JOBO 14

₁Motho ya tswetsweng ke mosadi o na le matsatsi a se makae, mme o kgotshe ditsietsi. ₂O a mela, o kgaolwa jwaloka palesa, o feta jwaloka seriti, mme ha a hlole a eba teng. ₃Ke yena eo o mo tjamelang; ke nna eo o mo isang tsekong le wena! ₄Na ho ka ntshuwa motho ya hlwekileng mothong ya ditshila? Le hanyenyane. ₅Erekaha matsatsi a hae a beilwe, mme palo ya dikgwedi tsa hae e tsejwa ke wena, ha o beile moedi oo a ke keng a o tlola, ₆o tlose mahlo a hao ho yena, o mo fe sebaka, hore a tle a be a thabe jwaloka ya thotsweng, ha a thabela letsatsi leo a le sebeditseng.

₇Hobane tshepo e teng bakeng sa sefate; leha se ka rengwa, se ka boela sa mela, ha se lese ho hlomela; ₈leha motso wa sona o ka tsofala mobung, mme kutu ya sona e ka shwela leroleng, ₉ha se utlwa metsi se tla tsoha, se hlomele, se medise makala jwaloka setlama se setjha. ₁₀Empa motho ha a eshwa, o fedile matla; ere ha ya shwang a neela moya, eba o kae na? ₁₁Metsi a ye a fele letsheng, mme melatswana e ye e pshe, e omelle; ₁₂motho le yena o ye a robale, mme ha a sa tsoha; ho fihlela lehodimo le eba siyo, ho ke ke ha tsohuwa ke motho, a ke ke a phaphama borokong ba hae.

₁₃Jo! hola o ka mpata nqalong ya bafu! Hola o ka nkwahela teng, kgalefo ya hao ya ba ya feta, wa mpeela letsatsi leo o tla nkgopola ka lona! ₁₄Hoja motho ya shwang a ka boela a phela, ke be nka mamella ka matsatsi wohle a ntwa ya ka, ho be ho fihle se seng bakeng sa ka; ₁₅o ne o tla bitsa, ke ne ke tla araba, mme o ne o tla hlolohelwa mosebetsi wa matsoho a hao! ₁₆Empa jwale, o bala mehato ya ka, o hlokometse dibe tsa ka. ₁₇Ho tlola ha ka ho manehelletswe mokotleng, o tiisitse makgopo a ka.

₁₈Thaba di a wa, di a fela, lefika le theteha bodulong ba lona; ₁₉metsi a fata majwe, diphororo di ya le lerole la lefatshe; o senya tshepo ya motho jwalo. ₂₀O mo qala kamehla, a be a ikele; o sosobanya sefahleho sa hae, o be o mo kgutlise. ₂₁Bara ba hae leha ba hlonephuwa, ha a tsebe; leha ba fumaneha, ha a ba lemohe. ₂₂Ke bakeng sa hae feela nama ya hae e utlwang bohloko; ke bakeng sa hae a nnotshi moya wa hae o swabang.