JOBO 26

₁Jobo a fetola, a re: ₂O thusitse hakaakang ya se nang matla! O tiisitse hakaakang letsoho le tepeletseng! ₃O eleditse hakaakang ya hlokang hlalefo, mme o boletse tsebo ya sebele hakaakang! ₄Taba tseo o di bolella mang? Ke moya wa mang o tswang molomong wa hao?

₅Diriti di thothomela katlasa metsi le ba ahileng ho wona. ₆Nqalo ya bafu e feela pela wona; ho wona bodiba ha bo na tshirelo. ₇O ne o ale boputswa ba leboya hodima sebaka se feela, wa fanyeha lefatshe hodima bodiba. ₈O thibela metsi marung a wona, mme maru ha a phatlohe ka boima ba wona. ₉O kwahela metheo ya terone ya wona, o e apesa ka maru a wona. ₁₀O dikadikeditse sebaka sa metsi ka sedikwadikwe, ho kgutla moo lesedi la arohanang le lefifi. ₁₁Ditshiya tsa mahodimo di a tlakasela, di sisimoloha ka kgalemelo ya wona. ₁₂Ka matla a wona a kokomosa lewatle, ka bohlale ba wona o kokobetsa ho phahama ha lona. ₁₃Pudulo ya wona e edisa mahodimo; letsoho la wona le hlaba drakone e lebelo. Bonang, tseo ke bokantle ba ditsela tsa wona; ₁₄ka ditsebe tsa rona re utlwa wewetso e nyenyane ya tsona. Empa seaduma sa matla a wona, ke mang ya ka se utlwang?