JOBO 16

₁Jobo a fetola, a re: ₂Ditaba tse jwaloka tseo ke se ke kgotshe tsona; kaofela ha lona le batshedisi ba kgathatsang. ₃Dipolelo tsa lefeela na di fedile na? Kapa se o arabisang hathata jwalo keng? ₄Le nna, ke ne nka bua jwaloka lona, hoja le dutse ditulong tsa ka; nka be ke loha ditaba hodima lona, ka oma ka hlooho ho lona; ₅nka be ke le matlafisa ka molomo wa ka, ka le tiisa ka ho bebenya ha melomo ya ka.

₆Leha nka bua, bohloko ba ka bo ke ke ba kgutsa; mme leha nka lesa, nka bona thuso kae? ₇E, o mphokodisitse hampe, ... o ripitlile ntlo ya ka kaofela; ₈o ntshwere ka thata, mme hoo ke paki e nqosang, ho ota ha ka ho ema ho nketselletsa, le ho nqosa pontsheng. ₉Ke haholwa ke kgalefo ya wona; o ikentse sera ho nna, o phuranya meno ho nna; eo e leng sera ho nna o ntlhaba ka mahlo a bohale. ₁₀Ba ahlamile melomo ya bona hampe hodima ka, ba ntshoma, ba ntjabela marameng; ba teane hammoho ho ntwantsha. ₁₁Modimo o nneetse matsohong a ba bolotsana, o nkakgetse diatleng tsa ba babe.

₁₂Ke ne ke phela hantle, empa o nthobile; o ntshwere ka molala, o nthobakile; o mpeile sebeo sa ho phosa ha wona. ₁₃Metsu ya wona e nkwetse hodimo, e etswa nqa tsohle; o ntlhabile matheka, o se na mohau; wa tsholla nyoko ya ka fatshe; ₁₄wa nntsha leqeba hodima leqeba, wa mphallela jwaloka mohale. ₁₅Ke apesitse letlalo la ka ka lesela le mahwashe, mme ka silafatsa lenaka la ka ka lerole. ₁₆Sefahleho sa ka se rurusitswe ke dillo, botsho ba lefu bo apesitse dintshi tsa ka. ₁₇Leha ho le jwalo, ha ke pate letho le sa lokang letsohong la ka, thapelo ya ka e hlwekile.

₁₈Wena, lefatshe, o se ke wa pata madi a ka! mohoweletso wa ka o se ke wa kgutsa! ₁₉Le jwale, bonang, paki ya ka e mahodimong, mme molatoledi wa ka o nqalong tse hodimodimo. ₂₀Leha metswalle ya ka e fetohile basomi, mahlo a ka a lebile ho Modimo ka meokgo; ₂₁hore o emele motho ho Modimo, le ngwana motho ho metswalle ya hae; ₂₂hobane ho sa tla feta dilemo tse seng kae, ke ntoo ikela ka tsela eo nke keng ka kgutla ka yona.