JOBO 31

₁Ke ne ke hlabe selekane le mahlo a ka, sa hore nke ke ka tadima morwetsana! ₂Hobane ke be nka bona kabelo e jwang hodimo ho Modimo, mme ke be nka bona lefa lefe lehodimong ho Ya matla wohle? ₃Tshenyeho na hase ya mosenyi na? le tahleho na ha ya beelwa ba sebetsang bokgopo na? ₄Na ha o bone ditsela tsa ka na? Na ha o bale mehato ya ka kaofela na?

₅Ha eba nkile ka tsamaya ka leshano, leha eba leoto la ka le phakisitse ho thetsa, ₆[Modimo o ke o ntekanye ka sekala sa ho loka, mme o tla fihlela hoba ha ke na molato] ₇ha ekaba mehato ya ka e kgelohile tsela ya wona, kapa pelo ya ka ha e lateletse takatso ya mahlo a ka, ditshila tsa ba tsa kgomarela matsoho a ka; ₈ha ho ka ba jwalo, nke ke leme, mme e mong a kotule, mahlomela a ka a ke a fotholwe.

₉Ha ekaba pelo ya ka e kile ya thetswa ke mosadi, kapa ha nkile ka lalla monyako wa eo ke ahisaneng le yena, ₁₀ha ho ka ba jwalo, mosadi wa ka a silele e mong, mme a fejwe ke ba bang; ₁₁hobane hoo ke sebe se tshabehang, ke bokgopo bo tshwanetseng ho otlwa ke baahlodi. ₁₂Efela ke mollo o ka tjhang ho isa sehokong, o tshwanetseng ho fothola maruo a ka kaofela.

₁₃Ha ekaba ke hanne tokelo ya mohlanka wa ka e motona, kapa ya e motshehadi, mohla ba tsekisanang le nna, ₁₄ke ne ke tla etsa jwang, hoja Modimo o ne o ka tsoha, le hoja o ne o ka batlisisa ditaba, ke be ke tla reng ho wona? ₁₅Ha ke re, ya mpopileng popelong, le eo o mmopile na? Na hase wona o re entseng popelong ya mosadi na?

₁₆Ha ekaba ke ne ke hane thapelo ya mofutsana, ka lebellisa mosadi wa mohlolohadi, a ba a khathala mahlo, ₁₇leha ekaba ke jele bohobe ba ka ke nnotshi, ke sa ka ka bo ngwathela kgutsana; ₁₈[athe, e sa le botjheng ba ka, o holetse ho nna, ka ba ho yena jwaloka ntatae, mme ke tsamaisitse mosadi wa mohlolohadi haesale ke etswa popelong ya mme] ₁₉ha ekaba nkile ka bona e mong ya timelang a se na diaparo, kapa mofumanehi ya hlokang seo a ikapesang ka sona, ₂₀mme matheka a bona a sa ka a ntlhohonolofatsa, mme ba sa ka ba futhumala ka boya ba dikonyana tsa ka; ₂₁ha ekaba letsoho la ka le kile la otla kgutsana, kahobane ke bone ha ke emetswe ke ba dutseng kgorong; ₂₂ha ho ka ba jwalo, lehetla la ka a le ke le we makopanong a lona, mme letsoho la ka le we, le robehe. ₂₃Hobane teng, ditefetso tsa Modimo di ne di tla ntshosa, ke ne ke tla sitwa ho ema pela bophahamo ba wona.

₂₄Ha ekaba ke entse kgauta tshepo ya ka, ka ba ka re ho kgauta e hlwekileng: Tshepo ya ka e ho wena; ₂₅ha ekaba ke nyakalletse boholo ba maruo a ka le tse ngata tse bokeletsweng ke matsoho a ka; ₂₆ha ekaba nkile ka boha letsatsi ha le kganya, kapa kgwedi ha e tsamaya ka kganya ya yona, ₂₇pelo ya ka ya ba ya thetswa ka sephiring, ka isa letsoho melomong ho le aka; ₂₈le teng e be e tla ba sebe se tshwanetseng ho otlwa ke baahlodi, hobane ho etsa jwalo ke ho latola Modimo o phahameng.

₂₉Ha ekaba nkile ka thabela tshenyeho ya eo e neng e le sera ho nna, ka hlasimoloha mohla ditlokotsi di mo welang hodimo; ₃₀[athe ha ke a ka ka dumella molomo wa ka ho seba, ka ho kopela bophelo ba hae thohako] ₃₁ha ekaba batho ba ntlo ya ka ba ne ba sa bue, ba re: O kae ya sa kang a kgora dijo tafoleng ya hae? ₃₂ha eba hase nnete hobane moeti o ne a se na ho hlola bosiu kantle, hobane ke ne ke ntse ke buletse baeti monyako wa ka; ₃₃ha eba ke apesitse bokgopo ba ka ka mokgwa wa batho, ka pata melato ya ka fubeng sa ka, ₃₄ka ho tshaba bongata, le kahobane nyatso ya setjhaba e ne e ntshosa, mme ka itholela, ke sa tswele ntle ho monyako wa ka! ... ₃₅Hola ke na le ya nkutlwang! Bonang, tiiso ya letsoho la ka ke ena! Hola Ya matla wohle a ka mphetola! Hola lengolo le le teng la ya nqosang molato! ₃₆Nka be ke fela ka le jara ka lehetla la ka, nka ba ke le rwala phatleng jwaloka moqhaka! ₃₇Ke be ke tla mo phetela metsamao ya ka kaofela, mme jwaloka morena ke ne ke tla mo atamela!

₃₈Ha ekaba tshimo ya ka e a nqosa, mme ditema tsa yona di lla hammoho; ₃₉ha ekaba ke jele letshere la yona ke sa ka ka lefa, ka ba ka llisa pelo ya monga yona; ₄₀teng, ho ke ho mele meutlwa bakeng sa koro, le lehola bakeng sa harese.

Dipolelo tsa Jobo di fella moo.