Naha ya mothapo o mong wa Manasse.
1Le leloko la Manasse la laolelwa lefa, etswe e le letsibolo la Josefa. Makire ke yena letsibolo la Manasse le ntata Gileade. A newa Gileade le Bashane, hobane e ne e le mohale. 2Le bana ba bang ba Manasse ba laolelwa lefa ka matlo a bona: ke bana ba Abiesere, le bana ba Heleke, le bana ba Asriele, le bana ba Sikeme, le bana ba Hefere, le bana ba Shemida: bao ke bana ba batona ba Manasse, mora Josefa, ka matlo a bona. 3Tselofkade yena, mora Hefere, mora Gileade, mora Makire, mora Manasse, ha a ka a ba le bara, a ba le basetsana feela; mabitso a baradi ba hae ke ana: Makla, Nowe, Hogla, Milka, le Thirtsa. 4Ba tla pela moprista Eleasare, le pela Joshua, mora Nune, le pela baholo, ba re: Jehova o ne a laele Moshe ho re nea lefa hammoho le banababo rona. Ebile ba fuwa lefa hammoho le banababo ntata bona, ka taelo ya Jehova. 5Manasse a abelwa jwalo karolo tse leshome kantle ho lefatshe la Gileade le Bashane, le mose wane wa Jordane; 6hobane baradi ba Manasse ba kile ba newa lefa hammoho le bara ba hae; bara ba Manasse ba bang ba newa lefatshe la Gileade.
7Moedi wa Manasse o tloha Asere ho isa Mikmethathe o pela Sikeme; moedi o ntoo leba ka ho le letona ho fihla moo ho ahileng ba Ene-Thappua. 8Manasse a fuwa naha ya Thappua, empa Thappua, naheng ya Manasse, ke wa bana ba Efraime. 9Moedi eba o theohela nokeng ya Kana, nqa borwa ho noka. Metse eo ya Efraime e hara metse ya Manasse. Moedi wa Manasse eba o ya nqa leboya ho noka, mme o ya fella lewatleng. 10Nqa borwa naha ke ya Efraime, nqa leboya ke ya Manasse, mme lewatle ke moedi wa bona; moedi o teana le wa Asere nqa leboya, le wa Issaskare nqa botjhabela. 11Fatsheng la Issaskare le la Asere, Manasse a newa Bethe-Sheane le metse ya teng, le Jibleame le metse ya teng, le ba ahileng Dore le metseng ya teng, le ba ahileng Ene-Dore le metseng ya teng, le ba ahileng Thaanake le metseng ya teng, le ba ahileng Megiddo le metseng ya teng, le diqepho tse tharo.
12Empa bana ba Manasse ba sitwa ho rua metse eo; Bakanana ba pheella ho dula lefatsheng leo. 13Eitse mohla bana ba Iseraele ba leng matla, ba ntshisa Bakanana lekgetho, ba mpa ba se ke ba ba leleka ruri.
14Ebile bana ba Josefa ba bolella Joshua, ba re: O re neile keng karolo e le nngwe le seabo se le seng feela, ho ba lefa la rona na, athe re batho ba bangata, mme Jehova o re hlohonolofaditse ho fihlela jwale? 15Joshua a re ho bona: Ha le le batho ba bangata, eyang morung, le ikgathele teng fatsheng la Baferese le la Barefaime, ha thaba ya Efraime e sa le lekane. 16Bana ba Josefa, ba re: Thaba e ke ke ya re lekana, hobane Bakanana kaofela ba dutseng lehwatateng ba na le makoloi a tshepe; ke ba Bethe-Sheane le metse ya teng, le ba lehwatateng la Jisreele. 17Joshua a bolella ba ntlo ya Josefa, Baefraime le Bamanasse, a re: Empa le batho ba bangata, le matla haholo, le ke ke la ba le seabo se le seng feela; hobane thaba e tla ba ya lona; 18leha e le moru le tla ikgathela teng, le phello ya wona e tla ba ya lona; hobane le tla leleka Bakanana, leha ba ena le makoloi a tshepe, hape ba le matla.
