Jeremia o tsekisana le Hanania, moporofeta wa bohata.
1Selemong sona seo, tshimolohong ya puso ya Tsedekia, morena wa Juda, selemong sa bone, ka kgwedi ya bohlano, Hanania, mora Assure, moporofeta wa Gibeone, a mpolella ditaba pontsheng ya baprista le ya setjhaba kaofela ka tlung ya Jehova, a re: 2Ho itswe ke Jehova wa makgotla, Modimo wa Iseraele: Ke ya roba joko ya morena wa Babilona. 3Dilemo tse pedi ha di eso ho phethehe, ke tla busetsa nqalong ena mafiso kaofela a ntlo ya Jehova, ao Nebukadnesare, morena wa Babilona, a a nkileng nqalong ena, mme a ile le wona Babilona. 4Le Jekonia, mora Jojakime, morena wa Juda, le ba kgolehong kaofela ba Juda ba ileng Babilona, ke tla ba busetsa nqalong ena, ho bolela Jehova, hobane ke tla roba joko ya morena wa Babilona.
5Yaba moporofeta Jeremia o fetola Hanania moporofeta, pontsheng ya baprista le pontsheng ya setjhaba kaofela se emeng ka tlung ya Jehova; 6moporofeta Jeremia a re: A ho be jwalo! Jehova a ke a etse jwalo! Jehova a ke a etsahatse lentswe la hao leo o le porofetileng bakeng sa ho busetsa nqalong ena mafiso a ntlo ya Jehova, le bohle ba leng kgolehong Babilona! 7Feela, o mamele lentswe lena leo ke o bolellang lona ditsebeng tsa hao le ditsebeng tsa setjhaba kaofela: 8Ba porofeta ba bileng teng pele ho nna le pele ho wena, mehleng ya kgale, ba nnile ba porofeta bakeng sa mafatshe a mangata le sa mebuso e meholo hore ntwa le tlala le lefu la sewa di tla ba teng. 9Haele moporofeta ya porofetang tsa kgotso, ha lentswe la moporofeta eo le ka etsahala, moporofeta eo o tla tsejwa kahoo hobane o romilwe ke Jehova kannete.
10Yaba moporofeta Hanania o nka joko molaleng wa moporofeta Jeremia, a e robakanya. 11Hanania a bolela pontsheng ya setjhaba kaofela, a re: Ho itswe ke Jehova: Ke tla robakanya jwalo joko ya Nebukadnesare, morena wa Babilona, molaleng wa ditjhaba tsohle, dilemo tse pedi ha di eso ho phethehe. Mme moporofeta Jeremia a ikela ka tsela ya hae.
12Yaba lentswe la Jehova le tla ho Jeremia, ha moporofeta Hanania a setse a robakantse joko molaleng wa moporofeta Jeremia, la re: 13Eya, o bolelle Hanania, o re: O robakantse joko ya sefate, empa o tla etsa joko ya tshepe bakeng sa yona. 14Hobane ho itswe ke Jehova wa makgotla, Modimo wa Iseraele: Ke bea joko ya tshepe molaleng wa ditjhaba tseo tsohle, di tle di sebeletse Nebukadnesare, morena wa Babilona, mme di tla nne di mo sebeletse; ke mo neile le diphoofolo tsa naha.
15Mme moporofeta Jeremia a bolella Hanania moporofeta, a re: Mamela hle, Hanania: Jehova ha a ka a o roma, mme wena o hlile wa tshepisa setjhaba sena ka leshano. 16Ka baka leo, ho itswe ke Jehova: Bona, ke ya o hlakola lefatsheng, o ya shwa monongwaha, hobane o bile wa bolela kweneho bakeng sa Jehova. 17Mme Hanania moporofeta a shwa selemong sona seo, ka kgwedi ya bosupa.
