe-Gileade le meraka ya wona, e le motse wa setshabelo sa mmolai, le Mahanaime le meraka ya wona; ₃₉le Heshbone le meraka ya wona, le Jaesere le meraka ya wona: hammoho ke metse e mene. ₄₀Metse yohle ya bana ba Merari, ka matlo a bona ba setseng ba matlo a Balevi, ya laolwa e le metse e leshome le metso e mmedi.

₄₁Metse yohle ya Balevi e lefeng la bana ba Iseraele ke metse e mashome a mane a metso e robileng meno e le mmedi le meraka ya yona. ₄₂O mong le o mong wa metse eo o ne o na le meraka ya wona e o teetseng hare; ha eba jwalo ka metse eo kaofela.

₄₃Ke wona mokgwa oo Jehova a neileng Iseraele lefatshe lohle leo a neng a hlapanyeditse bontata bona hobane o tla ba nea lona; ba le rua, mme ba aha teng. ₄₄Jehova a ba kgatholla hohle, kahohle kamoo a neng a hlapanyeditse bontata bona kateng; ha ho a ka ha eba se seng ho dira tsohle tsa bona se kileng sa tiya pela bona, kahobane Jehova a ne a neetse dira tsa bona matsohong a bona. ₄₅Ha ho a ka ha hlokeha taba leha e le nngwe ya tsohle tse molemo tseo Jehova a neng a di boleletse ntlo ya Iseraele; tsohle tsa etsahala.