BAAHLODI 9

₁Abimeleke, mora Jerubbaale, a ya Sikeme ho bomalomae, mme a bua le bona, a bua hape le bohle ba ntlo ya ntata mmae, a re: ₂A le keng le bueng le beng ba Sikeme, le re: Haele ho buswa ke batho ba mashome a supileng, bao e leng bohle bana ba Jerubbaale, kapa e le ho buswa ke motho a le mong feela, ho molemo ho lona ke hofe na? Hape, le hopole hobane ke nna masapo a lona le nama ya lona. ₃Bomalomae ba mmolela ka taba tsena tsohle ho beng bohle ba Sikeme; mme dipelo tsa bona tsa sekamela Abimeleke, ba re: Ke ngwanabo rona. ₄Ba mo nea ditjhelete tse mashome a supileng tsa ntlo ya Baale-Berithe, mme ka tsona Abimeleke a lefa batho ba lefeela, ba mekgwa e mebe, hore ba tle ba mo latele. ₅A ntoo ya tlung ya ntatae Ofra, mme a bolaya banababo, bara ba Jerubbaale, batho ba mashome a supileng, hodima lefika le le leng; ha pholoha Jothame feela, mora e monyenyane wa Jerubbaale, hobane o ne a ipatile. ₆Yaba beng bohle ba Sikeme, le bohle ba ntlo ya Millo, ba phutheha, ba ya, ba bea Abimeleke morena, haufi le eike ya seemahale se Sikeme.

₇Jothame a tsebiswa hoo, a ba a ya ema qhoweng ya thaba ya Gerisime, a phahamisa lentswe la hae, a howa, a re ho bona: Nkutlweng, beng ba Sikeme, Modimo o tle o le utlwe le lona. ₈Ka tsatsi le leng, difate tsa tloha ho ya itlotsetsa morena, tsa tla, tsa re ho mohlwaare: Eba morena wa rona. ₉Mohlwaare wa re ho tsona: Nka tlohela ole ya ka jwang, eo ke roriswang ke Modimo le batho ka baka la yona, hore ke ye ho okamela difate tse ding na? ₁₀Yaba difate di re ho sefate sa feiye: Tloo, wena, o be morena wa rona. ₁₁Sefate sa feiye sa re ho tsona: Nka tlohela monate wa ka jwang, leha e le ditholwana tsa ka tse monate, hore ke ye ho okamela difate tse ding na? ₁₂Yaba difate di re ho morara: Tloo, wena, o be morena wa rona. ₁₃Morara wa re ho tsona: Nka tlohela jwang veine ya ka e thabisang Modimo le batho, hore ke ye ho okamela difate tse ding na? ₁₄Yaba difate tsohle di bolella moutlwa, tsa re: Tloo, wena, o be morena wa rona. ₁₅Moutlwa wa re ho difate: Ha ekaba ke ka nnete le ntlotsang hore ke be morena wa lona, tlong, le tshabele moriting wa ka; ha ho se jwalo, mollo o ke o tswe moutlweng, o je dikedare tsa Lebanone.

₁₆Jwale, ha ekaba le entse ka nnete le ka bokgabane, ha le beile Abimeleke morena, mme ha ekaba le re, le entse Jerubbaale le ntlo ya hae hantle, la busetsa ho yena ka tshwanelo ya mosebetsi wa matsoho a hae, ₁₇etswe ntate a le lwanetse, a sa re letho ka bophelo ba hae, a le namolela matsohong a Bamidiane; ₁₈athe kajeno, lona le kwenehetse ntlo ya ntate, le bile le bolaile bara ba hae, batho ba mashome a supileng, hodima lefika le le leng, mme le beile Abimeleke, mora lekgabunyane la hae, morena wa beng ba Sikeme; ka ho re, ke ngwanabo lona; ₁₉ha le tiisa, le re kajeno le entse Jerubbaale le ntlo ya hae ka nnete le ka bokgabane, thabelang Abimeleke, le yena a ke a le thabele! ₂₀Ha ho se jwalo, mollo o ke o tswe ho Abimeleke, mme o je beng ba Sikeme le ba ntlo ya Millo; mollo o ke o tswe le ho beng ba Sikeme le ba ntlo ya Millo, mme o je Abimeleke! ₂₁Yaba Jothame o tloha, a baleha, a ya Beere, mme a dula teng ke ho tshaba Abimeleke ngwanabo.

₂₂Abimeleke a busa Baiseraele ka lemo tse tharo. ₂₃Modimo wa romela moya o mobe mahareng a Abimeleke le beng ba Sikeme, beng ba Sikeme ba ba ba etsa Abimeleke ka lonya, ₂₄e le hore molato wa polao ya bara ba Jerubbaale ba mashome a supileng, le madi a bona a busetswe ho ngwanabo bona Abimeleke ya ba bolaileng, le ho beng ba Sikeme ba mo thusitseng ho bolaya banababo. ₂₅Beng ba Sikeme ba bea batho ho lalla diqhoweng tsa dithaba, mme ba hlakola dintho tsa bohle ba fetang ka tsela e pela bona; mme Abimeleke a tsebiswa.

₂₆Mohlang oo, ha tla Gaale, mora Ebede, a ena le banababo; ba kena le Sikeme, mme beng ba Sikeme ba mo tshepa. ₂₇Ba tswela naheng, ba kotula masimo a bona a merara, ba hata ditholwana tsa yona, ba etsa dinyehelo; ba kena tlung ya modimo wa bona, ba eja, ba enwa, mme ba rohaka Abimeleke. ₂₈Gaale, mora Ebede, a re: Abimeleke ke mang, mme Sikeme ke mang, ha ho thwe, re mo sebeletse? Na hase mora Jerubbaale, mme tona ya hae hase Sebule na? Sebeletsang banna ba Hamore, ntata Sikeme! Haele rona, ke ha re mo sebeletsa ka baka lang? ₂₉Hoja ebe tjhaba sena se buswa ke nna, nka be ke lelekisa Abimeleke! Mme a re ho Abimeleke: Bokella makgotla a hao, o tswe.

₃₀Sebule, mong a motse, ha a utlwa mantswe a Gaale, mora Ebede, a ba bohale haholo. ₃₁A romela Abimeleke manqosa ka sephiring, a re: Bona, Gaale, mora Ebede, le banababo, ba tlile Sikeme, mme o ka bona, ba se ba o tsosetsa motse. ₃₂Ha ho le jwalo, tsoha bosiu, wena le batho bao o nang le bona, mme o lalle naheng. ₃₃Ka meso, ha letsatsi le tjhaba, o tlohe, mme o patele motse; bona, Gaale le batho bao a nang le bona ba tla tswela ho o lwantsha, mme o tla mo etsa kamoo o tla hopola kateng.

₃₄Yaba Abimeleke o tsohela bosiu, a ena le batho bohle bao a nang le bona, ba lalla Sikeme, ba entse dihlopha tse nne. ₃₅Gaale, mora Ebede, a tswa, a ema kgorong ya motse. Abimeleke le batho bao a nang le bona ba tloha moo ba laletseng teng. ₃₆Eitse ha Gaale a bona batho bao, a re ho Sebule: Bona, batho ke bane ba theohang dihlorong tsa dithaba. Sebule a re ho yena: O bona moriti wa dithaba, o re ke batho. ₃₇Gaale a bua hape, a re: Batho ke bane ba theohang diphahameng, ho bile ho na le lekgotla le leng hape le tlang ka tsela ya eike ya Dinohe. ₃₈Sebule a re ho yena: Taba ya hao e kae jwale eo o e boletseng, wa re: Abimeleke ke mang, ha ho thwe, re mo sebeletse? Batho bao na hase bao o neng o ba nyedisa na? Tswa jwale, o lwane le bona. ₃₉Gaale a tswa pontsheng ho beng ba Sikeme, mme a lwana le Abimeleke. ₄₀Abimeleke a mo phallela, Gaale a baleha, mme ba bangata ba wa ba bolailwe, ho ya fihla kgorong. ₄₁Abimeleke a ema Aruma, Sebule yena a leleka Gaale le banababo, hore ba se hlole ba aha Sikeme.

₄₂Ka le hlahlamang, batho ba tswela naheng, mme Abimeleke a tsebiswa. ₄₃Yaba o nka batho ba hae, a ba arola hlopha tse tharo, mme a ba bea ho lalla naheng. Eitse ha a tadima, a bona batho ba etswa motseng; mme a nehella ho bona, a ba bolaya. ₄₄Abimeleke le dihlopha tseo a nang le tsona ba titima, ba fihla kgorong ya motse; hlopha tse pedi tse ding tsona tsa phallela bohle ba naheng, tsa ba bolaya. ₄₅Abimeleke a ba lwantsha tsatsi lena lohle, a ba a kena motse, a bolaya batho ba teng, mme a heletsa motse, a o jala letswai.

₄₆Beng bohle ba tora ya Sikeme, ha ba utlwa hoo, ba kena qhobosheaneng ya ntlo ya Ele-Berithe. ₄₇Abimeleke a tsebiswa, ha thwe: Beng bohle ba tora ya Sikeme ba phuthehile hammoho. ₄₈Yaba Abimeleke o hlwa thabeng ya Tsalmone, a ena le batho bohle bao a nang le bona; Abimeleke a nka selepe ka letsoho la hae; a rema lekala la sefate, a le nka, a le bea lehetleng, a re ho batho bao a nang le bona: Phakisang le etse jwalokaha le mpone ke etsa. ₄₉Kahoo, batho bohle ba rema e mong le e mong lekala, ba latela Abimeleke; ba bea makala pela qhobosheane, mme ba tjhesa qhobosheane hammoho le ba leng ho yona. Batho bohle ba tora ya Sikeme ba eshwa jwalo, e batlile e eba sekete sa banna le basadi.

₅₀Abimeleke a ntoo ya Thebetse, a thibella Thebetse, a o kena. ₅₁Tora e matla e ne e le teng kahare ho motse, moo banna le basadi bohle le baholo bohle ba motse ba neng ba balehetse teng. Eitse hobane ba ikwalle teng, ba hlwella marulelong a tora. ₅₂Abimeleke a atamela tora, a e lwantsha, mme a atamela pela monyako wa tora, ka ho re, o a o tjhesa. ₅₃Empa mosadi e mong a akgela lelwala la ho sila hloohong ya Abimeleke, a mo pshatla lehata. ₅₄Abimeleke, a phakisa a bitsa mohlankana ya jereng dibetsa tsa hae, a re ho yena: Pshemola sabole ya hao, o mpolaye, esere mohlomong batho ba re: O bolailwe ke mosadi. Mohlankana a mo hlaba, a shwa. ₅₅Mme banna ba Iseraele, eitse ha ba bona hobane Abimeleke o timetse, ba ikela e mong le e mong hae ha hae.

₅₆Modimo wa busetsa jwalo ho Abimeleke bobe boo a bo entseng ho ntatae, ha a ne a bolaile banababo ba mashome a supileng. ₅₇Modimo wa busetsa le dihloohong tsa banna ba Sikeme bobe bohle boo ba bo entseng. Thohako ya Jothame, mora Jerubbaale, ya ba hlahela jwalo.