JOBO 29

₁Jobo a eketsa a isa polelo ya bohlale ya hae, a re: ₂Hola nka boela ka bona kgwedi tse jwaloka tsa mohla monene, le ditshiu tsa mohla Modimo o neng o mpoloka! ₃Mehleng eo, lebone la wona le ne le kganyetsa hlooho ya ka; ka lesedi la wona ke ne ke tseba ho tsamaya hara lefifi. ₄Hola nka boela ka ba jwaloka matsatsing a nala ya ka, ha Modimo o ne o dula tenteng ya ka jwaloka motswalle; ₅ha Ya matla wohle a ne a na le nna, mme bana ba ka ba nteetse hare; ₆ha maoto a ka a ne a hlatsweha lebeseng, mme lefika le ne le ntswela melatswana ya ole.

₇Enere ha ke tswela kgorong ya motse, ke ne ke bea setulo sa ka lebaleng la yona; ₈ha ke atamela, ba batjha ba ne ba ntshuthela, ba hodileng ba ne ba raoha, ba ema; ₉mahosana a ne a lesa ho bua, a bea matsoho melomong ya wona; ₁₀lentswe la baeletsi le ne le kgutsa, leleme la bona le ne le kgomarela mahalapa a bona; ₁₁tsebe e neng e nkutlwa, e ne e re ke lehlohonolo; leihlo le neng le mpona, le ne le nthorisa. ₁₂Ke hobane ke ne ke lwela mosenyehi, ha a kopa thuso, le kgutsana e hlokileng mothusi; ₁₃ke ne ke hlohonolofatswa ke ya neng a le lekgatheng la ho timela, ka kenya thabo pelong ya mosadi wa mohlolohadi; ₁₄ke ne ke ikapesa ka ho loka, mme ho ne ho nkwahela; toka e ne e le kobo ya ka le moqhaka wa ka; ₁₅ke ne ke le mahlo a sefofu; maoto a sehlotsa e ne e le nna; ₁₆ke ne ke le ntata mofutsana, ke ne ke botsisisa taba ya motho leha ke sa mo tsebe; ₁₇ke ne ke roba meno a ya bolotsana, ke ne ke hlwibila thusolelo menong a hae. ₁₈Ke ne ke lekanya, ke re: Ke tla shwa ditaong tsa ka, ke tla atisa matsatsi a ka jwaloka lehlabathe; ₁₉motso wa ka o tla namela pela metsi, phoka e hlole bosiu makaleng a ka; ₂₀kganya ya ka e tla ntjhafala kamehla, seqha sa ka se matlafale letsohong la ka.

₂₁Ba ne ba sekeha tsebe ho nna, ba lebeletse, ba ne ba kgutsa ha ke eletsa. ₂₂Ho ne ho se e mong ya fetolang taba tsa ka ha ke se ke buile, ha ditaba tsa ka di rothotha hodima bona; ₂₃ba ntebella jwalokaha ho lebellwa pula, ba ahlamisa melomo ya bona jwaloka hola ba amohela pula ya lehwetla. ₂₄Ke ne ke ba tsheha, ha ba tsieleha, ba se ke ba tseba ho tlosa ho ela sefahlehong sa ka. ₂₅Ka ba kgethela tsela, ka dula sehloohong, ka ba jwaloka morena hara bongata, le jwaloka ya tshedisang ba llang.