JOBO 34

₁Yaba Elihu o isetsa polelo ya hae pele, a re: ₂Lona banna ba bohlale, utlwang taba tsa ka! Ntshekeheleng ditsebe, lona banna ba ditaba! ₃Hobane tsebe e leka ditaba, jwalokaha mahalapa a latswa dijo. ₄A re batleng se lokileng, re boneng hammoho se leng molemo!

₅Hobane Jobo o itse: Ke lokile, mme Modimo o nkamohile toka ya ka; ₆ke etswa motho ya leshano, ha ke emela toka ya ka; ke hlabilwe ka motsu o bolayang, ke se na molato. ₇Motho ke mang ya jwaloka Jobo, ya nwang nyefolo jwaloka metsi; ₈ya dulang mokgatlong wa ba babe, ya tsamayang le bakgopo? ₉Hobane o itse: Motho ha a rue letho, leha a thabetse Modimo.

₁₀Lona, banna ba kutlwisiso, nkutlweng. Modimo o ke ke wa etsa bobe le ho leka; Ya matla wohle ha ho kamoo a ka etsang bokgopo kateng! ₁₁Empa o busetsa ho motho ho lekanang le mesebetsi ya hae, o mo fumantsha ho lekanang le mekgwa ya hae. ₁₂Ruri, Modimo o ke ke wa etsa ho sa lokang; Ya matla wohle a ke ke a kgopamisa ho loka. ₁₃Ke mang ya beileng lefatshe taelong ya wona? Kapa ke mang ya beileng lefatshe kaofela paballong ya wona? ₁₄Hola o ikgopola o le mong, hola o boela o inkela moya wa wona le pululo ya wona, ₁₅nama yohle e ne e tla shwa hang, mme motho o ne a tla kgutlela leroleng.

₁₆Jwale, ha ekaba o ena le kutlwisiso, mamela taba ena, o ele lentswe la dipolelo tsa ka hloko. ₁₇Ya hloyang ho loka na o ne a ka rena na? Kapa o ka tswa jwang ya nang le ho loka hohle, ₁₈ya tumisang bokgopo ba marena le bolotsana ba mahosana, ₁₉ya sa kgetheng tshobotsi ya baholo, ya sa rateng morui ho ena le mofumanehi; etswe bohle e le mosebetsi wa matsoho a hae? ₂₀Ba ye ba shwe hang, hara bosiu; setjhaba se ye se heletswe, se timele; ba matla ba tloswa, e seng ka letsoho la motho. ₂₁Hobane mahlo a wona a tadimile mekgwa ya batho bohle, mme o bona metsamao ba yona kaofela. ₂₂Ha ho lefifi, ha ho moriti o motsho, moo ba sebetsang bokgopo ba ka ipatang teng. ₂₃Hobane ha o batle nako e telele ho tseba motho ya tshwanetseng ho hlaha kahlolong pela wona. ₂₄O thubakanya ba matla, o sa botse letho hodima bona, o bea ba bang ditulong tsa bona; ₂₅hobane o tseba mesebetsi ya bona; o ba diha bosiu, mme ba thubakanngwa. ₂₆O ba bolaya pontsheng ya bohle, kaha e le disenyi. ₂₇Hobane ba o furaletse, mme ha ba ka ba hlokomela ditsela tsa wona; ₂₈ba nyoloseditse mehoweletso ya basenyehi ho wona, mme o utlwile dillo tsa bahlomohi. ₂₉Ha o lokisa ditaba jwalo, ke mang ya tla nyatsa? Mme ha o ka pata sefahleho sa wona, ke mang ya ka o bonang? O busa ditjhaba le batho ka mokgwa o jwalo; ₃₀hore motho ya bolotsana a se ke a busa, a se ke a dihela setjhaba. ₃₁Hobane na o teng ya ka reng ho Modimo: Ke otlilwe, leha ke se na molato; ₃₂o mpontshe seo ke sa se boneng; ha ekaba ke entse bokgopo, ha ke sa tla hlola ke etsa jwalo!

₃₃A Modimo o tla ya ka wena, ha o putsa motho na? O re, ha o kgolwe ke molao oo o yang ka wona! A e be wena, e seng nna, ya kgethang o mong molao; hlahisa seo o se tsebang! ₃₄Banna ba kutlwisiso ba tla bolela jwaloka nna, le motho ya bohlale ya mmametseng o tla re: ₃₅Jobo ha a ka a bua ka bohlale, ditaba tsa hae ke tse sa utlwahaleng. ₃₆Takatso ya ka ke hoba Jobo a lekwe ho isa qetellong haele mona a arabile ka mokgwa wa ba babe. ₃₇Hobane o ekeleditse sebe sa hae ka ho ikgantsha; hara rona o a ithoka, o eketsa ho bua ditaba tse lwantshang Modimo.